Ilungelo Elihle Lenkonzo
1 Omnye umfundi wathi ufunde okungakumbi okuxabiseke ngokwenene kwiMboniselo noVukani! kunoko wayekufunde kwiminyaka emithandathu eyunivesithi. Kuqhelekile ukuba abafundi abanyanisekileyo bavakalise uxabiso oluvuyisayo emva kokufunda la maphephancwadi ithuba nje elifutshane. Elinjani lona ilungelo esinalo lokwabelana rhoqo ngamaphephancwadi ethu nabo bawaxabisa ngokwenyaniso!
2 Nangona abantu abaninzi benomdla othile enyanisweni, abahambelanga phambili ukusa kwinqanaba lokwamkela isifundo seBhayibhile sekhaya. Kodwa umdla wabo usenokuhlakulelwa ukuba uthile uyabuyela rhoqo nenkupho nganye entsha yeMboniselo noVukani! Ewe, ukuhambisa amaphephancwadi ngokuthembeka kumzila wamaphephancwadi kuye kwanceda ukushukumisela abantu ukuba ekugqibeleni bavume ukuqhutyelwa isifundo seBhayibhile rhoqo.
3 Siyangenelwa ngokobuqu ngokuba nomzila wamaphephancwadi ukuba siqala siwafunde amaphephancwadi size siphawule iingongoma ezithile eziya kubangel’ umdla ngokukhethekileyo kumntu ngamnye okuludwe lwethu.
4 Maxa wambi umninimzi usenokusinika umnikelo ongaphezu kwalowo ufunekayo. Kutheni ungamxeleli ukuba uza kumzisela iinkupho ezintsha emva kweeveki ezimbini? Esi isenokuba sisiqalo selinye ibuyelo lomzila wamaphephancwadi. Wonk’ ubani obonakalisa umdla kumaphephancwadi ethu ufanele aqukwe kuludwe lwakho lwamabuyelo omzila wamaphephancwadi. Ukuba umntu ubonakalisa umdla wokwenene xa esamkela amaphephancwadi, usenokumcacisela ukuba kubakho amanqaku abalaseleyo kumaphephancwadi ethu emva kweeveki ezimbini yaye umxelele ukuba uya kukuvuyela ukumzisela wona. Qinisekisa ukuba uyabuyela rhoqo, uwasebenzisa ngokunengenelo amathuba okuxubusha nomninimzi ngemibandela yeBhayibhile. Siqinisekile ukuba uya kulinandipha eli lungelo lihle lenkonzo.