Abashumayeli Beendaba Ezilungileyo

UYEHOVA wasinika umzekelo ogqibeleleyo esinokuwulandela, uNyana wakhe, uYesu Kristu. (1 Pet. 2:21) Xa umntu esiba ngumlandeli kaYesu, ushumayela iindaba ezilungileyo njengomnye wabakhonzi bakaThixo. Ebonisa ukuba lo msebenzi wawuza kuhlaziya, uYesu wathi: “Yizani kum, nonke nina nibulalekayo nenisindwa ngumthwalo, ndiza kunihlaziya. Thathani idyokhwe yam nize nifunde kum, kuba ndizolile, ndithobekile, ibe niza kuhlaziyeka.” (Mat. 11:28, 29) Bonke abaye basamkela esi simemo abakhange baphoxeke.

² NjengoMlungiseleli Oyintloko kaThixo, uYesu wabiza abathile ukuba babe ngabalandeli bakhe. (Mat. 9:9; Yoh. 1:43) Wabaqeqeshela intsimi waza wabathuma ukuba bayokwenza umsebenzi awayewenza. (Mat. 10:1–11:1; 20:28; Luka 4:43) Kamva, wathumela nabanye abayi-70 ukuba bayokushumayela iindaba ezilungileyo zoBukumkani BukaThixo. (Luka 10:1, 8-11) Xa uYesu wayethumela abafundi bakhe, wathi kubo: “Lowo unimamelayo umamela mna. Nalowo unganimameliyo akamameli mna. Ngaphezu koko, nabani na ongandimameliyo, akamameli lowo undithumileyo.” (Luka 10:16) Ngale ndlela, uYesu wayebethelela ukubaluleka komsebenzi owawunikwe abafundi. Babeza kumela uYesu nOyena Thixo Uphakamileyo! Kwakuza kubanjalo nanamhlanje kuye wonke umntu osamkelayo isimemo sikaYesu esithi: “Uze kum, ube ngumlandeli wam.” (Luka 18:22; 2 Kor. 2:17) UThixo uthuma bonke abo basamkelayo esi simemo ukuba bashumayele iindaba ezilungileyo ezingoBukumkani kwaye benze abafundi.​—Mat. 24:14; 28:19, 20.

³ Ekubeni siye sasamkela isimemo sikaYesu sokuba simlandele, sisikelelwe ‘ngokwazi’ uYehova uThixo noYesu Kristu. (Yoh. 17:3) Siye safundiswa iindlela zikaYehova. Uye wasinceda sakwazi ukutshintsha iindlela ebesicinga ngazo, satshintsha ubuntu bethu kwaye mihla le senza izinto ngokuvisisana nemilinganiselo kaYehova yobulungisa. (Roma 12:1, 2; Efe. 4:22-24; Kol. 3:9, 10) Umbulelo onzulu esinawo uye wasenza sazinikela kuYehova saza sabhaptizwa emanzini. Ukubhaptizwa kwethu kuthetha ukuba simiselwe njengabakhonzi bakaThixo.

⁴ Ungaze ulibale ukuba inkonzo kaThixo imele yenziwe ngezandla ezimsulwa nangentliziyo ecocekileyo. (INdu. 24:3, 4; Isa. 52:11; 2 Kor. 6:14–7:1) Siye saba nesazela esicocekileyo ngenxa yokuba nokholo kuYesu Kristu. (Heb. 10:19-23, 35, 36; ISityhi. 7:9, 10, 14) Umpostile uPawulos wabongoza amaKristu ukuba enze zonke izinto ukuze kuzukiswe uThixo nokuze angakhubekisi abanye. Umpostile uPetros yena wathi ukuziphatha kakuhle kunokwenza abantu abangakholwayo basondele enyanisweni. (1 Kor. 10:31, 33; 1 Pet. 3:1) Unokumnceda njani umntu ukuba afanelekele ukuba ngumshumayeli weendaba ezilungileyo?

