Qhuba Izifundo ZeBhayibhile Kwincwadi Unokuphila Ngonaphakade
1 Lithetha ngencwadi Unokuphila Ngonaphakade, elinye ibhinqa lathi: “Ngaphandle kweBhayibhile, le ncwadi ndiyifumanise ichane gqitha, iyincwadi enempembelelo nechukumisayo kwendakha ndazifunda!” Sonke siyavuma ukuba le ncwadi yenye yezona zibalaseleyo kwezakha zapapashwa ukunceda abantu ukuba baqonde iBhayibhile yaye ngokukodwa ukubashukumisela ukuba babe ngabadumisi bakaYehova abakhutheleyo.
2 Ngowe-1982, unyaka incwadi Unokuphila Ngonaphakade eyakhutshwa ngawo, eMzantsi Afrika abavakalisi abangama-28-783 babeqhuba izifundo zeBhayibhile ezikumlinganiselo we-17 791. Sithetha nje, abavakalisi abangama-54 939 baqhuba izifundo zeBhayibhile ezingama-53 352. Ukuza kuthi ga ngoku, kuye kwashicilelwa imibhalo yencwadi ethi Unokuphila Ngonaphakade ezizigidi ezingama-62 ngeelwimi ezili-115. Elinjani lona ukuba likhulu igalelo le ncwadi enalo kumsebenzi wethu wehlabathi lonke!
3 Zibekele Usukelo: Olu lwando luphawulekayo lungumphumo wentsikelelo kaYehova nomnqweno wabantu bakhe wokunceda abanyanisekileyo ngesigidimi seBhayibhile esisindis’ ubomi. (Roma 10:13-15; 1 Tim. 2:4) Siyakuqonda ukungxamiseka kwala maxesha nemfuneko yokukhuthala ekuvakaliseni uBukumkani bukaThixo.
4 Ngoxa intlangano ihambela phambili, siqhuba njani thina ngabanye? Ngaba sizimisele ukuba nesabelo ngokuzeleyo kumsebenzi obalulekileyo wokwenza abafundi? Ukuze siphumeze oku, sifanele sizibekele usukelo lobuqu. Ngaba sinokukhuthala ngakumbi ekulandeleni abanomdla? Kutheni ungazibekeli usukelo lokuqalisa isifundo seBhayibhile esitsha ebudeni benyanga kaFebruwari?
5 Ngubani Onokuqhuba Isifundo SeBhayibhile?: Abavakalisi abaninzi abaneemvelaphi ezahlukahlukeneyo baye banovuyo lokuqhuba isifundo seBhayibhile kwincwadi Unokuphila Ngonaphakade. Ukuba lula kwendlela ebhalwe ngayo kwenza kube lula ngakumbi ukuqhuba isifundo, nto leyo eyenza nabavakalisi abatsha bakwazi ukuba nesabelo kulo msebenzi ubalulekileyo. Ukongezelela, inkoliso yethu iye yayifundisisa ngokobuqu, ngoko siqhelene neziqulatho zayo. Omnye umvakalisi ongazange aqhube izifundo zeBhayibhile ngaphambi kokusebenzisa incwadi Unokuphila Ngonaphakade evakalisa uxabiso wabhala: “Ndinezifundo ezithathu yaye esesine silungele ukuqalisa. Ndiswele amazwi okunibulela ngokwenza ukuba kube lula ukuqhuba izifundo zeBhayibhile.”
6 Kwakhona, nabaselula banesabelo ngenkuthalo kumsebenzi wokuqhuba izifundo zeBhayibhile ngokusebenzisa incwadi Unokuphila Ngonaphakade. Omnye umzalwana oselula le ncwadi uyishiya phezu kwedesika yakhe esikolweni. Oku kuye kwakhokelela kwiingxubusho ezimnandi nakwizifundo zeBhayibhile eziliqela. Bambi abaselula baye basebenzisa indlela engqalileyo ngokucela imvume kubazali abadibana nabo kubulungiseleli bendlu ngendlu ukuba baqhube isifundo seBhayibhile nabantwana babo. Abantwana bethu abanakuze babe bancinane kakhulu ukuba bangathetha ngamadinga kaYehova obomi obungunaphakade kwiparadisi esemhlabeni.
7 Enoba ungoselula okanye okhulileyo, enye yezinto ezinokubangela uvuyo olukhulu nabani na anokuba nalo kubulungiseleli kukuqhuba isifundo seBhayibhile sekhaya. Ngoko ngamnye wethu makathandazele uncedo kuYehova aze axhakamfule naliphi na ithuba lokuvakalisa ithemba lethu ekuhleni. Sebenzisa incwadi Unokuphila Ngonaphakade ukunceda abanye bafunde indlela abanokuba nesabelo ngayo ekudumiseni uThixo wethu, uYehova.—INdu. 148:12, 13.