Musani Ukusukela “Izinto Ezingenaxabiso”
1 Enye yezona ndlela zithandwayo zonxibelelwano namhlanje yiE-mail. Nangona kuyinto efanelekileyo ukunxibelelana nentsapho nabahlobo usebenzisa esi sixhobo, ziziphi “izinto ezingenaxabiso” ezinokubangelwa kukungayilawuli indlela esiyisebenzisa ngayo iE-mail?—IMize. 12:11.
2 Yilumkeleni IE-Mail: Bambi bathi baye bazive besondele gqitha kwintlangano kaYehova xa beye bafumana inkcazelo entsha kwiE-mail. Le nkcazelo inokuquka amava, izinto ezenzeka eBheteli, iingxelo zeentlekele okanye intshutshiso, kwanenkcazelo eyimfihlo yeSikolo Sobulungiseleli SoBukumkani. Abanye baye bafune ukuba ngabokuqala ukusasaza inkcazelo enjalo kubahlobo babo, ngamany’ amazwi babe ngooqal’ azive.
3 Maxa wambi kuye kwagqwethwa okanye kwabaxwa izinto. Okanye ke kwimizamo yabo yokuba nemincili xa bebalisa, abanye baye badlulisele ingcamango ephosakeleyo. Abo bangxama ngokusasaza inkcazelo enjalo badla ngokungazazi zonke izibakala. (IMize. 29:20) Kwezinye iimeko, kwanaxa loo nto ingakholeleki, ibaliswa ngendlela yokuba abantu babe nomdla. Inkcazelo engachananga okanye elahlekisa ngolo hlobo ‘ilibali lobuxoki,’ elingakhuthazi uzinikelo lokwenene lobuthixo.—1 Tim. 4:6, 7.
4 Ukuba udlulisela inkcazelo engqineka ingachananga, unetyala ngentlungu okanye ukudideka okunokubakho. Xa uDavide wabikelwa udaba olubaxiweyo lokuba bonke oonyana bakhe babulewe, ebuhlungu “wazikrazula iimpahla zakhe.” Noko ke, enyanisweni wayemnye unyana wakhe owayefile. Ewe, ukufa kwakhe kwamkhathaza, kodwa loo ngxelo ebaxiweyo yamenza waxheleka nangakumbi uDavide. (2 Sam. 13:30-33) Ngokuqinisekileyo asingethandi ukwenza nayiphi na into eya kulahlekisa okanye ityhafise abazalwana bethu.
5 Ijelo Elimiselwe NguThixo: Khumbula ukuba uBawo wethu osezulwini unejelo lonxibelelwano alimiseleyo, “ikhoboka elithembekileyo neliyingqondi.” Imbopheleleko yokugqiba ngenkcazelo ‘nangexesha elifanelekileyo’ lokuyidlulisela kwindlu yokholo inikwe elo “khoboka.” Oku kutya kokomoya kufumaneka ngentlangano yobuthixo kuphela. Ngalo lonke ixesha sifanele silindele ukufumana inkcazelo enokuthenjwa kwijelo elimiselwe nguThixo, singalindeli kwabo basebenzisa i-Internet.—Mat. 24:45.
6 Ii-Internet Web Sites: I-Internet Web site yethu yile: www.watchtower.org. Inenkcazelo eyaneleyo nelungiselelwe uwonke-wonke. Akuyomfuneko ukuba kubekho umntu, ikomiti, okanye ibandla elenza iWeb page ngamaNgqina kaYehova. Bambi baye bafaka oko kuqulethwe ziimpapasho zethu kunye nazo zonke izibhalo neembekiselo ezibonisiweyo bade basasaza imibhalo yombandela weendibano baze bacela iminikelo. Enoba senzela ingeniso okanye akunjalo, ukukhuphela nokusasaza iimpapasho zamaNgqina kaYehova nge-elektroniki kukwaphula imithetho yokushicilela. Ngoxa abanye benokuyigqala loo nto njengokunceda abazalwana, ayivumelekanga kwaye ifanele iyekwe.
7 Ukuba nengqiqo xa sisebenzisa iindlela zokunxibelelana ze-elektroniki kuya kusenza siqiniseke ukuba iingqondo zethu zizaliswa ‘zizinto ezixabisekileyo nezithandekayo zexabiso.’—IMize. 24:4.