ABAVAKALISI ABATSHA

⁵ Uqala nje ukuqhuba isifundo seBhayibhile nomntu onomdla, mkhuthaze ukuba athethe nabanye ngezinto azifunde eBhayibhileni. Unokumkhuthaza ukuba athethe nezalamane, abahlobo, abantu asebenza nabo kunye nabanye nanini na ithuba livuma. Ibalulekile le nto xa ufundisa abantu ukuba balandele uYesu Kristu njengabashumayeli beendaba ezilungileyo. (Mat. 9:9; Luka 6:40) Njengoko ukholo lomntu omfundelayo luye lusomelela kwaye esiba nobuchule obungakumbi bokushumayela nanini na ithuba livuma, ngokuqinisekileyo uza kunqwenela ukuya entsimini nebandla.

UKUFANELEKELA UKUBA NGUMVAKALISI

⁶ Ngaphambi kokuba umeme umntu ukuba aqalise ukuya entsimini, kukho iimfaneleko ofanele uqiniseke ukuba unazo. Umntu oya nathi entsimini, uzazisa ekuhleni ukuba uliNgqina LikaYehova. Ngoko waziwa njengomntu osele ephila ngemilinganiselo kaYehova yobulungisa kwaye unokuba ngumvakalisi ongabhaptizwanga.

⁷ Njengoko ufundisisa nomntu kwaye nixubusha imigaqo yeBhayibhile, uye uzazi iimeko zakhe. Unokubona xa ezenza izinto azifunda eBhayibhileni. Kodwa ke kukho imibuzo abadala abaza kufuna ukumbuza yona ngobomi bakhe, ukhona nawe.

⁸ Umnxibelelanisi wequmrhu labadala uza kucela abadala ababini (omnye wabo okwikomiti yenkonzo) ukuba bathethe nawe nesifundo sakho ngezi zinto. Kumabandla anabadala abambalwa, le nto inokwenziwa ngumdala kunye nesicaka solungiselelo esifanelekayo. Abo bazalwana baceliweyo bafanele bangalibazisi ukwenza oku. Ukuba baye baxelelwa ezintlanganisweni, basenokuthetha nawe kunye nesifundo sakho emva kweentlanganiso. Bafanele bamenze akhululeke. Ngaphambi kokuba afanelekele ukuba ngumvakalisi ongabhaptizwanga, abadala bafanele baqiniseke ngezi zinto:

1. (1) Uyakholelwa ukuba iBhayibhile iliLizwi LikaThixo.​—2 Tim. 3:16.

2. (2) Uyazazi kwaye uyazikholelwa iimfundiso ezisisiseko zeZibhalo ukuze xa ebuzwa, akwazi ukuphendula ngokuvisisana neBhayibhile, kungekhona iimfundiso zeenkonzo zobuxoki okanye izinto ezicingwa nguye.​—Mat. 7:21-23; 2 Tim. 2:15.

3. (3) UyawuthobeIa umyalelo weBhayibhile wokudibana kunye nabantu bakaYehova kwiintlanganiso zebandla ukuba iimeko ziyamvumela.​—INdu. 122:1; Heb. 10:24, 25.

4. (4) Uyakwazi oko kufundiswa yiBhayibhile ngokuziphatha kakubi ngesondo, kuquka ukukrexeza, isithembu, ukulala kwendoda nenye indoda, okanye kwebhinqa nelinye ibhinqa, kwaye uphila ngokuvisisana nezo mfundiso. Ukuba uhlala nomntu wesini esahlukileyo angazalaniyo naye, bamele ukuba babe batshate ngokusemthethweni.​—Mat. 19:9; 1 Kor. 6:9, 10; 1 Tim. 3:2, 12; Heb. 13:4.

5. (5) Uyawuthobela umthetho weBhayibhile owalela ubunxila kwaye akawasebenzisi amayeza aziziyobisi okanye anokumenza ikhoboka lawo ngaphandle kwa xa enyangwa.​—2 Kor. 7:1; Efe. 5:18; 1 Pet. 4:3, 4.

