UkuVuma
Ingcaciso: Kukubhengeza okanye kukuvuma, enoba kusekuhleni okanye ngasese, (1) oko umntu akukholelwayo okanye (2) izono zakhe.
Ngaba sivumelana neZibhalo isithethe sonqulo soxolelwaniso, esiquka ukuvuma izono endlebeni (ukuvuma izono zobuqu endlebeni yomfundisi), njengeso sifundiswa yiCawa yamaKatolika?
Indlela ekuthethwa ngayo nomfundisi
Inkqubo esisithethe, esasetyenziswa ngokufuthi, ithi: “Ndisikelele Bawo, kuba ndonile. Sendinethuba [ubude bexesha] ndagqibela ukuvuma izono.”—Iphephancwadi iU.S. Catholic, Oktobha 1982, iphe. 6.
Mat. 23:1, 9: “UYesu wathetha . . . esithi, . . . Ningabizi mntu ngokuba nguyihlo emhlabeni apha; kuba mnye uyihlo wenu, lowo usemazulwini.”
Izono ezinokuxolelwa
“ICawa ibisoloko ifundisa ukuba zonke izono, bungakhathaliseki ubunzulu bazo, zinokuxolelwa.”—The Catholic Encyclopedia (enombandela othi nihil obstat nothi imprimatur), nguR. C. Broderick (Nashville, Tenn.; 1976), iphe. 554.
Heb. 10:26: “Kuba, xa sithi sone ngabom, emveni kokuba sakwamkelayo ukwazi inyaniso, akusasele dini ngenxa yezono.”
Marko 3:29, TE: “Kodwa yena othe wanyelisa uMoya oyiNgcwele akanako ukuxolelwa naphakade; unetyala lesono esingatshitshiyo.”
Indlela ephunyezwa ngayo intlawulelo
Ngokufuthi lowo kuvunywa kuye izono uyalela ovuma izono athandaze ngokwenani elichaziweyo amazwi entlawulelo athi “Bawo wethu” nathi “Aa! Mariya.”
Mat. 6:7: “Nithandaza njalo ke, maningenzi milembelele ingeyanto [oko kukuthi, ukuphindaphinda okungenantsingiselo], njengabeentlanga; kuba beba boviwa ngenxa yamazwi abo amaninzi.”
Mat. 6:9-12: “Thandazani ngoko nina nenjenje: Bawo wethu osemazulwini, . . . usixolele amatyala ethu.” (Akukho nanye indawo eBhayibhileni esiyalelwa kuyo ukuba sithandaze kuMariya okanye ngaye. Bona kwanabaseFilipi 4:6, kwanephepha 188, 189 phantsi kothi “UMariya.”
Roma 12:9: “Uthando malungabi naluhanahaniso; kuthiyeni okungendawo, namathelani kokulungileyo.”
Ngaba uYesu akazange abagunyazise abapostile bakhe baxolele izono?
Yoh. 20:21-23: “Njengokuba uBawo endithumile mna, nam ndiyanithuma nina. Akutsho wabaphefumlela, wathi kubo, Yamkelani uMoya oyiNgcwele; abazono nithe nazixolela, bazixolelwe; nabazono nithe nazibamba, zibambekile.”
Abapostile bakuqonda baza bakusebenzisa njani oku? EBhayibhileni akukho ngxelo yesihlandlo nokuba sinye awathi ngaso umpostile waphulaphula ukuvunywa kwezono ngasese wandula ke wavakalisa ukuxolelwa komntu lowo. Phofu ke, iimfuneko zokuxolelwa nguThixo zandlaliwe eBhayibhileni. Abapostile, besalathiswa ngumoya oyingcwele, babenokuqonda enoba abantu babehlangabezana na neemfuneko ezinjalo yaye ngokwesi sizinzi babenokuvakalisa ukuba uThixo ubaxolele okanye akabaxolelanga. Ngokomzekelo, bona IZenzo 5:1-11, kwaneyoku-1 yabaseKorinte 5:1-5 neyesi-2 yabaseKorinte 2:6-8.
Bona kwanomxholo omkhulu othi “AmaLandela Abapostile.”
Iimbono zabaphengululi ngemvelaphi yokuvuma izono endlebeni ziyahluka
IThe Catholic Encyclopedia, nguR. C. Broderick, ithi: “Ukususela kwinkulungwane yesine ukuvuma izono endlebeni kube yindlela eyamkelweyo.”—Iphe. 58.
