Qhubekani Nivelisa Iziqhamo Ninonyamezelo
1 Xa wayebhalela ibandla laseKolose, kwiminyaka engaphantsi kwengama-30 emva kokufa nokuvuka kukaYesu Kristu, umpostile uPawulos wayenokuthi inyaniso yeendaba ezilungileyo yayivelisa iziqhamo yaye isanda ehlabathini lonke. (Kol. 1:5, 6) Namhlanje ngokomlinganiselo omkhulu, amaNgqina kaYehova aye ngokoqobo afikelela kude “nasekupheleni komhlaba” ngeendaba ezilungileyo zoBukumkani. (Ize. 1:8; Yoh. 14:12) Ebudeni bonyaka wenkonzo wowe-1989, bekukho ulwando lwesi-5,6 ekhulwini kumlinganiselo wenani labavakalisi boBukumkani zwenibanzi, yaye siye safikelela incopho entsha yabavakalisi abazizi-3 787 188 kumazwe angama-212!
2 Kumazwe apho ukushumayela ngoBukumkani bukaThixo kuvaliweyo yaye iingxelo zingaphelelanga, kuye kwanikelwa ingxelo yolwando olude lwangaphezulu lwesi-7,6 ekhulwini! Phezu kwazo nje iingxaki ezininzi ezikhoyo kuloo mazwe, abavakalisi bayaqhubeka ‘bevelisa iziqhamo benomonde [‘benonyamezelo,’ NW].’ (Luka 8:15) Kwiindawo ezithile ingcinezelo iye yathotha, kodwa iimeko ezinzima ziqhubeka zingaguqukanga kwamanye amazwe.
3 Kumazwe ekukho kuwo inkululeko engakumbi yokuqhubeka nomsebenzi wokushunyayelwa koBukumkani, sijamelana neengxaki ezahlukileyo. Kuhlangatyezwana nesimo sengqondo sokungakhathali nesokuzibetha ngoyaba izinto, ingakumbi kwiindawo zabantu abafumileyo. Abakhonzi bakaYehova bamele balumke ukuze bangangenwa sisimo sengqondo esinjalo. Asifuni ukuba izilangazelelo zezinto eziphathekayo, iziyolo, ukuzihlaziya nezinye izinto eziphazamisayo ziphazamisane nomsebenzi wethu wolawulo lobuthixo. Kungenjalo sinokuba ngabangakhathaliyo size singayiqondi imfuneko yokuqhubeka sivelisa iziqhamo sinonyamezelo.—Luka 21:34-36.
KUFUNEKA UNYAMEZELO NOKUZIBHOKOXA
4 Kufuneka unyamezelo enoba sijamelene nenkcaso kwiindaba ezilungileyo okanye ngokomlinganiselo othile sinenkululeko yokuphumeza iimbopheleleko zethu zobuKristu. Kwamanye amazwe, abazalwana bethu bebesebenza kwiimeko ezinzima kangangamashumi eminyaka. Unyamezelo lwabo phantsi kweemeko ezinzima ngolo hlobo luye lwabenza bakwimeko eyamkelekileyo, yaye ngoku banandipha iintsikelelo ezityebileyo. (Roma 5:3-5; Gal. 6:9) Enoba sijamelene naziphi na iingxaki, sifuna ukuqhubeka sinonyamezelo. Kumele kunikelwe ubungqina ngoBukumkani, yaye sonke simele siqhubeke sibonakalisa ingqibelelo yethu. Ngonyamezelo, siya kuwulondoloza umphefumlo, okanye ubomi bethu.—Marko 13:10; Luka 21:19.
5 Sinokubonakalisa ukuba izinto zokomoya asizithabathi lula ngokuzibhokoxa ngamandla enkonzweni kaYehova, singethi amandla kumsebenzi wokushumayela. Kwamanye amazwe apho izinto ezikhwelwayo zinqongopheleyo khona, apho kukho intswelo yezinto eziphathekayo eziyimfuneko, nalapho kukho iingxaki ezingokoqoqosho, akuyekwanga ukushunyayelwa kweendaba ezilungileyo. Kumazwe ambalwa anjalo, abavakalisi boBukumkani ngokuqhelekileyo basebenza umlinganiselo weeyure ezili-14 ukusa kwezili-17 nyanga nganye kwinkonzo yasentsimini. Ngokuthe ngcembe noovulindlela bayanda. Oku kwenza ukuba abo kuthi bami kakuhle ngezinto eziphathekayo banqumame baze bacinge. Ngaba asinakusandisa isabelo sethu esithe rhoqo kowona msebenzi ubalulekileyo okukushunyayelwa kweendaba ezilungileyo zoBukumkani nokwenza abafundi?
NGABA SINOKWENZA OKUNGAKUMBI?