6. (6) Uyakubona ukubaluleka kokuphepha abahlobo abangalunganga.​—1 Kor. 15:33.

7. (7) Uye wayeka ukuba lilungu leenkonzo zobuxoki ebekhe wazihamba ngaphambili. Uyekile ukuya kuzo, ukuxhasa okanye ukwenza izinto zazo.​—2 Kor. 6:14-18; ISityhi. 18:4.

8. (8) Uphume waphela kwiipolitiki zeli hlabathi.—Yoh. 6:15; 15:19; Yak. 1:27.

9. (9) Uyakukholelwa oko kuthethwa kuIsaya 2:4 ngemicimbi yeentlanga, kwaye uphila ngokuvisisana nako.

10. (10) Ukufuna nyhani ukuba liNgqina LikaYehova.​—INdu. 110:3.

⁹ Ukuba abadala abaqinisekanga ngendlela umfundi avakalelwa ngayo ngezinye zezi zinto, bafanele bathethe naye ngazo, mhlawumbi besebenzisa izibhalo eziboniswe apha. Kubalulekile ukuba azi ukuba abo basebenza kunye namaNgqina KaYehova kumsebenzi wokushumayela bamele baphile ngendlela engqinelana neemfaneleko ezichazwa ziZibhalo. Iimpendulo zakhe ziya kunceda abadala baqonde enoba uyakwazi na oko kulindeleke kuye nokuba ufaneleka ngokusengqiqweni na ukuba aqalise entsimini.

¹⁰ Ukuba uyafaneleka, abadala bafanele bamxelele ngoko nangoko. Amaxesha amaninzi, banokumxelela emva kokuxubusha naye. Ukuba uyafaneleka, abadala banokumamkela ngobubele njengomvakalisi. (Roma 15:7) Ufanele akhuthazwe ukuba aqalise ukuya entsimini ngokukhawuleza kwaye afake ingxelo yentsimi ekupheleni kwenyanga. Abadala banokumcacisela ukuba xa efaneleka njengomvakalisi ongabhaptizwanga kwaye efaka ingxelo okokuqala, uye enzelwe iNgxelo Yomvakalisi Webandla ize igcinwe kwifayile yebandla. Abadala bayayigcina le ngxelo ukuze intlangano ikwazi ukunyamekela imisebenzi eyenziwa ngamaNgqina KaYehova ehlabathini lonke. Umvakalisi utsho akwazi ukwenza izinto ezenziwa ngabavakalisi baze nabadala bakwazi ukumnceda kumsebenzi wokushumayela. Banokumkhumbuza ukuba inkcazelo yakhe yobuqu iza kusetyenziswa ngendlela echazwe kwiGlobal Data Protection Policy yamaNgqina KaYehova ekufumaneka ku-jw.org.

¹¹ Ukuqhelana naloo mvakalisi mtsha nokuba nomdla kwizinto azenzayo ebandleni kunokumkhuthaza. Kunokumenza afake ingxelo yentsimi qho ngenyanga aze azimisele ngakumbi ukukhonza uYehova.—Fil. 2:4; Heb. 13:2.

¹² Bakuba abadala befikelele kwisigqibo sokuba umfundi weBhayibhile uyafaneleka ukuya entsimini, unikwa eyakhe incwadi ethi Ukwenza Ukuthanda KukaYehova Ngolungelelwano. Emva kokuba efake ingxelo yentsimi okokuqala, kuza kwenziwa isaziso esifutshane ebandleni, kuchazwe ukuba ungumvakalisi omtsha ongabhaptizwanga.

