Lisike Uze Uligcine
Iindlela Ezingama-20 Zokuzenzela Ixesha Elingakumbi
“Qhubekani nihamba ngobulumko . . . , nizongela ixesha.”—Kolose 4:5.
EMVA kokuba wazile ukuba usuku lwakho uza kulichitha usenza ntoni, ucelomngeni kukuba ungathi nje uza kuphumelela kodwa umele uzenze ezo zinto. La macebiso alandelayo anokukunceda wenjenjalo.
1 ZIBHALE PHANTSI IZINTO OMELE UZENZE SUKU NGALUNYE. Zibhale ngokulandelelana kwazo nangendlela oza kuzenza ngayo. Phawula ezo uza kuchitha ixesha elingakumbi uzenza. Beka uphawu kwezo ugqibileyo ukuzenza. Zibekele usuku olulandelayo ezo ungakwazanga ukuzenza.
2 QINISEKA UKUBA IIKHALENDA ZAKHO ZINENKCAZELO EFANAYO. Ungazifak’ enkathazweni yokuba uphoswe lidinga ngenxa yokuba nje ulibele ukulibhala kwenye ikhalenda yakho. Ukuba unekhalenda kwikhompyutha yakho nakwesinye isixhobo sombane qiniseka ukuba inkcazelo ekuzo iyafana.
3 BHALA UCWANGCISO “LWENDLELA OZA KUZENZA” NGAYO, uze uzifake zonke iinkcukacha ezibandakanyekileyo ngokulandelelana kwazo.
4 ZIBEKE KUQALA EZONA ZINTO ZIBALULEKILEYO. Kuza kuba lula ukuba uzenze nezinye izinto.
5 ZIBEKELE USUKELO OZA KULUFIKELELA. Unokukwazi ukuphucula ubuchule bakho emsebenzini kunokuba ufune ukuba ngumphathi wenkampani yakho.
6 YAZI INTO YOKUBA AKUNAKUZE UBE NALO IXESHA LOKWENZA YONK’ INTO. Khetha ukwenza izinto eziza kuthi xa uzenzile kubekho okuthile okufezileyo. Kuthekani ngezinye izinto ezifun’ ukwenziwa ngokukhawuleza okanye ezo kunyanzelekileyo ukuba zenziwe? Ukuba akukwazi ukungazenzi, zidlulisele kwabanye abantu, okanye ubone enoba akunakulinciphisa ixesha olichitha uzenza. Ezinye izinto ezingabalulekanga zinokulinda iinyanga ukuba kunokwenzeka okanye kungabi yomfuneko ukuba uzenze. Ixesha lakho elininzi lichithe usenza izinto ezibalulekileyo nezo zihambisana nosukelo lwakho.
7 LIBHALE PHANTSI IXESHA OZA KULISEBENZISA USENZA INTO ETHILE. Ukuze uyiqonde indlela olisebenzisa ngayo ixesha, umele ubhale ixesha olichitha usenza izinto zakho ngeveki okanye ezimbini. Ngaba uchitha ixesha elininzi usenza izinto ezingabalulekanga? Ngaba usoloko uphazanyiswa ngumntu omnye okanye ababini? Ngaba udla ngokuphazamiseka ngexesha elithile ebudeni bosuku okanye beveki? Ziyeke izinto ezikuphazamisayo.
8 YIBA NOCWANGCISO LWEZINTO EZIMBALWA. Ukuba uceba ukuthenga ukutya, ukulungisa imoto, ukonwabisa abahlobo bakho, ukubukela imovie uze uphinde ufune ukufunda—uzenze zonke ngosuku olunye—uza kugxabhagxabhisa uze ungakuthandi ukuzenza.
9 ZINCIPHISE IZINTO EZIPHAZAMISAYO. Bekela bucala ixesha ongazi kuphazanyiswa ngalo ngaphandle kokuba kukho into ebalulekileyo. Ukuba kunokwenzeka yicime ifowuni yakho ngelo xesha. Kwakhona yicime imiyalezo ekukhumbuzayo enokukuphazamisa kwizinto ozenzayo.