6 Ukuchithela ixesha elingakumbi enkonzweni yasentsimini kusenokufuna ukuba senze uhlengahlengiso oluthile kucwangciso lwethu. Ukuba besichithela iyure enye kubulungiseleli basentsimini ngeCawa, ngaba mhlawumbi asinakulandisa elo xesha ngokuchitha enye iyure sisenza amabuyelo okanye siqhuba isifundo seBhayibhile? Okanye ukuba siqhuba isifundo seBhayibhile, ngaba asinakuquka iyure okanye ixesha elingako sikwinkonzo yendlu ngendlu okanye sisenza amabuyelo ambalwa ngaphambi kwesifundo? NgoMgqibelo emva kokuchithela iiyure ezimbini kumsebenzi wokusasaza amaphephancwadi, mhlawumbi sinokuhambisa amaphephancwadi apho siye senza umzila wamaphephancwadi khona okanye sizame ukwenza amabuyelo ambalwa. Abo bahlala kwimimandla esezidolophini basenokukufumanisa kulula ukuchithela ixesha elithile ekunikeleni ubungqina basesitratweni. Ngezi ndlela nangezinye, sisenokukwazi ukwandisa ukuba nenxaxheba kwethu kwinkonzo yasentsimini. Oku kufanele kuzise imiphumo emihle ngokomlinganiselo esikwenza ngawo.
7 Ngokungathandabuzekiyo ixesha elingakumbi kwinkonzo yasentsimini sisenza amabuyelo liya kuphumela ekuqhutyweni kwezifundo zeBhayibhile ezingakumbi. Ekuhambeni kwexesha oku kuya kuthetha abantu abangakumbi abangena enyanisweni baze basincedise ekuphumezeni umsebenzi wokushunyayelwa koBukumkani.—Mat. 28:19, 20.
UMTHANDAZO UYIMFUNEKO
8 Ukuba siza kuqhubeka sivelisa iziqhamo sinonyamezelo, simele sifune intsikelelo kaYehova size siluthobele ukhokelo lomoya wakhe. Simele sibuthandazele ubulungiseleli bethu kuYehova. Xa sithandaza kuYehova ngomsebenzi wethu wasentsimini, sikhunjuzwa ukuba singabasebenzisana naye. (1 Kor. 3:9) Ngoncedo lukaYehova, sinokunyamezela kubulungiseleli bethu enoba asiboni miphumo ikhawulezileyo. Kwimimandla ethile, kuye kwakho ulwando kuphela emva kweminyaka emininzi abavakalisi boBukumkani benyamezele ngokuthembekileyo. Njengoko sikhangela kwikamva, kusoloko kuyimfuneko ukufuna ukhokelo oluvela kuThixo noncedo ukuze singanikezeli kodwa sibuzalise ngokupheleleyo ubulungiseleli bethu. (2 Tim. 4:5) Kusekho isiqhamo esininzi esiveliswayo kumsebenzi wokushunyayelwa koBukumkani nokwenziwa kwabafundi.
9 UYesu wayigxininisa imfuneko yokusoloko sithandaza. (Luka 18:1) UPawulos wabongoza esithi: “Thandazani ningayeki.” (1 Tes. 5:17) Kukho izizathu ezingxamisekileyo zokuba ngoku sizingise emthandazweni. Kubandakanyeke iimbopheleleko ezininzi ekunyamekeleni umhlambi owandayo minyaka le. Sifuna ukunceda abanye bavelise iziqhamo benonyamezelo. Kumele kunikelwe ingqalelo kwiimfuno ezahlukahlukeneyo zabavakalisi ngabanye nezentlangano iphela. Ngenxa yemfuneko yeminikelo yokuxhasa umsebenzi nokwenza kube nokwenzeka ukuqhubeka kupapashwa uncwadi olusekelwe eBhayibhileni, sifuna ukuthandazela ukuba uYehova aqhubeke eshukumisa abantu aboyika uThixo ukuba banikele ngezandla ezishushu ngokuphathelele oku.—2 Kor. 9:8-11.
10 Njengoko imimandla ethile yentsimi yazwenibanzi ivuleka ukuze kwandiswe umsebenzi wolawulo lobuthixo ngokomlinganiselo omkhulu kunanini na ngaphambili, isiluleko esingokweZibhalo esikweyabaseKolose 4:2 siba nentsingiselo engakumbi: “Zingisani ukuthandaza, niphaphamile kuko, ninombulelo.” Sifanele sithandazele abazalwana bethu kuzo zonke iindawo ukuze baqhubeke bevelisa iziqhamo, benceda abanye ababumvu abafunyenwe kwimimandla yentsimi ekuye kwanzima ukunikela ubungqina kuyo kwixesha elidluleyo.
BONAKALISANI UMBULELO
11 Hayi indlela esinombulelo ngayo ngentabalala yamalungiselelo okomoya esinawo! Sifuna ukumbulela uYehova ngoku, yaye sithandazela intsikelelo yakhe eqhubekayo emsebenzini womkhonzi othembekileyo neQumrhu Elilawulayo lakhe. Imigudu yalo yokuthobeka, neyokuzibhokoxa ngenxa yethu nangenxa yababumvu abasehlabathini lonke ixatyiswa ngokwenene.
