Umntu Onomona
KULWIMI lwesiHebhere linye kuphela igama elibhekisela kwelithi “ikhwele.” Xa kubhekiselwa kubantu abanesono, isiHebhere sisenokuguqulelwa ngokuthi “umona” okanye “usukuzwano.” (Genesis 26:14; INtshumayeli 4:4, NW) Noko ke, ulwimi lwesiGrike lunamagama aliqela abhekisela “kwikhwele.” Igama elithi zeʹlos, njengegama lesiHebhere elifana nalo, lisenokubhekisela kwikhwele elilungileyo nakwelibangelwa sisono. Elinye igama lesiGrike elithi, phthoʹnos, libhekisela kwikhwele elisisono kuphela. KwiNew World Translation, lisoloko liguqulelwa ngokuthi “umona.”
Lalisetyenziswa njani igama elithi phthoʹnos kwisiGrike samandulo? IThe Anchor Bible Dictionary ithi: “Ngokwahlukileyo kumntu obawayo, umntu ophenjelelwa yiphthonos eneneni akazinqweneli izinto angathandiyo ukuba omnye abe nazo; kuphela nje akafuni ukuba abe nazo. Wahlukile kumntu onomoya wokhuphiswano kuba injongo yakhe, ngokwahlukileyo kweyomntu onomoya wokhuphiswano, ayikokuphumelela kodwa kukuthintela abanye bangaphumeleli.”
Ngokufuthi umntu onomona akayiqondi into yokuba sisimo sakhe sengqondo esingunobangela oyintloko weengxaki zakhe. Kwaesi sichazi-magama siyachaza: “Enye yezinto ahluke ngazo umntu ophenjelelwa yiphthonos, kukungabi nazintloni. Ukuba umntu ophenjelelwa yiphthonos, uyacelwa ukuba athethelele ihambo yakhe, uya kusoloko ezixelela yaye ebaxelela nabanye ukuba abo abaphatha kakubi bakufanele oko yaye kukungabikho kokusesikweni okumenza abahlabe amadlala. Ukuba uyabuzwa ukuba uyenza njani into yokuthetha ngomhlobo wakhe kakubi, uya kuthi umhlobo wakhe umhlaba amadlala kuba emthanda.”
Ababhali beencwadi zeVangeli uMateyu noMarko basebenzisa igama lesiGrike elithi phthoʹnos ukuchaza intshukumisa yabo babekek’ ityala ngokufa kukaYesu. (Mateyu 27:18; Marko 15:10) Ewe, babeqhutywa ngumona. Kwale mvakalelo iyingozi iye yabangela ukuba abawexuki babathiye ngokukrakra abo babesakuba ngabazalwana babo. (1 Timoti 6:3-5) Ayimangalisi into yokuba abantu abanomona bengavunyelwa ukuba bangene eBukumkanini bukaThixo! UYehova uThixo uwise umthetho wokuba bonke abaqhubeka ‘bezele umona bafanelwe kukufa.’—Roma 1:29, 32; Galati 5:21.
[Imifanekiso ekwiphepha 7]
Musa ukuvumela umona wonakalise ubomi bakho