UKUNCEDA ABANTWANA

¹³ Nabantwana banokufaneleka njengabavakalisi beendaba ezilungileyo. UYesu wabamkela abantwana waza wabasikelela. (Mat. 19:13-15; 21:15, 16) Nangona ubukhulu becala ingumsebenzi wabazali ukufundisa abantwana babo, nabanye ebandleni bangabanceda abantwana abakufuna nyhani ukushumayela ngoBukumkani. Ukuba ungumzali, umzekelo omhle owumiselayo entsimini uza kubakhuthaza kakhulu abantwana bakho ukuba bakukhuthalele ukukhonza uThixo. Unokuncedwa njani umntwana oziphethe kakuhle nozimiseleyo ukushumayela kuba enokholo?

¹⁴ Kuza kuba kuhle ukuba umzali aye komnye wabadala abakwiKomiti Yenkonzo Yebandla ukuze athethe nabo ngokufaneleka kwaloo mntwana ukuba abe ngumvakalisi. Umnxibelelanisi wequmrhu labadala uza kulungiselela ukuba abadala ababini (omnye wabo okwikomiti yenkonzo) badibane naloo mntwana kunye nomzali (okanye abazali) bakhe. Ukuba loo mntwana unolwazi olusisiseko lwenyaniso yeBhayibhile kwaye ubonisa ukuba uyafuna ukushumayela ngoBukumkani, loo nto ibonisa ukuba wenza inkqubela. Emva kokuhlola ezo zinto nezinye ezifana nezo zisebenza kubantu abadala, abo badala babini banokugqiba enoba loo mntwana unokuba nguye na umvakalisi ongabhaptizwanga. (Luka 6:45; Roma 10:10) Xa kuhlolwa umntwana, akunyanzelekanga kuthethwe ngeminye imibandela edla ngokubuzwa kumntu omdala engenakwenziwa ngumntwana.

¹⁵ Xa bethetha naye, abadala bafanele bamncome loo mntwana baze bamkhuthaze ukuba azimisele ukubhaptizwa. Nabazali bafanele banconywe kuba beye basebenza nzima bebethelela inyaniso engqondweni yomntwana. Ukuze abadala bancede abazali baqhubeke benceda umntwana wabo, bafanele bababonise umxholo othi “Umyalezo Oya Kubazali AbangamaKristu,” kwiphepha 179-181.

UKUZINIKELA NOKUBHAPTIZWA

¹⁶ Ukuba sele umazi yaye ubonisa ukuba uyamthanda uYehova ngokuphila ngokuvisisana nemilinganiselo yakhe nangokuya entsimini, kufuneka ubuqinise ubuhlobo bakho naye. Njani? Ngokuzinikela kuye uze ubhaptizwe emanzini.—Mat. 28:19, 20.

¹⁷ Ukuzinikela kuthetha ukuba uza kuphilela ukwenza injongo engcwele. Xa uzinikela kuThixo, uthandaza kuye umthembisa ukuba uza kusebenzisa ubomi bakho ukuze umkhonze uze umthobele. Uzinikela ngokupheleleyo kuye ngonaphakade. (Dut. 5:9) Uzenzela uwedwa le nto. Akakho omnye umntu onokukwenzela.

¹⁸ Noko ke, akwanelanga ukuxelela uYehova uwedwa ukuba ufuna ukuba ngowakhe. Kufuneka ubonise abanye ukuba uzinikele kuThixo. Ubabonisa ngokubhaptizwa emanzini, njengoYesu. (1 Pet. 2:21; 3:21) Yintoni ofanele uyenze xa sele usenzile isigqibo sokukhonza uYehova nesokubhaptizwa? Ufanele uchazele umnxibelelanisi wequmrhu labadala. Uza kulungiselela ukuba abadala bathethe nawe ukuze baqiniseke ukuba uyazifikelela iimfaneleko ezifunwa nguThixo kwabo baza kubhaptizwa. Ukuze ufumane inkcazelo engakumbi, nceda ufunde indawo ethi “Umyalezo Oya Kumvakalisi Ongabhaptizwanga,” kwiphepha 182-184 lale ncwadi, kunye nethi “Imibuzo Yabo Banqwenela Ukubhaptizwa,” kwiphepha 185-207.

