Imibuzo Evela Kubafundi
Ibandla linayiphi imbopheleleko xa umKristu obeqhuba imoto eye wagaxeleka engozini kwaza kwakho abafayo?
Ibandla kufuneka likhangele enoba umqhubi akanatyala lagazi na kuba ibandla limele likuphephe ukubekwa ityala legazi ngabantu. (Duteronomi 21:1-9; 22:8) Umqhubi obangele ukufa kwabantu usenokuba netyala legazi ukuba oko kwenzeke ngenxa yokungabi nankathalo kwakhe okanye waphule ngabom omnye wemithetho yokhuseleko okanye yendlela ebekwe nguKesare, urhulumente. (Marko 12:14) Noko ke, zikho nezinye iinkalo ezimele ziqwalaselwe.
Umbulali oye wabalekela kwizixeko zokusabela zakwaSirayeli kwakufuneka lixoxwe ityala lakhe. Xa kuye kwafunyaniswa ukuba akabulelanga ngenjongo, wayevunyelwa ahlale kulo mzi wokusabela, ekhuselekile kumphindezeli wegazi. (Numeri 35:6-25) Ngoko ke, ukuba umKristu ubekwa ityala ngokufa komntu kwingozi yemoto, abadala bamele baphande ngaloo mbandela ukuze babone enoba loo mntu unetyala legazi kusini na. Isigqibo sikarhulumente okanye senkundla asigqibi kwaphela ngoko kumele kwenziwe libandla.
Ngokomzekelo, inkundla isenokumfumana enetyala loo mntu ngenxa yobuceducedu bemithetho ethile, kodwa uphando lwabadala lufumanise ukuba akanatyala lagazi kuba bekungekho nto ingako anokuyenza ukuthintela loo ngozi. Kwelinye icala, kwanokuba inkundla imfumana engenatyala, abadala basenokugqiba ekubeni unetyala legazi.
Isigqibo sabadala abaphanda elo tyala simele sisekelwe eZibhalweni nakwizibakala ezicacileyo—ukuvuma komqhubi lowo okanye ubungqina bamangqina amabini obunokuthenjwa. (Duteronomi 17:6; Mateyu 18:15, 16) Ukuba ufunyaniswe enetyala, kunokusekwa ikomiti egwebayo. Ukuba loo komiti ifumanisa ukuba lowo unetyala uye waguquka, uya kufumana isiluleko esifanelekileyo seZibhalo ibe akayi kunikwa amalungelo athile ebandleni. Akayi kuqhubeka ekhonza njengomdala okanye isicaka solungiselelo. Uya kubekelwa neminye imiqathango. Ukongezelela, umele aziphendulele kuThixo ngokungakhathali nokutyeshela kwakhe umthetho okuye kwabangela loo ngozi nokufa phambi koThixo.—Galati 6:5, 7.
Ngokomzekelo: Ukuba imozulu ibimaxongo ukwehla kwaloo ngozi, umqhubi ebemele alumke ngakumbi. Ukuba ebesozela, ebemele amise aze aphumle de athi qwa ngokupheleleyo, okanye ebemele anike omnye umntu aqhube.
Masithi umqhubi ebenyathele umcephe ngamandla. Ukuba kukho nawuphi na umKristu odlulayo kwisantya esisemthethweni, oko kukusilela ukubuyisela “izinto zikaKesare kuKesare.” Loo nto intama nokuba akabuxabisanga ubungcwele bobomi, kuba isantya sinokuphumela ekufeni kwabantu. (Mateyu 22:21) Xa kunjalo, umele uqwalaselwe ngakumbi lo mcimbi. Umdala ebeya kumisela umzekelo onjani emhlambini ukuba akayikhathaleli imithetho yendlela kaKesare okanye akayithobeli ngabom?—1 Petros 5:3.
AmaKristu akamele alindele amanye ukuba aye kufika kwindawo ethile ngexesha angenako ukufika ngalo engakhange aqhube ngesantya esingekho mthethweni. Noko ke, kwiimeko ezininzi kuye kufuneke nje ukuba umntu asuke kwangexesha ukuze abe nexesha elaneleyo lokuhamba. Ukuba uye wasuka kwangexesha, umKristu akuyi kufuneka aphaphathekise imoto, kodwa uya kuthobela imithetho yendlela ‘yamagunya awongamileyo,’ urhulumente. (Roma 13:1, 5) Oku kuya kunceda umqhubi aphephe ukwenza ingozi nto leyo enokwenza abe netyala legazi. Oku kuya kumnceda amisele nomzekelo omhle aze abe nesazela esilungileyo.—1 Petros 3:16.