Yenza Kubekho Uxolo Ngokungabi Nomona

1. Yintoni eyenzeka kwintsapho kaYakobi ngenxa yomona?

UYAKOBI wayebathanda bonke oonyana bakhe, kodwa oyena wayemthanda kakhulu yayinguYosefu, owayeneminyaka eyi-17. Yintoni eyenzeka koobhuti bakaYosefu ngenxa yaloo nto? Bammonela, ibe loo nto yabenza bamcaphukela. Babengenasizathu sakumcaphukela, kuba uYosefu wayengenzanga nto. Nangona kunjalo, bamthengisa ebukhobokeni baza baqhatha uYakobi besithi unyana wakhe amthandayo ubulewe sisilwanyana sasendle. Ngenxa yokuba nomona, benza alwabikho uxolo kwintsapho yabo baza bamkhathaza kakhulu utata wabo.—Gen. 37:3, 4, 27-34.

2. AmaGalati 5:19-21 athi kutheni kuyinto embi ukuba nomona?

² Umonab yenye yezinto iBhayibhile ethi ‘zizinto ezenziwa ngumzimba’ nezinokwenza umntu angabufumani uBukumkani BukaThixo. (Funda amaGalati 5:19-21.) Umona udla ngokubangela abantu baxabane.

3. Siza kuthetha ngantoni kweli nqaku?

³ Into eyenziwa ngoobhuti bakaYosefu ibonisa ukuba umona unokwenza abantu bayeke ukuvana luze lungabikho uxolo olwalukade lukhona entsatsheni. Asinakuyenza le nto yenziwa ngoobhuti bakaYosefu, kodwa ke sonke sineentliziyo ezingafezekanga neziqhathayo. (Yer. 17:9) Yiloo nto sisenokuba nomona ngamanye amaxesha. Makhe sithethe ngemizekelo eseBhayibhileni eza kusinceda sibone izinto ezinokusenza sibe nomona. Emva koko, siza kuthetha ngezinto esinokuzenza ukuze siyeke ukuba nomona size senze kubekho uxolo.

IZINTO EZINOKWENZA ABANTU BABE NOMONA

4. Kwakutheni ukuze amaFilisti ammonele uIsake?

⁴ Xa omnye umntu enemali. UIsake wayesisityebi, ibe amaFilisti ammonela. (Gen. 26:12-14) Ade avala ngomhlaba amaqula kaIsake ukuze imfuyo yakhe ingabi nandawo yokusela. (Gen. 26:15, 16, 27) Njengala maFilisti, abanye abantu namhlanje bayabamonela abantu abanemali ukodlula bona. Abafuni nje ukuba nezo zinto banazo, kodwa bafuna abo bantu bangabi nazo.

5. Kwakutheni ukuze iinkokheli zonqulo zimmonele uYesu?

⁵ Xa omnye umntu ethandwa ngabantu. Iinkokheli zonqulo ezingamaYuda zazimmonela uYesu kuba ethandwa ngabantu. (Mat. 7:28, 29) UYesu wayengummeli kaThixo, ibe wayefundisa inyaniso. Kodwa ezi nkokheli zonqulo zahamba zixoka ngoYesu ukuze zirhuqel’ igama lakhe edakeni. (Marko 15:10; Yoh. 11:47, 48; 12:12, 13, 19) Sifunda ntoni thina? Simele siqiniseke ukuba asibamoneli abazalwana noodade abathandwayo ebandleni kuba beneempawu ezintle. Endaweni yokuba sibamonele, simele sibalinganise.—1 Kor. 11:1; 3 Yoh. 11.

6. Yintoni ebonisa ukuba uDiyotrefe wayenomona?

⁶ Xa omnye umntu esetyenziswa ebandleni. Ngexesha labapostile, uDiyotrefe wayebamonela abazalwana ababekhokela ebandleni lamaKristu. ‘Wayezigqatsa,’ ibe wahamba ethetha kakubi ngompostile uYohane nangabazalwana abakhokelayo ukuze bangahlonitshwa ngabanye abazalwana noodade. (3 Yoh. 9, 10) Nangona singenakuyenza le nto yenziwa nguDiyotrefe, nathi sinokubamonela abazalwana noodade xa befumana umsebenzi ebesiwufuna ebandleni. Sinokubamonela kakhulu xa sicinga ukuba nathi besinokuwenza kakuhle loo msebenzi okanye besingawenza bhetele kunabo.

