‘Kuvulele Ithuba’
1 Ngasihlandlo sithile, xa wayethetha nabafundi bakhe ngomtshato, uYesu wathi ukuhlala ungatshatanga ‘sisiphiwo.’ Wandula ke wathi: “Lowo unako ukukuvulela ithuba makakuvulele ithuba.” (Mat. 19:10-12) Kwiminyaka ethile kamva, umpostile uPawulos wabhala ngeengenelo zokungatshati ekhuthaza abanye ukuba balandele umzekelo wakhe wokuhlala engatshatanga. (1 Kor. 7:7, 38) Abaninzi namhlanje baye ‘bakuvulela ithuba’ ukuhlala bengatshatanga yaye banandipha iingenelo zako. Ziziphi ezinye zezo ngenelo?
2 Ukukhonza ‘Ngaphandle Kokuphazanyiswa’: UPawulos waqonda ukuba ukungatshati kwakumvulela ithuba lokukhonza uYehova ‘ngaphandle kokuphazanyiswa.’ Ngokufanayo namhlanje, umzalwana ongatshatanga unokufaka isicelo sokuya kwiSikolo Sokuqeqeshela Ubulungiseleli, yaye umntu ongatshatanga ngokuqhelekileyo ngoyena ukukhululekele ngakumbi ukuba kwinkonzo yobuvulindlela, ukufunda olunye ulwimi, ukufudukela apho imfuneko inkulu khona, ukukhonza eBheteli, okanye ukufumana amanye amalungelo akhethekileyo enkonzo. Usenokuba namathuba angakumbi okwenza ufundisiso lobuqu olunentsingiselo, okucamngca nokuthandaza kuYehova ngokusuk’ entliziyweni. Ngokuqhelekileyo umntu ongatshatanga unexesha elaneleyo lokunceda abanye. Zonke ezo zinto zizisa ‘iingenelo zobuqu.’—1 Kor. 7:32-35; IZe. 20:35.
3 Ukukhonza uThixo ngaphandle kweziphazamiso kuzisa iintsikelelo. Emva kweminyaka engama-27 eseKenya, omnye udade ongatshatanga wabhala: “Ndandinabahlobo abaninzi yaye ndinomsebenzi omninzi! Sasisenza izinto kunye yaye sityelelana. . . . Ekubeni ndandingatshatanga, ndandikwazi ukusebenzisa loo nkululeko yaye ndikwazi ukuya kushumayela naphi na apho ndifuna ukuya khona, ibe oku kuye kwandonwabisa kakhulu.” Walek’ umsundulo wathi: “Kule minyaka idluleyo ubuhlobo bam noYehova buye bakhula.”
4 Kuvulele Ithuba: UYesu wathi sifanele sihlakulele isiphiwo sokungatshati “ngenxa yobukumkani bamazulu.” (Mat. 19:12) Njengaso nasiphi na isipho, ukungatshati kufanele kusetyenziswe kakuhle ukuze kuvuyise yaye kube yingenelo. Ngokusebenzisa amathuba abangelwa kukungatshati nangokwayama ngoYehova ukuze bafumane ubulumko namandla, abantu abangatshatanga abaninzi baye bakuqonda ukubaluleka kokusivulela ithuba esi siphiwo.