Ukufanelekela Nokuxhotyiselwa Ukufundisa Abanye
1 Xa uMoses wamiselwa njengommeli kaYehova, wayeziva engakufanelekeli ukuvakalisa ilizwi likaThixo kuFaro. (Eks. 4:10; 6:12) NoYeremiya wayengazithembanga ukuba angakhonza njengomprofeti kaYehova, exelela uThixo ukuba akakwazi kuthetha. (Yer. 1:6) Nangona babengazithembanga ekuqaleni, bobabini aba baprofeti bazingqina bengamangqina kaYehova anenkalipho. UThixo wabenza bafaneleka ngokupheleleyo.
2 Namhlanje, ngenxa kaYehova, sinoko sikufunayo ukuze sibufeze ngentembelo ubulungiseleli bethu. (2 Kor. 3:4, 5; 2 Tim. 3:17) Njengengcungela yomkhandi weenqwelo-mafutha onezixhobo ezaneleyo, sixhotyiswe ngokufanelekileyo ukuze sibufeze ngobuchule ubulungiseleli bethu. NgoJanuwari sihambisa incwadi ethi Uxolo Nonqabiseko Lokwenyaniso—Unokulufumana Njani? Nangona esi sixhobo sokomoya singekho sitsha, imibandela yeZibhalo ekuso isesexesheni yaye siza kubanceda abantu bafunde inyaniso. Ezi ntshumayelo zilandelayo zicetyisiweyo sisenokuzihlengahlengisela nayiphi na imibandela eyahlukeneyo exhalabisayo kwintsimi yethu.
3 Usenokusebenzisa umbandela ongemfundo ukuvusa umdla kwiLizwi likaThixo. Incoko yakho usenokuyiqalisa ngokuthi:
◼ “Namhlanje abantu bathe phithi yimfundo esemgangathweni. Ngokubona kwakho, luhlobo luni lwemfundo afanele ayifune umntu ukuze afumane uyolo olukhulu nempumelelo ebomini? [Vumela impendulo.] Iingenelo zikanaphakade zinokufunyanwa ngabo bangenisa ulwazi ngoThixo. [Funda IMizekeliso 9:10, 11.] Le ncwadi ethi Uxolo Nonqabiseko Lokwenyaniso—Unokulufumana Njani? isekelwe eBhayibhileni. Yalatha kokuphela komthombo wolwazi olunokusikhokelela kuxolo nonqabiseko lokwenene.” Yandula ke utyhile kwisiqendu 8 iphepha 6 umbonise ukuba yiBhayibhile esinika ulwazi esilusweleyo. Hambisa le ncwadi ngomnikelo wee-R4,00, uze ulungiselele ukubuyela.
4 Xa ubuyela kumninimzi obuxubushe naye ukubaluleka kwemfundo yeBhayibhile, usenokuthi:
◼ “Ukugqibela kwam ukuza apha, sixubushe ngeBhayibhile njengomthombo wemfundo onokusiqinisekisa ngekamva lethu likanaphakade. Kambe ke, kufuneka senze umzamo ukuze sifunde ekufuneka sikwazile ngeZibhalo. [Funda IMizekeliso 2:1-5.] Abantu abaninzi bakufumanisa kunzima ukuqonda iindawo ezithile eBhayibhileni. Bendingathanda ukukubonisa indlela esiye sayisebenzisa kakhulu ukunceda abantu bafunde okungakumbi ngeemfundiso ezisisiseko zeBhayibhile.” Ngoxa usebenzisa incwadi obuyishiyile, tyhila kwindawo efanelekileyo uze ngokufutshane umbonise indlela esiqhutywa ngayo isifundo seBhayibhile. Ukuba umninimzi unqwenela ukuba nesifundo esithe rhoqo, mcacisele ukuba uza kumphathela incwadi yokufundisisa ethi Ulwazi Olukhokelela Kubomi Obungunaphakade.
