Ukusebenza Intsimi Egutyungelwa Ngokufuthi
1 Siyavuyiswa kukufumana iingxelo zokuba amabandla amaninzi ayisebenza ngokufuthi intsimi yawo. (Mat. 24:14; 1 Tim. 2:3, 4) Nangona oku kusizisa ucelomngeni olukhethekileyo, amava abonise ukuba sinokuhlangabezana nalo ngempumelelo ukuba siyalungiselela size sikuxhobele kakuhle ukuqhubana neemeko ezahlukeneyo ezivelayo.
2 Iintshayelelo Ezinemiphumo Zibalulekile: Kubaluleke kakhulu ukulungiselela ukusebenzisa intshayelelo enye okanye ezingakumbi ezicingisiswe ngenyameko. Zifanele ziquke amazwi angqalileyo acacisa izizathu ezibalulekileyo zokuba sityelele ngokufuthi.
3 Incwadi Ukuqiqa inikela imizekelo emihle emininzi yeentshayelelo ezifanelekileyo ezinokusetyenziswa. Ezintathu zidweliswe kwiphepha 15 phantsi komxholo othi “Kwintsimi Esetyenzwa Ngokufuthi.” Qhelisela ezo ubungathanda ukuzisebenzisa kwintsimi yakho.
4Bambi abavakalisi bayaphumelela ngokusebenzisa imibandela ekumaphephandaba asekuhlaleni ekuqaliseni incoko kwintsimi esetyenzwa ngokufuthi. Incwadi Ukuqiqa inikela imizekelo emithathu yendlela okunokwenziwa ngayo oku. Qwalasela intshayelelo yesibini ephantsi komxholo othi “Ulwaphulo-mthetho/Ukhuseleko” kwiphepha 13 neentshayelelo ezimbini zokuqala phantsi komxholo othi “Iziganeko Ezikhoyo” kwiphepha 11.
5 Iintshayelelo Ozilungiselelayo: Zive ukhululekile ukwakha uze usebenzise intshayelelo efana nezo zinikelwe kwincwadi Ukuqiqa. Zinikele ngendlela oncokola ngayo, usebenzisa amazwi akho. Unokuziqhelisela nomvakalisi onamava ngaphambi kokuzisebenzisa entsimini.
6 Ngokomzekelo, usenokuthetha okufana noku:
◼ “Ukususela kwixesha ebesikutyelele ngalo, [khankanya into eyehlileyo kutshanje abantu basekuhlaleni abathetha ngayo]. Ngenxa yokuba sonke isichaphazela ngeendlela ezahlukeneyo, uninzi lwabamelwane bethu luvakalise inkxalabo enzulu. Mhlawumbi nawe ukhe wacinga ngayo. [Nqumama ngokufutshane ukuze uvumele impendulo asenokuyinikela.] Ngenxa yeemeko zehlabathi namhlanje, ngaba ubungayi kuvumelana noko kwabhalwa ngumprofeti uYeremiya kwisahluko 10, indinyana 23?” Emva kokuba usifundile esi sibhalo, cela amagqabaza omninimzi, wandule ke walathisele ingqalelo kwisibhalo esithile esibonisa ngokungqalileyo indlela uYehova aya kuyicombulula ngayo loo ngxaki nixubusha ngayo.
7 Okanye unokuthi:
◼ “Alithandabuzeki elokuba uphawule ezindabeni namhlanje ukuba [khankanya ngokungqalileyo loo nto yenzekileyo]. Mhlawumbi uya kuvuma ukuba le nto iyasichaphazela sonke. [Nqumama ngokufutshane ukuze uvumele impendulo asenokuyinikela.] Sinokuthemba ukuba abasemagunyeni banikele isicombululo sokwexeshana; noko ke, iBhayibhile ibonisa indlela le ngxaki eya kuconjululwa ngayo ngokusisigxina.” Nikela ingqalelo kwisibhalo esichaza ngokungqalileyo oko uThixo aza kukwenza.
8 “Kutheni Nifika Ngokufuthi Kangaka?” Iindlela ezifanelekileyo zokuphendula la mazwi anokuthintela incoko zinikelwe kwincwadi Ukuqiqa kwiphepha 20 phantsi komxholo othi “Kutheni Le Nto Bantundini Nifika Ngokufuthi Kangaka?” Kwanaxa singabuzwanga, sinokunikela ubungqina obuhle ukuba sixhakamfula onke amathuba afanelekileyo ukuze sincede abanye baqonde ukuba luthando lokwenene ngoThixo nangommelwane olusishukumisela ukuba sityelele ngokufuthi kangangoko kunokwenzeka. Ukuxubusha amazwi kaYesu akuYohane 21:15-17 kunokungqineka kuyingenelo gqitha kule nkalo.
9 De uYehova athi kwanele, masiqhubeke sihlangabezana nocelomngeni lokusebenza intsimi egutyungelwa ngokufuthi. Xa sizimisele ngale ndlela, sinokuqiniseka ukuba uya kusikhokela, asikhusele, aze asisikelele kude kube sekupheleni.—Mat. 28:19, 20.