Iintshumayelo Ezilula Nezicacileyo Zezona Ziluncedo
1 Kutheni abavakalisi abaselula bedla ngokuyithimb’ ingqalelo yabo babelana nabo ngesigidimi soBukumkani? Esinye isizathu kukuba iintshumayelo zabo zilula. Bambi abavakalisi banokuvakalelwa kukuba ukuze ube lichule lokunikela ubungqina kufuneka ube liciko. Noko ke, amava abonisa ukuba iintshumayelo ezilula nezicacileyo zezona ziluncedo.
2 UYesu washumayela uBukumkani bukaThixo ngendlela elula nengqalileyo, waza waqeqesha abafundi bakhe ukuba benze okufanayo. (Mat. 4:17; 10:5-7; Luka 10:1, 9) Wayesebenzisa iintshayelelo ezilula, imibuzo nemizekeliso ukuze athimb’ ingqalelo yabaphulaphuli bakhe nokuze afikelele iintliziyo zabo. (Yoh. 4:7-14) Senza kakuhle ngokuxelisa umzekelo wakhe size sisebenzise iintshumayelo ezilula.
3 ‘Iindaba ezilungileyo zobukumkani’ sisigidimi esisishumayelayo. (Mat. 24:14) Ukusebenzisa uBukumkani njengomxholo wakho oyintloko kuya kwenza intshumayelo yakho isoloko ilula. Thetha ngezinto ezixhalabisa abaphulaphuli bakho. Amabhinqa anomdla kakhulu kwizinto zeentsapho kunakwezobupolitika. Eyona nto ixhalabisa ubawo ngoku ngumsebenzi wakhe nokukhuseleka kwentsapho yakhe. Abantu abaselula baxhalabele ikamva labo; abantu abakhulu, bona baxhalabel’ impilo nokhuseleko lwabo. Abantu badla ngokuzixhalabela kakhulu izinto ezenzeka ekuhlaleni kunoko kwenzeka kumazwe akude. Emva kokuncokola ngezinto ezibangel’ umdla, phethulela ingqalelo kwiintsikelelo eziza kunanditshwa luluntu oluthobelayo ngaphantsi kolawulo loBukumkani bukaThixo. Amagama ambalwa alula, akhethwe kakuhle adityaniswa nesibhalo anokuba yeyona ndlela intle yokuvuselela umdla womphulaphuli.
4 Unokuqalisa Incoko Ngokuthi:
◼ “Ngokungathandabuzekiyo uyavuma ukuba uluntu luthwaxwa zizifo ezinganyangekiyo. Kodwa ngaba ubusazi ukuba uThixo uthembisa ukuba uza kuziphelisa zonke iintlobo zokugula, kuquka nokufa?” Vumela impendulo, wandule ufunde ISityhilelo 21:3, 4.
5 Ngeentshumayelo ezilula nezicacileyo, ngamana ungafikelela iingqondo neentliziyo zabantu abangakumbi kwintsimi yakho, ubancede bafunde ngoYehova nethemba lokunandipha ubomi obungunaphakade.—Yoh. 17:3.