7. Yintoni enokwenzeka kuthi xa sinomona?

⁷ Umona ufana nokhula. Xa umona uqalile ukukhula ezintliziyweni zethu, kusenokuba nzima ukuyeka ukuba nawo. Xa sinekratshi naxa sizicingela sodwa, umona usenokuqatsela. Njengokuba ukhula lunokwenza isityalo singakhuli, umona unokusenza singabi nazo iimpawu ezintle ezinjengothando, ukucingela abanye abantu nobubele. Ukuba sibona ukuba umona uqalisa ukukhula ezintliziyweni zethu, simele sikhawuleze siwuncothule kanye njengokhula. Singayenza njani loo nto?

THOBEKA UZE WANELISEKE

8. Zeziphi iimpawu ezinokusinceda siyeke ukuba nomona?

⁸ Sinokuyeka ukuba nomona xa sizama ukuthobeka size saneliseke. Xa sinezi mpawu, asizukuba nomona. Xa sithobekile, asizukucinga ukuba sibhetele kunabanye abantu. Umntu othobekileyo akacingi ukuba umele abe nezinto ezingaphezu kwezabanye abantu. (Gal. 6:3, 4) Umntu owanelisekileyo wonela zizinto anazo ibe akazithelekisi nabanye abantu. (1 Tim. 6:7, 8) Xa umntu othobekileyo nowanelisekileyo ebona omnye umntu efumana into entle, uvuyisana naye.

9. AmaGalati 5:16 namaFilipi 2:3, 4 athi umoya oyingcwele unokusinceda senze ntoni?

⁹ Umoya oyingcwele kaThixo unokusinceda siyeke ukuba nomona, sithobeke size saneliseke. (Funda amaGalati 5:16 namaFilipi 2:3, 4.) Unokusinceda sizazi nezona zinto sizicingayo nezizathu zokuba senze izinto esizenzayo. Xa sincedwa nguThixo, sinokuyeka ukucinga izinto ezimbi size sicinge ezakhayo. (INdu. 26:2; 51:10) UMoses noPawulos zange babe nomona nangona izinto ezazisenzeka zazinokubenza babe nawo. Kwenzeka ntoni? Makhe sive.

10. Yintoni eyayinokwenza uMoses abe nomona? (Jonga umfanekiso ongaphandle.)

¹⁰ UMoses wayenegunya phakathi kwabantu bakaThixo, kodwa akazange abamonele abanye abantu aze enze izinto ukuze bangalifumani elo gunya. Ngokomzekelo, uYehova wakha wathatha intwana yomoya oyingcwele kuMoses waza wawunika abadala bakwaSirayeli ababemi kufutshane nentente yokuhlangana. Emva koko, uMoses weva ukuba kukho nabanye abadala ababini abangakhange baye ententeni kodwa abafumene umoya oyingcwele nabaprofetayo. Wathini xa uYoshuwa wathi makabanqande aba badala babini? UMoses akazange abe nomona kuba uYehova esebenzisa aba badala babini, kodwa wavuyisana nabo. (Num. 11:24-29) Yintoni esinokuyifunda kuMoses?

11. Abadala banokufunda ntoni kuMoses?

¹¹ Ukuba ungumdala, ngaba wakha wacelwa ukuba ufundise omnye umntu umsebenzi owuthanda kakhulu? Ngokomzekelo, mhlawumbi uyakuthanda ukuqhuba iMboniselo qho ngeveki. Kodwa ukuba uthobeke njengoMoses, awunakucinga ukuba awubalulekanga xa ucelwa ukuba ufundise omnye umzalwana ukuze ekuhambeni kwexesha ibe nguye oyiqhubayo. Uza kukuvuyela ukumnceda.

12. Abazalwana noodade abaninzi namhlanje babonisa njani ukuba bathobekile ibe banelisekile?

¹² Nantsi enye into edla ngokuba yingxaki kubazalwana abaninzi abasele bekhulile. Abanye bebengabanxibelelanisi bequmrhu labadala kangangeminyaka. Kodwa xa besiba neminyaka eyi-80, ababi nangxaki xa kufuneka bayeke ukuba ngabanxibelelanisi. Xa abaveleli besiphaluka besiba neminyaka eyi-70, baye bayeke ukuba ngabaveleli baze kuba bethobekile bavume ukusetyenziswa yintlangano ngenye indlela. Kwakhona, kule minyaka imbalwa idlulileyo, abazalwana noodade abaninzi ababekhonza eBheteli baye benza eminye imisebenzi entsimini. Aba bazalwana noodade ababacaphukeli abo benza imisebenzi ababekade beyenza.