10 CWANGCISA UKWENZA OWONA MSEBENZI UNZIMA NGEXESHA ONAMANDLA NGALO.
11 KHAWULEZA UWENZE UMSEBENZI ONGATHANDI UKUWENZA. Wakuba uwugqibile usala unamandla okwenza naleyo ingabalulekanga kangako.
12 BEKELA BUCALA IXESHA LOKWENZA IZINTO OBUNGAZILINDELANGA. Xa usazi ukuba uza kuthabatha imizuzu eli-15 ukuba ufike endaweni ethile, yithi uza kufika emva kwemizuzu engama-25. Xa ucinga ukuba idinga lakho liza kuthabatha iyure, bekela bucala iyure nemizuzu engama-20. Bekela bucala ixesha ongazi kwenza nto ngalo.
13 LISEBENZISE IXESHA ELIPHAKATHI KWEMISEBENZI OCWANGCISE UKUBA UZA KUYENZA. Phulaphula iindaba okanye into erekhodiweyo ngoxa ucheba iindevu. Funda ngoxa ulinde uloliwe okanye ukhwele kuye. Okanye ke unokulisebenzisela ukuphumla elo xesha. Kodwa ungadlali ngalo uze emva koko uzisole.
14 SEBENZISA UMGAQO WE-80/20.a Ngaba kukho izinto ezi-2 ezibalulekileyo kwezili-10 obucebe ukuba uza kuzenza? Ngaba kukho eziza kuzenzekela xa uye wanikela ingqalelo kwezo zibalulekileyo kuphela?
15 XA UZIVA UXINEKILE NGENXA YOMSEBENZI, zibhale phantsi zonke izinto ofuna ukuzenza. Zahlulahlule kubekho ezo uza kuziphawula ngokuba “Uza Kuzenza Namhlanje” nezo uza kuziphawula njengezo “Uza Kuzenza Ngomso.” Yenza okufanayo nangosuku olulandelayo.
16 ZIPHE ITHUBA LOKUZIHLAZIYA. Ukubuyela emsebenzini uhlaziyekile engqondweni nasemzimbeni kunokukunceda ngaphezu kokuba usebenze ixesha elongezelelekileyo.
17 ZIBHALE PHANTSI ZONKE IZINTO OZICINGAYO. Yibhale phantsi ingxaki onayo, uchaze isizathu sokuba ikuphazamisa noludwe lwezinto ocinga ukuba zingayicombulula.
18 MUSA UKUFUNA UKUBA YONKE INTO IHAMBE KAKUHLE. Lazi ixesha lokuyeka uze uqale enye into ebalulekileyo.
19 SEBENZA NGOBUCHULE. Musa ukulinda ude ube nomdla wokusebenza. Sebenza.
20 YIBA BHETYEBHETYE. La ngamacebiso nje kuphela akayiyo imigaqo onyanzelekileyo ukuba uyilandele. Khangela ezinye iindlela zokuphumeza oko ufuna ukukwenza uze uzenze zihambelane nemeko okuyo kunye neemfuno zakho.
[Umbhalo osemazantsi]
a Lo mgaqo uthiywe ngoPareto yaye usekelwe kwindlela esasisebenza ngayo isazi ngezoqoqosho saseItali uVilfredo Pareto ngenkulungwane ye-19. Usebenza njalo kuba waphawula ukuba ama-80 ekhulwini ezinto oziphumezileyo abangelwa ngama-20 ekhulwini emigudu oyenzileyo. Usebenza kwizinto ezininzi, kodwa nanku umzekelo olula: Xa utshayela, ama-80 ekhulwini okungcola okubuthayo kuvela kuma-20 ekhulwini endawo obutshayela kuyo, ndawo leyo ekudla ngokuhanjwa kuyo amaxesha amaninzi.