Hlalani Nisakhana
1 Umpostile uPawulos wenza konke okusemandleni akhe ukuze omeleze amanye amakholwa. (IZe. 14:19-22) Nathi siyaxhalaba xa abazalwana bethu bejamelana neemeko ezinzima, kwaye sifuna ukubanceda. IBhayibhile ibonisa ukuba asingobadala kuphela abafanele babe nomdla kwabanye. (Roma 15:1, 2) Makhe siqwalasele ezi ndlela zimbini sinokusithobela ngazo esi sibongozo sothando: “Hlalani nithuthuzelana yaye nisakhana.”—1 Tes. 5:11.
2 Zazi Iintswelo Zabanye: ILizwi likaThixo lithi uDorkas “wayephuphuma zizenzo ezilungileyo nezipho zenceba.” (IZe. 9:36, 39) Wayebabona abo basweleyo aze enze konke okusemandleni ukuze abancede. Ungumzekelo omhle ngokwenene esifanele nathi siwuxelise. Usenokufumanisa ukuba kukho ixhego okanye ixhegokazi elingathanda ukulandwa ngemoto ukuze liye kwiintlanganiso. Okanye ke kukho uvulindlela oswele umntu anokusebenza naye entsimini ngemva kwemini ethile phakathi evekini. Ukuba uyayibona intswelo uze uncede, khawuthelekelele nje indlela aya kukhuthazeka ngayo loo mntu umncedileyo!
3 Incoko Eyakhayo Ngokomoya: Sinokubakha abanye nangendlela esithetha ngayo nabo. (Efe. 4:29) Omnye umdala onamava wathi: “Ukuba ufuna ukuba lukhuthazo, ncokola ngezinto zokomoya. Ukuze uqalise incoko eyakhayo, unokubuza umbuzo olula nje, njengothi, ‘Wayifumana njani inyaniso?’” Yiba nomdla onyanisekileyo kulutsha ebandleni. Zama ukufikelela kwabo badimazekileyo nabasenokuba baneentloni. (IMize. 12:25) Mus’ ukuvumela ukuncokola ngeendlela zokuzonwabisa zeli hlabathi zithabathe indawo yokuncokola ngezinto zokomoya namanye amakholwa.—Roma 1:11, 12.
4 Noko ke, yintoni onokuncokola ngayo ukuze wakhe abanye? Xa ubufunda iBhayibhile kutshanje, ngaba kukho umgaqo othile oye wawufumana noye wakwenza wamthanda nangakumbi uYehova? Ngaba ikho into ekuchukumisileyo kwintetho yesidlangalala okanye kwiSifundo seMboniselo? Okanye ngaba intliziyo yakho iye yachukunyiswa ngamava omelez’ ukholo? Ukuba uyazixabisa ezi zinto zokomoya zibalulekileyo, uya kusoloko unento onokubakhuthaza ngayo abanye.—IMize. 2:1; Luka 6:45.
5 Ngamana singaqhubeka sisakhana ngokunceda abantu nangokulusebenzisa ngobulumko ulwimi lwethu.—IMize. 12:18.