INGXELO YOMSEBENZI WOKUSHUMAYELA

¹⁹ Sele kuyiminyaka abantu bakaYehova bekhuthazwa ziingxelo zomsebenzi owenziwayo kuncedwa abantu abaninzi bamkhonze ngendlela ayifunayo ehlabathini lonke. Ukususela xa uYesu Kristu wayeqala ukuxelela abafundi bakhe ukuba iindaba ezilungileyo zaziya kushunyayelwa kuwo wonke umhlaba, amaKristu okwenyaniso ebenomdla okhethekileyo wokwazi ukuba iza kwenziwa njani le nto.​—Mat. 28:19, 20; Marko 13:10; IZe. 1:8.

²⁰ Abalandeli bokuqala bakaYesu babekuthanda ukuva iingxelo zomsebenzi wokushumayela. (Marko 6:30) Incwadi yeZenzo isixelela ukuba kwakukho abantu abamalunga ne-120 xa umoya oyingcwele wathululwa kubafundi ngePentekoste ka-33 C.E. Kungekudala emva koko, inani labafundi landa laya kutsho kwabamalunga ne-3 000, ladlula nalapho laya kutsho kwabamalunga ne-5 000. Kwathunyelwa ingxelo ekhuthazayo ethi “noYehova waqhubeka esongeza yonke imihla kwabo babesindiswa,” nethi “ababingeleli abaninzi baba ngamakholwa.” (IZe. 1:15; 2:5-11, 41, 47; 4:4; 6:7) Zimele ukuba zabakhuthaza ngokwenene abafundi ezi ndaba! Ngokwenene ezi ngxelo zibangela imincili zimele ukuba zabenza batyhalela phambili kumsebenzi ababewunikwe nguThixo, phezu kwayo nje intshutshiso ekrakra eyayibangelwa ziinkokheli zonqulo zamaYuda!

²¹ Malunga no-60 ukuya ku-61 C.E., uPawulos wanikela ingxelo kwincwadi yakhe eyayisiya kwabaseKolose esithi iindaba ezilungileyo ‘zazivelisa isiqhamo yaye zisanda ehlabathini lonke,’ kwaye “zashunyayelwa kwindalo yonke ephantsi kwezulu.” (Kol. 1:5, 6, 23) AmaKristu okuqala ayelithobela iLizwi, kwaye umoya oyingcwele wawuwanika amandla ukuze ashumayele ehlabathini lonke ngaphambi kokuba ipheliswe inkqubo yamaYuda ngo-70 C.E. Hayi indlela ekwakukhuthaza ngayo ukuba abasebenzi abangamaKristu athembekileyo beve iingxelo zomsebenzi owawusenziwa!

²² Ngendlela efanayo, intlangano kaYehova yale mihla izama ukugcina iingxelo ezichanileyo zomsebenzi owenziwayo kuzalisekiswa uMateyu 24:14, othi: “Ezi ndaba zilungileyo ezingoBukumkani ziza kushunyayelwa emhlabeni wonke, ziviwe zizo zonke iintlanga, emva koko sifike isiphelo.” Njengabakhonzi abazinikeleyo bakaThixo, sinomsebenzi ongxamisekileyo esifanele siwenze. Simele sibe nomdla wokushumayela kangangoko ngaphambi kokuba kufike isiphelo. UYehova uza kuqiniseka ukuba lo msebenzi uyagqitywa, kwaye uza kuvuya ukuba nathi siyawenza.​—Hez. 3:18-21.

INGXELO YAKHO YENTSIMI

²³ Yintoni kanye kanye esimele siyifake kwingxelo yentsimi? Isiliphu seNgxelo Yenkonzo Yasentsimini esilungiselelwe yintlangano siyayibonisa inkcazelo efanele ifakwe. Kodwa ke, la magqabaza alandelayo angakunceda.