5 Uninzi lwabantu luyakhathazwa kukutsala nzima kwezigidi zabantwana ehlabathini. Mhlawumbi unokumnceda umninimzi abone indlela uThixo akujonga ngayo oku, ngokuthi:
◼ “Alithandabuzeki elokuba ezindabeni uye wabona abantwana abalambayo, abagulayo nabangenabani abakuwo wonke umhlaba. Kutheni iintlangano ezijongene noku zingakwazanga ukuphucula le meko? [Vumela impendulo.] UThixo ufuna uluntu lonwabe. Phawula oko akuthembisa abantwana kwanabantu abakhulileyo, njengoko kubhalwe eBhayibhileni. [Funda ISityhilelo 21:4.] Le ncwadi ethi Uxolo Nonqabiseko Lokwenyaniso—Unokulufumana Njani? inikela iinkcukacha ezingakumbi zehlabathi eliya kuziswa nguThixo apho kungasayi kubakho kubandezeleka.” Tyhila kumfanekiso weParadisi okwiphepha 98, uze uwuxubushe. Hambisa le ncwadi ngomnikelo wee-R4,00, uze ulungiselele ukubuyela.
6 Ukuba ekuqaleni ubuthethe ngokutsala nzima kwabantwana, xa ubuyela usenokuqhubeka nengxubusho yakho ngokuthi:
◼ “Xa bendilapha kutshanje, uchaze indlela ekukhathaza ngayo intlungu yabantwana abatsala nzima ngenxa yokuqhekeka kwamakhaya abo, indlala, ukugula nogonyamelo. Kuyathuthuzela ukufunda eBhayibhileni ngehlabathi apho kungasayi kubakho mntwana okanye umntu okhulileyo othwaxwa kukugula, ziintlungu, okanye kukufa. Isiprofeto esikwincwadi kaIsaya sibonisa ukuba siza kuphila ubomi obulunge ngakumbi emhlabeni.” Funda uze uxubushe uIsaya 65:20-25. Ekugqibeleni tshayelela isifundo seBhayibhile kwincwadi ethi Ulwazi.
7 Ekubeni abantu abaninzi becinga ngonqabiseko ngenxa yolwaphulo-mthetho olwandayo, incoko yakho unokuyiqalisa ngalo mbandela ngokuthi:
◼ “Sincokola nabamelwane bethu ngonqabiseko. Siphila phakathi kolwaphulo-mthetho oluninzi, yaye luchaphazela nobomi bethu. Siyintoni isicombululo? Ucinga ukuba ukho nawuphi na umntu onokushenxisa ezi ngxaki emhlabeni?” Vumela impendulo. Ngokwendlela aphendula ngayo unokuqhubeka uthi: “Kuthekani ukuba bekukho umlawuli oneemfaneleko ezinjengezi zichazwe kuIsaya 9:6, 7? [Mfunde.] Akucingi na ukuba ebenokusikhokelela kwihlabathi elinqabiseke ngakumbi?” Balaselisa iingongoma ezithile ukubonisa ukuba esi sibhalo sithetha ngoYesu Kristu. “Le ncwadi enomxholo othi Uxolo Nonqabiseko Lokwenyaniso—Unokulufumana Njani? ilichaza kakuhle ekuphela kwethemba esinalo lokhuseleko nonqabiseko nendlela ‘uMthetheli Woxolo’ aya kuluzisa ngayo uxolo lwehlabathi lonke emhlabeni kwixesha lethu. Ubungethandi ukufunda okungakumbi ngeli hlabathi litsha lithenjisiweyo?” Hambisa le ncwadi ngomnikelo wee-R4,00.
8 Xa uqhubeka nengxubusho yakho yexa elidluleyo engonqabiseko, usenokuzama le ntshayelelo:
◼ “Ndiyithandile incoko yethu ebingonqabiseko. Njengoko siye satsho, nguYesu kuphela umlawuli onokuzisa unqabiseko oluhlala luhleli kulo mhlaba. Uya kukuvuyela ukuva ezinye zezinto aya kuzenzela uluntu xa elawula.” Funda uze uxubushe isiqendu 20 kwiphepha 42 kwincwadi ethi Ulwazi, umbuze enoba ungambonisa kusini na indlela yokufundisisa iBhayibhile ngale ncwadi.
9 Xa sidlulisela ulwazi ngoThixo kwabanye, sisenokuzibuza sithi, “Ngubani na ozifanelekele ngokwaneleyo ezi zinto?” IZibhalo ziyaphendula: “Sithi.”—2 Kor. 2:16, 17.