Ukunikela Ubungqina Ngehambo Entle
1 Kwibutho labantu likavula-zibhuqe lanamhlanje, ulutsha oluninzi luzinkala ngenyhek’ etyeni ngokuzifica kwiziyobisi, ekuziphatheni okubi, kwimvukelo nakugonyamelo. Kwelinye icala, ihambo engumzekelo yolutsha oluphile saka lwebandla lamaKristu iyahlaziya yaye ngokuqinisekileyo isisihombo kuYehova. Inikela ubungqina obunamandla nobunokutsalela abanye enyanisweni.—1 Pet. 2:12.
2 Amava amaninzi abonisa ukuba ihambo entle yolutsha olungamaKristu iye yanegalelo elihle kubakhi mkhanya. Ethetha ngelinye iNgqina eliselula elaliseklasini yakhe, umfundisi-ntsapho othile waxelela yonke iklasi ukuba uThixo wale ntwazana, uYehova, nguThixo wokwenyaniso. La mazwi wayewathethiswa kukuba eli gqiyazana lalinembeko. Omnye umfundisi-ntsapho wabhalela uMbutho, esithi: “Makhe ndinincome ngolutsha oluthandekayo eninalo kule nkonzo yenu. . . . Ulutsha lwenu lungumzekelo ngokwenene. Lunembeko kubantu abakhulu, lululamile yaye lunxiba ngendlela endilisekileyo. Andisathethi ke ngendlela oluyazi ngayo iBhayibhile! Ndilwazi lunjalo ke mna unqulo!”
3 Omnye umfundisi-ntsapho wachukunyiswa liNgqina elineminyaka esixhenxe ubudala elaliseklasini yakhe. Watsalwa kukuthozama nokuthandeka kwale ntwana, nto leyo eyayenza yahluka mpela kwamanye amakhwenkwe. Wachukunyiswa kukuzimisela kwayo xa kufikelelwa kwimibandela yeenkolelo zonqulo—ingakoyiki tu ukwahluka ngenxa yoko ikukholelwayo. Wabona ukuba isazela sayo sasiqeqeshiwe nokuba yayikwazi “ukubalula kokubini okulungileyo nokubi.” (Heb. 5:14) Ekugqibeleni, unina wale nkwenkwe wamtyelela lo mfundisi-ntsapho, ibe kwaqaliswa isifundo seBhayibhile. Ethubeni, lo mfundisi-ntsapho wabhaptizwa waza kamva wanguvulindlela othe ngxi!
4 Elinye ityendyana lomfana laphenjelelwa yihambo entle yeNgqina elithile elalifunda nalo. Le ntwazana yayahluke ngokwenene—yayilulame okwegusha, ithanda ukufunda yaye isoloko inxibe ngokundilisekileyo; yaye, ngokungafaniyo nezinye iintombi, yayingahambi incuma namakhwenkwe. Layifund’ ivaliwe into yokuba le ntwazana yayiphila ngemigaqo yeBhayibhile. Lo mfana wayibuza imibuzo ephathelele iinkolelo zayo zonqulo ibe wachukunyiswa koko wakufundayo. Waqalisa ukufundisisa, kungekudala wabhaptizwa, yaye ekugqibeleni wade wangenela ubulungiseleli bobuvulindlela nenkonzo yaseBheteli.
5 Ukuba ungumKristu oselula onqwenela ukunikela ubungqina obuhle kwabanye, yibek’ esweni ngandlela zonke ihambo yakho. Ungaze uyekelele ngokuthi ungaboni nyala kwizimo zengqondo, kwiimbono okanye kwiindlela zokuphila zeli hlabathi likavula-zibhuqe. Misela umzekelo osemagqabini ngentetho, ngendlela onxiba nozilungisa ngayo, kungekuphela xa ukwinkonzo yasentsimini nakwiintlanganiso zebandla kodwa xa usesikolweni naxa uzihlaziya. (1 Tim. 4:12) Uya kuba nesizathu sokwenene sokuvuya xa kukho umntu oba nomdla enyanisweni ngenxa yokuba wena uye ‘wakhanyisa ukukhanya kwakho’ ngehambo yakho.—Mat. 5:16.