²⁴ Kwindawo ebhalwe “Ezihanjisiweyo (Eziprintiweyo Neze-elektroniki),” bhala iincwadi eziprintiweyo okanye ze-elektroniki ozinike okanye wazithumelela abantu abangengomaNgqina abhaptiziweyo. Kwethi “Ukuboniswa Kwevidiyo,” bhala ukuba ubabukelise kangaphi abantu iividiyo zethu.

²⁵ Kwindawo ebhalwe “Amabuyelo,” bhala ukuba ubuyele kangaphi kumntu obuthethe naye ongeloNgqina elizinikeleyo nelibhaptiziweyo kuba ufuna ahlale enomdla. Ibuyelo kuxa utyelela umntu, umbhalela ileta, umfowunela, umthumelela umyalezo ngefowuni okanye i-e-mail, okanye umnika iimpapasho. Nanini na kuqhutywa isifundo seBhayibhile, sinokubalwa njengebuyelo. Umzali unokubala ibuyelo elinye veki nganye eqhuba unqulo lwentsapho kukho umntwana ongabhaptizwanga.

²⁶ Enoba isifundo seBhayibhile siqhutywe kangaphi, sibalwa njengesifundo esinye nyanga nganye. Abavakalisi bafanele bafake ingxelo yenani lezifundo zeBhayibhile ezahlukeneyo abaziqhubileyo kuloo nyanga. Kule ngxelo kunokufakwa nezifundo eziqhutywa nabantu abangekabi ngamaNgqina abhaptiziweyo. Xa ikomiti yenkonzo ikucele ukuba uqhubele umzalwana okanye udade opholileyo isifundo okanye xa uqhubela umntu osandokubhaptizwa ongekayigqibi incwadi ethi Isifundisa Ntoni IBhayibhile? nethi Zigcineni Kuthando LukaThixo, nazo ezo zifundo unokuzibala.

²⁷ Kubalulekile ukuba ufake ingxelo echanileyo kwindawo ebhalwe “Iiyure.” Ngokuqhelekileyo, eli lixesha olichitha kumsebenzi wendlu ngendlu, unikela ubungqina esitratweni, usenza amabuyelo, uqhuba izifundo zeBhayibhile okanye ushumayela kubantu abangengomaNgqina azinikeleyo nabhaptiziweyo. Ukuba abavakalisi ababini basebenza kunye, bobabini banokulibala elo xesha, kodwa mnye kuphela oza kubala ibuyelo okanye isifundo seBhayibhile. Xa abazali bencedisana bobabini ekufundiseni abantwana kuNqulo Lwentsapho, banokubala ixesha elingangeyure nangaphantsi ngeveki. Abazalwana banokulibala ixesha abanikela ngalo intetho yesidlangalala. Nalowo utolika intetho yesidlangalala unokulibala elo xesha. Kukho izinto ezithile elingabalwayo ixesha lazo, njengokulungiselela ukuya entsimini, ukuya kwintlanganiso yenkonzo yasentsimini, ixesha owenza ngalo izinto zakho nexesha olichitha xa usiya okanye ubuya entsimini.

²⁸ Umvakalisi umele alandele isazela sakhe esiqeqeshwe yiBhayibhile xa ebala ukuba lingakanani kanye kanye elona xesha alichithe eshumayela. Abanye abavakalisi basebenza kwintsimi enabantu abaninzi, ngoxa abanye beshumayela kwiindawo ezinabantu abambalwa nalapho bahamba umgama omde ukuze bafike. Iindawo esishumayela kuzo azifani; iyahluka nendlela abavakalisi abalijonga ngayo ixesha abanokulibala xa beshumayela. IQumrhu Elilawulayo alinyanzelisi izimvo zalo kwindlela abazalwana abasemhlabeni wonke abamele balibale ngayo ixesha abalichitha entsimini, yaye alimiselanga mntu oza kujonga ukuba abantu balibala njani.—Mat. 6:1; 7:1; 1 Tim. 1:5.