13. Yintoni eyayinokwenza uPawulos abamonele abapostile abayi-12?

¹³ Umpostile uPawulos ngomnye umntu esinokufunda kuye ukwanela nokuthobeka. UPawulos wayengenamona. Wayesebenza nzima entsimini, kodwa kuba ethobekile wathi: “Ndingoyena uphantsi kubapostile, yaye andikufanelekelanga ukubizwa ngokuba ndingumpostile.” (1 Kor. 15:9, 10) Abapostile abayi-12 babekunye noYesu xa wayelapha emhlabeni, kodwa uPawulos waba ngumKristu emva kokuba uYesu evusiwe. Nangona waba ‘ngumpostile othunywe ezintlangeni,’ wayengakufanelekeli ukuba ngomnye wabapostile abayi-12. (Roma 11:13; IZe. 1:21-26) Akazange abamonele aba bapostile, kodwa woneliswa zizinto awayezenza.

14. Siza kwenza ntoni xa sanelisekile ibe sithobekile?

¹⁴ Ukuba sanelisekile ibe sithobekile, siza kuba njengoPawulos size sibathobele abantu abanikwe igunya nguYehova. (IZe. 21:20-26) Ukhethe abadala ukuba bakhokele emabandleni. Nangona bengafezekanga, uYehova uthi ‘bazizipho ezingabantu.’ (Efe. 4:8, 11) Xa sibathobela abadala siye sisondele kuYehova, ibe loo nto yenza kubekho uxolo phakathi kwethu nabanye abazalwana noodade.

‘ZIMISELE UKWENZA NANTONI NA EYENZA KUBEKHO UXOLO’

15. Yintoni esingamele siyenze?

¹⁵ Uxolo nomona azidibani. Simele singabi nomona okanye senze abanye abantu babe nomona. Ukwenza ezi zinto zibalulekileyo kuza kusinceda sithobele umyalelo kaYehova othi: “Masizimisele ukwenza nantoni na eyenza kubekho uxolo neyakhayo.” (Roma 14:19) Sinokwenza njani ukuze sincede abanye abantu bangabi nomona kuze kubekho uxolo?

16. Sinokwenza njani ukuze abanye abantu bangasimoneli?

¹⁶ Izinto esizenzayo nendlela esizenza ngayo zinokwenza abanye abantu benze izinto ezimbi okanye ezintle. Abantu beli hlabathi bafuna ‘siqhayise’ ngezinto esinazo. (1 Yoh. 2:16) Kodwa loo nto yenza abantu babe nomona. Sinokwenza abanye abantu bangasimoneli ukuba asisoloko sithetha ngezinto esinazo okanye esifuna ukuzithenga. Enye into esimele siyenze ukuze abantu bangasimoneli kukuthobeka xa sinemisebenzi esiyenzayo ebandleni. Ukuba sisoloko sithetha ngayo, sinokwenza abanye abantu basimonele. Kodwa ukuba sinomdla kwizinto ezenziwa ngabanye abantu size siziqaphele izinto abazenzayo, siza kubanceda baneliseke, kubekho uxolo ebandleni baze abazalwana noodade bamanyane.

17. Kwenzeka ntoni kwintsapho kaYakobi, ibe loo nto yabangelwa yintoni?

¹⁷ Sinokukwazi ukuyeka ukuba nomona. Makhe siphinde sithethe ngoobhuti bakaYosefu. Emva kokuba kudlule iminyaka bemthengisile uYosefu, badibana naye eYiputa. Ngaphambi kokuba uYosefu aziveze kubo, wazama ukubona ukuba batshintshile na. Wabalungiselela ukutya waza wahoya kakhulu umntakwabo omncinci, uBhenjamin kunabanye. (Gen. 43:33, 34) Kodwa akukho nto ibonisa ukuba oobhuti bakhe bammonela uBhenjamin. Kodwa bamcingela yena notata wabo, uYakobi. (Gen. 44:30-34) Kwaphinda kwabakho uxolo kwintsapho kaYakobi kuba oobhuti bakaYosefu babeyekile ukuba nomona. (Gen. 45:4, 15) Nathi, ukuba siyawuncothula umona ezintliziyweni zethu, kuza kubakho uxolo kwiintsapho nakumabandla esikuwo.

18. UYakobi 3:17, 18 uthi yintoni eza kwenzeka xa siqiniseka ukuba kukho uxolo kwiindawo esikuzo?

¹⁸ UYehova ufuna sizame ngamandla ukuba singabi nomona size sibe seluxolweni. Eli nqaku lisibonisile ukuba kukho izinto ezinokusenza sibe nomona. (Yak. 4:5) Nabantu esiphila phakathi kwabo banokusenza sibe nomona. Kodwa asizukuba nawo ukuba sithobekile ibe sanelisekile zizinto esinazo. Siza kuqiniseka ukuba kukho uxolo kwiindawo esikuzo ibe loo nto iza kusinceda sibe neempawu ezintle.—Funda uYakobi 3:17, 18.