Yenzani Okulungileyo Nize Nabelane Nabanye
1 UDorkas “wayephuphuma zizenzo ezilungileyo nezipho zenceba.” (IZe. 9:36, 39) Umoya wakhe wesisa wamenza wathandwa ngabantu ababemazi nanguYehova uThixo. AmaHebhere 13:16 athi: “Musani ukulibala ukwenza okulungileyo nokwabelana ngezinto nabanye, kuba uThixo uyakholiswa yimibingelelo enjalo.” Sinokukwenza njani okulungileyo size sabelane nabanye namhlanje?
2 Enye indlela esinokubanceda ngayo abanye kukwabelana nabo ‘ngezinto zexabiso.’ (IMize. 3:9) Iminikelo yethu kumsebenzi wehlabathi lonke incedisa ekwakhiweni kweeHolo zoBukumkani, iiHolo zeNdibano nezakhiwo zamasebe emhlabeni wonke. Umoya wethu wesisa uye wanceda izigidi zabantu ukuba zizuze kwimfundo yobuthixo zize zibe nonxulumano olwakhayo lokomoya.
3 Thuthuzelanani: Xa kusehla intlekele, abantu bakaYehova bakulungele ‘ukwenza okulungileyo’ kubazalwana babo kwakunye nabo bangahlobananga nabo elukholweni. (Gal. 6:10) Emva kokuqhushumba komzi-mveliso wemichiza eFransi, esinye isibini esasihlala kufuphi naloo mzi-mveliso sathi: “Abazalwana bethu abangamaKristu beza kusincedisa ekucoceni indlu esihlala kuyo nezabanye kweso sakhiwo. Abamelwane bethu bamangaliswa gqitha bakubona abantu abaninzi kangaka beze kuncedisa.” Omnye udade wongezelela esithi: “Abadala basinceda kakhulu. Beza kusikhuthaza. Eneneni, yeyona nto besiyifuna le, ngaphezu koncedo lwezinto eziphathekayo.”
4 Nangona zininzi iindlela esingenza ngayo okulungileyo kubamelwane bethu, eyona ndlela enenzuzo kakhulu esinokubanceda ngayo kukwabelana nabo ngolwazi lwenyaniso, oluquka ‘ithemba lobomi obungunaphakade’ obuthenjiswe nguYehova. (Tito 1:1, 2) Isigidimi seBhayibhile sibathuthuzela ngokwenene abo bazilileyo ngenxa yeemeko ezisehlabathini nangenxa yokuba nesono. (Mat. 5:4) Ngamana singenza okulungileyo size sabelane nabanye xa sinamandla okwenjenjalo.—IMize. 3:27.