²⁹ Ixesha elichithwa entsimini lifanele lifakwe ngokweeyure ezipheleleyo. Umahluko uza kubakho xa umvakalisi esoyisakala ngenxa yokwaluphala, ukungakwazi ukuphuma ekhaya kuba egula, ukuhlala kwikhaya elinyamekela abangakwazi kuzenzela nto, okanye ukusikelwa umda ngenye indlela. Loo mvakalisi unokufaka ingxelo ngokwemizuzu eyi-15. Kwanokuba ushumayela imizuzu eyi-15 kuphela ebudeni benyanga, ufanele ayifake ingxelo yelo xesha. Uza kubalwa njengomvakalisi woBukumkani okhutheleyo. Eli lungiselelo likwasebenza nakumvakalisi ongakwazi kuzenzela nto okwexeshana, mhlawumbi ongakwaziyo ukuhamba ebudeni benyanga ngenxa yokugula okanye ukwenzakala kakhulu. Eli lungiselelo lenzelwe kuphela abo kungekho nto ingako banokuyenza. Yikomiti yenkonzo eza kugqiba enoba umvakalisi uyafaneleka na ukuba afakwe kweli lungiselelo.

INGXELO YOMVAKALISI WEBANDLA

³⁰ Ingxelo yakho yentsimini yenyanga nganye ifakwa kwiNgxelo Yomvakalisi Webandla ekwifayile yebandla okulo. Ukuba ufudukela kwelinye ibandla, qiniseka ukuba uyabachazela abadala. Unobhala uza kuthumela ingxelo yakho kwibandla oya kulo. Xa eyithumele, abadala bebandla oya kulo baza kutsho bakwazi ukukwamkela baze bakukhuthaze. Ukuba uza kuhamba kwibandla okulo ixesha elingaphantsi kweenyanga ezintathu, nceda uqhubeke uyithumela ingxelo yakho yentsimini kwibandla lakho.

ISIZATHU SOKUBA SIFAKE INGXELO YETHU YENTSIMI

³¹ Ngaba ukhe ulibale ukufaka ingxelo yakho yentsimi? Ngokuqinisekileyo sonke siyafuna ukukhunjuzwa ngamanye amaxesha. Kodwa ukuba sinesimo sengqondo esifanelekileyo ngokufaka ingxelo yentsimi kwaye siyasiqonda isizathu sokuba kubalulekile ukuyifaka, kunokuba lula ukuba sikhumbule ukufaka ingxelo yentsimi.

³² Abanye baye babuza lo mbuzo: “Ekubeni uYehova eyazi indlela endimkhonza ngayo, kutheni kufuneka ndifake ingxelo ebandleni?” Ewe, uYehova uyakwazi oko sikwenzayo, kwaye uyakwazi ukubona enoba simkhonza ngomphefumlo uphela okanye sidlulisa nje usana kunina. Noko ke, khumbula ukuba uYehova wayibhala phantsi imihla eyachithwa nguNowa xa wayesakha umkhombe, nenani leminyaka eyachithwa ngamaSirayeli ehamba entlango. UThixo walibhala phantsi inani labo babethembekile kuye nelabo babengamthobeli. Wayibhala phantsi ingxelo yokoyiswa kwelizwe laseKanan nezinto ezaziphunyezwa ngabagwebi ababethembekile bakwaSirayeli. Ewe, wabhala iinkcukacha ezininzi ngezenzo nezinto ezaphunyezwa ngabakhonzi bakhe. Wayiphefumlela le ngxelo yezinto ezazisenzeka, nto leyo eyenza kucace ukuba kubalulekile kuye ukugcina iingxelo ezichanileyo.

