Hlala Unesimo Sengqondo Esakhayo
1 Hayi indlela esichwayita ngayo xa sifunda ngolwando olumangalisayo oluqhubeka kwamanye amazwe! Ukanti, siyaqonda ukuba kwezinye iindawo abavakalisi boBukumkani ngokufuthi badibana nenkcaso, ukungabi namdla, okanye ukungafunwa ngokupheleleyo komsebenzi wethu wokushumayela. Ukuba intsimi yethu injalo sinokuhlala njani sinesimo sengqondo esakhayo? Sinokusithintela njani isimo sengqondo esilandulayo esinokusiphanga uvuyo lwethu okanye sinciphise inzondelelo yethu ngomsebenzi wokwenza abafundi?
2 Isimo sengqondo esakhayo siya kusinceda sihlale silungelelene. Kwanaphantsi kweemeko ezilingayo, asifanele sivumele iingcinga ezingakhiyo zilawule imbono yethu. UYesu wasimisela umzekelo ogqibeleleyo. Ngokwentelekiso babembalwa abantu abakwamkelayo awayekufundisa. Abanye bakhutyekiswa yimfundiso yakhe. Wajamelana neemeko ezaluvavanya ngokuqatha unyamezelo lwakhe. Iinkokeli zonqulo zawugxeka umsebenzi wakhe zaza zenza iyelenqe lokumbulala. Wayetshicelwa, eqhwatywa, ehlekwa, ebethwa waza ekugqibeleni wabulawa. Sekunjalo, wayevuyiswa ngumsebenzi awayewenza. Kwakutheni? Wayekuqonda ukubaluleka kokwenza ukuthanda kukaThixo, ibe akazange anikezele.—Yoh. 4:34; 13:17; Heb. 12:2.
3 Hlala Unembono Efanelekileyo Ngobulungiseleli Bethu: Ukuze senze oku, kufuneka sikhumbule oothunywashe abaliqela. Khumbula ukuba sinesigidimi inkoliso yabantu engasikhathaleliyo okanye esichasileyo. (Mat. 13:14, 15) Nangona abapostile bayalelwa ngabasemagunyeni ukuba bayeke ukufundisa ngegama likaYesu, bahlala bethembekile kuthumo lwabo lokushumayela, yaye baqhubeka bevuna. (IZe. 5:28, 29; 6:7) Sazi kusengaphambili ukuba kwezinye iindawo, ngokwentelekiso bambalwa abantu abaya kuphulaphula. (Mat. 7:14) Ngenxa yoko, sinesizathu sokuvuya ukuba umntu omnye kuphela kwintsimi yethu uyaphulaphula. Kwakhona, khumbula ukuba nabachasayo bamele banikwe ithuba lokuphulaphula. (Hez. 33:8) Bambi abachasayo ekugqibeleni bayaguquka babe ngabanquli bakaYehova. Ngoko, xa sinembono efanelekileyo, ubulungiseleli bethu busenza sizive siphumeze okuthile, enoba bambalwa abaphulaphulayo. Ukusa kwethu isigidimi soBukumkani bukaThixo ezindlwini kunikela ubungqina.—Hez. 2:4, 5.
4 Sinesizathu esilungileyo sokuba nembono eyakhayo. Ukuphumelela komsebenzi owenziwa ehlabathini lonke nobungqina obandayo bokusondela kwembandezelo enkulu kufanele kusishukumise sonke senze konke okusemandleni ethu ekukhonzeni sinokuhlonela uThixo. (2 Pet. 3:11, 14) Ukusebenza ngenzondelelo ebudeni buka-Agasti kuya kuba yindlela entle yokubonakalisa uxabiso lwethu ngoko sikufundileyo. Kwakhona sifuna abasandula ukunxulumana nathi babonise isimo sengqondo esakhayo ekusebenziseni abakufundiswayo. Ukuba abanye kwesibafundela iBhayibhile benze inkqubela ukusa kwinqanaba lokukulungela ukuba ngabavakalisi abangabhaptizwanga, inyanga ka-Agasti isenokuba lixesha elihle lokuba baqalise.
5 Enoba singabavakalisi okanye oovulindlela, sonke siyancedakala xa sikhumbula ukuba oko uYehova athi sikwenze akuloxanduva. (1 Yoh. 5:3) Uthembisa ukusilondoloza. (Heb. 13:5b, 6) Phezu kwako nje ukungabi namdla, inkcaso, okanye ukungasifuni kwabantu simele sibe nesimo sengqondo esakhayo size siqhubeke sishumayela kuba ukwenjenjalo kukuthanda kukaThixo.—1 Tim. 2:3, 4.