Yenza Intshayelelo Eshukumisayo
1 IMboniselo noVukani! ziyasebenziseka ekutyaleni iimbewu zenyaniso kwiingqondo nakwiintliziyo zabafundi. Ngoko ke, sifanele sisebenzise iindlela eziphumelelayo ukuze siwashiye la maphephancwadi kumakhaya abantu abanokungenelwa kubuncwane bokomoya abuquletheyo.
2 Abaninimzi banokushukunyiselwa njani ukwamkela baze bafunde amaphephancwadi ethu? Okuninzi kuxhomekeke kwindlela esiwatshayelela ngayo. Amacebiso amahle gqitha ngokulungiselela iintshayelelo ezinempumelelo afumaneka kwincwadi Ukuqiqa, iphepha 9-15.
3 Xa uhambisa IMboniselo kaOktobha 1, usenokuzama ukusebenzisa icebiso lesithathu phantsi komxholo othi “Iziganeko Ezikhoyo” kwiphepha 11-12 lencwadi Ukuqiqa.
Emva kokuba uzazisile, usenokuthi:
■“Ukuba bekunokuthiwa khetha, yiyiphi ingxaki kwiingxaki ezininzi ihlabathi elijongene nazo obungathanda ukubona iconjululwa kuqala?” Yiphulaphule indlela aphendula ngayo umninimzi, uze uvumelane noko kumxhalabisayo. Ngoko unokuhlabela mgama, uthetha amazwi anjengala: “Qwalasela oko iBhayibhile ikunikelayo njengesicombululo kwiingxaki ezinjalo. [Funda uIsaya 9:6, 7.] Ngoko isicombululo sokwenene kuzo zonke iingxaki zoluntu sikulawulo olusesikweni lukaMesiya, uYesu Kristu.” Yandula utyhile kwiphepha 8 uze walathisel’ ingqalelo kwiziqendu ezithathu zokugqibela zenqaku elinomxholo othi “UMesiya—Ngaba Lithemba Lokwenene?”
4 Ezinye iintshayelelo ezimbini onokuzisebenzisa neMboniselo kaOktobha 1 zifumaneka kwiphepha 14 lencwadi Ukuqiqa, kumxholo othi “Umsebenzi/Izindlu.” Ezi ngcamango nemibuzo unokuzivakalisa ngawakho amazwi okanye uphinde oko kuthethwe kwincwadi Ukuqiqa. Emva kokuba uvumelene nempendulo yomninimzi, qhubeka usabelana naye ngenkcazelo ebangel’ umdla ekwisiqendu sokuqala kwiphepha 4 kumxholwana othi “Ngaba Asikho Isicombululo?” Yandula emva kokufunda uIsaya 65:21-23, umbonise iintsikelelo eziya kuziswa lulawulo lukaMesiya.
5 Ukuba usebenzisa uVukani! kaOktobha 8 othi “Unako Ukuzoyisa Iimvakalelo Ezidakumbisayo,” usenokuzama ukusebenzisa intshayelelo yesithathu kumxholo othi “Ubomi/Ulonwabo” kwiphepha 10 lencwadi Ukuqiqa. Emva kokufunda INdumiso 1:1, 2, unokutsalel’ ingqalelo kwingongoma efanelekileyo kwiphephancwadi uVukani!
6 Kusenokwenzeka ukuba udibane nabaninimzi abathi banoncwadi lonqulo lwabo. Unokumcacisela ukuba nathi sinazo iimpapasho ezisetyenziswa sithi kuphela (njengoBulungiseleli Bethu BoBukumkani); noko ke, izigidi zabantu abangengomaNgqina kaYehova ziyabafunda oolindixesha bethu.
7 Kweyoku-1 kwabaseKorinte 3:6 uPawulos wathi: “Mna ndatyala, uApolo wankcenkcesha, ke nguThixo owahlumisayo.” Ukuba sifuna uYehova ahlumise imbewu yenyaniso ezintliziyweni zabanomdla, sifanele sinikele ingqalelo ekutyaleni le mbewu ngokuphumelelayo ngokusebenzisa iintshayelelo ezishukumisayo.