³³ Izinto ezenzeka kudala ezibhalwe eBhayibhileni zibonisa ukuchana kweengxelo ezigcinwe ngabantu bakaYehova. Kwiimeko ezininzi, intsingiselo epheleleyo yeengxelo zeBhayibhile ayinakudluliselwa ngaphandle kokuba kuchazwe amanani athile. Khawubone le mizekelo ilandelayo: iGenesis 46:27 ne-Eksodus 12:37; ABagwebi 7:7; 2 Kumkani 19:35; 2 Kronike 14:9-13; Yohane 6:10; 21:11; IZenzo 2:41; 19:19.

³⁴ Nangona iingxelo zethu zingachazi yonke into esiyenzayo xa sikhonza uYehova, intlangano kaYehova iyazisebenzisa. Ngoxa uYesu wayesemhlabeni, xa abapostile babebuya kumsebenzi wokushumayela bamxelela “yonke into ababeyenzile nezinto abaye bazifundisa.” (Marko 6:30) Ngamanye amaxesha, iingxelo zenkonzo yasentsimini zinokubonisa ukuba kukho izinto ezithile zomsebenzi wokushumayela ekufuneka zihoywe. Amanani anokubonisa ukuba ngoxa kuye kwenziwa kakuhle kwezinye izinto, inani labavakalisi alikhange linyuke kangako. Mhlawumbi kufuneka ukhuthazo okanye kukho iingxaki ekufuneka zilungisiwe. Kuba bekhathala, abadala baza kuzifunda iingxelo baze balungise nayiphi na into enokuthintela inkqubela yabantu abathile okanye eyebandla lonke.

³⁵ Kwakhona, iingxelo zinceda intlangano ibone ukuba yeyiphi intsimi edinga abasebenzi abangakumbi. Yeyiphi intsimi enabantu abanomdla? Kuphi apho inkqubela incinci khona? Zeziphi iincwadi ezifunekayo ukuze kuncedwe abantu bafunde inyaniso? Iingxelo zinceda intlangano ikwazi ukubona iincwadi ezifunekayo kwiindawo ezahlukahlukeneyo ehlabathini ize ilungiselele ukuba zifumaneke.

³⁶ Uninzi lwethu luyakhuthazwa ziingxelo. Ngaba asivuyi xa sisiva ngomsebenzi wabazalwana bethu abashumayela iindaba ezilungileyo ehlabathini lonke? Iingxelo zolwando ziyasinceda sibone ukuba nyhani intlangano kaYehova iyakhula. Amava ayasikhuthaza aze asenze sizimisele ngakumbi ukushumayela. (IZe. 15:3) Ukufaka kwethu ingxelo kubalulekile yaye kubonisa ukuba sibaxhalabele abazalwana bethu abakuzo zonke iindawo. Ngale ndlela ibonakala incinci, sibonisa ukuba siyamthobela uYehova nentlangano yakhe.—Luka 16:10; Heb. 13:17.

YIBA NEZINTO OZIMISELE UKUZENZA

³⁷ Asikho isizathu sokuba sizithelekise nabanye abazalwana ngomsebenzi esiwenza entsimini. (Gal. 5:26; 6:4) Iimeko zabantu azifani. Kwelinye icala, kuyasinceda ukuba nezinto esizimisele ukuzenza entsimini ibe xa sizenza sitsho sibone ukuba senza inkqubela ibe siza kuvuya.

³⁸ Kucacile ukuba uYehova uyawukhawulezisa umsebenzi wokuhlanganisa abantu aza kubakhusela ‘kwixesha lentlungu engathethekiyo.’ Siphila kwixesha ekuzaliseka ngalo isiprofeto sikaIsaya esithi: “Omncinci uza kuba liwaka, nophantsi abe luhlanga olunamandla. Mna Yehova, mna kanye, ndiza kuyenza ikhawuleze loo nto ngexesha layo.” (ISityhi. 7:9, 14; Isa. 60:22) Yinyhweba engenakuthelekiswa nanto ukuthunywa ukuba sishumayele iindaba ezilungileyo kule mihla yokugqibela!—Mat 24:14.