12 Ekuhlwayeleni imbewu yoBukumkani, kuye kwahanjiswa uncwadi oluninzi kakhulu. (Mat. 13:3-8, 18-23) Ukanti, entsimini kusekho imfuneko eqhubekayo yeeBhayibhile noncwadi lweBhayibhile. Ingxelo yehlabathi ibonisa ukuba kuye kwenziwa umsebenzi omkhulu wokuhlwayela nowokunkcenkceshela ngokwenza amabuyelo nokuqhuba izifundo zeBhayibhile. Njengoko siqhubeka sisenza indima yethu kwezi nkalo zibalulekileyo zobulungiseleli bethu, siyambulela uYehova ngentsikelelo yakhe eqhubekayo nehlumisayo. Enyanisweni, siyayithandazela loo ntsikelelo.—1 Kor. 3:6, 7.
EZINYE IINTSWELO
13 Ngenxa yokuba sehlabathini nangona engeyonxalenye yalo, amaKristu aza kuqhubeka ejamelana neemvavanyo nezilingo, kwaye ezi ziya kuthabath’ unyawo kule mihla yokugqibela. Bambi ngoku banyamezela intshutshiso okanye obunye ubunzima. Abanye bamele baqhubeke nemisebenzi yabo yobuKristu kumazwe adlavulwe yimfazwe. Abazalwana bethu baye banamava eentlekele ezinjengeenyikima zomhlaba, iinkanyamba nezitshingitshane ezikhulu. Xa oku kusenzeka, sifanele sibathandazele abazalwana bethu abakwiindawo ezinjalo. (Thelekisa IZenzo 12:5; eyesi-2 kwabaseKorinte 1:11.) Maxa wambi kuba yimfuneko ukuthetha okanye ukubhalela amagosa akwizikhundla eziphambili ngenxa yokuvalwa komsebenzi, ukutshutshiswa kwabazalwana bethu, okanye eminye imibandela echaphazela izilangazelelo zoBukumkani. Kwiimeko ezinjalo, senza oko sinokukwenza ngokobuqu, yaye siyabathandazela aba bantu ukuze babe nesimo sengqondo esifanelekileyo ngabo sikhonza nabo.—1 Tim. 2:1, 2.
14 Kukho iingcinezelo ezininzi ezikwiintsapho ezihlala kwihlabathi elingendawo likaSathana. (2 Kor. 4:4) Izibini ezitshatileyo zisenokujamelana neengxaki ezinzulu. Zifanele zikhuthazwe ukuba zithandazele ukhokelo lukaThixo, yaye nathi sinokuzithandazela. (1 Kor. 7:5; 1 Pet. 3:7) Iintloko-ntsapho zifanele ziqonde ukuba uYehova uya kuyiphulaphula imithandazo enyanisekileyo yokuba zizuze ukhokelo lokuzongamela kakuhle izindlu zazo. (ABagwe. 13:8; Fil. 4:6, 7) Abancinane nabakhulu bajamelene neemeko ezilingayo. Ezi zisenokuba sesikolweni, kumsebenzi wempangelo, xa beseluhambeni okanye kwezinye iimeko. Umthandazo uyasinceda ukuze sixhathise umoya weli hlabathi lingendawo size siqhubeke sivelisa iziqhamo njengoko siqhubeka sisenza oko kukholekileyo emehlweni kaThixo.—Mat. 6:13; Efe. 6:13-18; 1 Yoh. 3:22.
15 UYehova unguMphulaphuli omkhulu womthandazo. (INdu. 65:2) Ngamaxesha onke sifanele siwaphose kuye amaxhala ethu. (INdu. 55:22) Ngomthandazo sinamathuba okubonakalisa inkxalabo yethu ngezilangazelelo zoBukumkani nentlalo-ntle yabazalwana bethu kuzo zonke iindawo. Xa sicinga ngomsebenzi wabo bakhokelayo ebandleni nabo balathisa kumsebenzi wolwando zwenibanzi, xa siqhubana nabo bagulayo ngokomoya, okanye xa sinyamekela ezinye iingxaki enoba zincinane okanye zinkulu, sonke sifanele imicimbi enjalo siyizise kuYehova ngomthandazo. (1 Tes. 5:25; Yak. 5:14-16) Ewe, amaxhala ethu sifanele siwaphose kuYehova sinentembelo epheleleyo yokuba nantoni na esiyicela ngokuvisisana nokuthanda kwakhe, uya kusiva. (1 Pet. 5:7; 1 Yoh. 5:14) Ngamana singabonakalisa inzondelelo kwinkonzo yoBukumkani size ngokuqhubekayo sikhangele kuYehova ukuba asincede siqhubeke sivelisa iziqhamo sinonyamezelo.