“Bangagogotyi Lutho, Balungele Ukwabelana”
1 Kwiinkulungwane ezadlulayo umpostile uPawulos wayalela uTimoti ukuba akhuthaze abo babengamakholwa kunye naye ukuba ‘benze okulungileyo, batyebe emisebenzini emihle, bangagogotyi lutho, balungele ukwabelana.’ (1 Tim. 6:18) Kwakhona uPawulos wakhumbuza amaKristu angamaHebhere ukuba angalibali “ukwenza okulungileyo nokwabelana ngezinto nabanye.” (Heb. 13:16) Kwakutheni ukuze abhale le miyalelo? Kungenxa yokuba wayesazi ukuba kwakuza kubakho “uzuko nembeko noxolo kuye wonk’ ubani owenza okulungileyo.”—Roma 2:10.
2 Ngenxa yokuba enguMdali, uYehova uThixo unguMnini-nto-zonke. (ISityhi. 4:11) Ngokuqinisekileyo siyakuxabisa oko asenzela kona ngezinto zakhe. Phezu kwako nje ukungabi nambulelo kwabantu abaninzi, Oyena Uphakamileyo uyaqhubeka ebavumela bonke ukuba bangenelwe kumalungiselelo akhe esisa okuzimasa ubomi. (Mat. 5:45) Wada wanikela ngoNyana wakhe amthandayo njengedini, ukuze sifumane ubomi obungunaphakade. Ngaba uthando esilubonisiweyo alufanele lusinyanzele ukuba sizingqine sinombulelo ngokuthi singababandezi abanye abantu?—2 Kor. 5:14, 15.
3 YIntoni Esinokwabelana Ngayo? Kuhle ukuba sisebenzise naziphi na izinto esinazo ngendlela emkholisayo uThixo. Ngokuqinisekileyo sifuna ukuxhasa umsebenzi woBukumkani owenziwa ehlabathini lonke ngokwezinto eziphathekayo nangokomoya. Kakade ke, iindaba ezilungileyo bobona butyebi bubalulekileyo nabani na anokuba nabo, kuba “zingamandla kaThixo osindiso.” (Roma 1:16) Ngokulisebenzisa kakuhle ixesha nobuncwane bethu nyanga nganye, ukuze sibe nenxaxheba kumsebenzi wokushumayela nowokufundisa, sinokukwazi ukwabelana nabanye ngobu butyebi bokomoya, obuya kubakhokelela ekubeni bafumane ubomi obungunaphakade.
4 UYehova uvuya kakhulu xa sinceda abo bangathabath’ intweni. Usithembisa ngokusisikelela, kwaye ukwasikhumbuza ukuba: “Izinto ezixabisekileyo aziyi kuba yingenelo ngemini yokuvutha komsindo, kodwa ubulungisa buya kuhlangula ekufeni.” (IMize. 11:4; 19:17) Ukuxhasa umsebenzi woBukumkani ngezinto eziphathekayo nokuba nesabelo esizeleyo ekushumayeleni iindaba ezilungileyo ziindlela ezincamisileyo esinokubonisa ngazo ukuba asigogotyi lutho ngokwenene, sikulungele ukwabelana.