INew Catholic Encyclopedia, ithi: “Ababhali-mbali abaninzi ababephila ngexesha elinye, abamaKatolika kwanabamaProtestanti, bayilanda imvelaphi yentlawulelo yangasese ngenxa yezono njengoqeqesho oluqhelekileyo ezicaweni zaseIreland, eWales naseBritani, apho iiSakhramente, kuquka iNtlawulelo Yezono eyayidla ngokonganyelwa ngumongameli weziko leemonki naziimonki ezingabefundisi bakhe. Njengoko uqheliselo lweziko leemonki lokuvuma izono ndawonye nolwalathiso lwasekuhleni nolwangasese zingumzekelo, ukuvuma izono ngokufuthi nokuvuma ukuzinikela kubonakala kuzizinto ezaveliselwa irhamente. . . . Phofu ke, ukuxolelwa kwezono zasemfihlekweni ngexesha lokuvuma izono yaye ngaphambi kokuphunyezwa kwentlawulelo kwaqala ngenkulungwane ye-11.”—(1967), Umqu. XI, iphe. 75.
Umbhali-mbali uA. H. Sayce uthi: “Imibhalo yezithethe zonqulo ibonisa ukuba ukuvuma izono ekuhleni kwanangasese kwakusenziwa eBhabhiloni. Eneneni, ukuvuma izono ngasese kubonakala ukuba kwakuyindlela endala neqheleke ngakumbi.”—The Religions of Ancient Egypt and Babylonia (Edinburgh, 1902), iphe. 497.
Ziyintoni iinkolelo zamaNgqina kaYehova ngokuvuma izono?
Ukuvuma ukholo lukabani ngokuvakalisa ekuhleni
Roma 10:9, 10: “Xa uthe wamvuma ngomlomo wakho ukuba uyiNkosi uYesu, wakholwa ngentliziyo yakho ukuba uThixo wamvusa kwabafileyo, wosindiswa. Kuba umntu ukholwa ngentliziyo, ukuze abe nobulungisa; avume ke ngomlomo, ukuze asindiswe.”
Mat. 10:32, 33: “Wonke umntu ngoko oya kundivuma [Yesu Kristu] phambi kwabantu, ndiya kumvuma nam phambi koBawo osemazulwini. Osukuba ke eya kundikhanyela phambi kwabantu, ndiya kumkhanyela nam phambi koBawo osemazulwini.”
Xa umntu esona uThixo
Mat. 6:6-12: “Ke wena, xa sukuba uthandaza, ngena egumbini lakho, uthi, uluvalile ucango lwakho, uthandaze kuYihlo osemfihlekweni; . . . Bawo wethu osemazulwini, malingcwaliswe igama lakho. . . . Usixolele amatyala ethu, njengokuba nathi sibaxolela abo banamatyala kuthi.”
INdu. 32:5: “Ndikwazisile isono sam [Thixo], ubugwenxa bam andabugquma; ndathi, ndoluvuma ukreqo lwam kuYehova; wabuxolela ke wena ubugwenxa besono sam.”
1 Yoh. 2:1: “Ukuba kukho othe wona, sinoMthetheleli kuye uYise, uYesu Kristu ilungisa.”
Xa umntu esona uwabo okanye xa koniwe yena
Mat. 5:23, 24: “Ngoko xa sukuba uwusondeza umnikelo wakho esibingelelweni, wathi ulapho wakhumbula ukuba umzalwana wakho unendawo ngakuwe, wushiye apho umnikelo wakho phambi kwesibingelelo, uhambe uye uxolelane nomzalwana wakho kuqala, wandule ukuza uwusondeze umnikelo wakho.”
Mat. 18:15: “Ukuba ke umzalwana wakho uthe wakona, yiya umohlwaye inguwe naye ninedwa.”
Luka 17:3: “Ukuba ke umzalwana wakho uthe wakona, mkhalimele; ukuba uthe waguquka, mxolele.”
Efe. 4:32: “Yibani nobubele omnye komnye, nibe nemfesane kakhulu, nixolelane, njengokuba naye uThixo wanixolelayo ekuKristu.”
Xa uthile ebandakanyeka esenzweni esibi ngokunzulu yaye efuna uncedo lokomoya
Yak. 5:14-16: “Kukho mntu na ufayo [ngokomoya] phakathi kwenu? Makabizele kuye amadoda amakhulu alo ibandla, athandaze wona phezu kwakhe, akuba emthambisile ngeoli, egameni leNkosi; wothi umthandazo wokholo umsindise lowo uleleyo, iNkosi imvuse; nokuba ubethe wenza izono, wozixolelwa [nguThixo]. Xelelanani iziphoso, nithandazelane, ukuze niphiliswe.”
IMize. 28:13: “Osigubungelayo isono sakhe akayi kuba nampumelelo; ke yena osivumayo, asishiye, uya kufumana inceba.”
Kuthekani ukuba abantu abonayo abaluceli uncedo?
Gal. 6:1: “Bazalwana, ukuba umntu uthe waqutyulwa nokuqutyulwa sisiphoso esithile, nina bangaboMoya, mlulekeni onjalo ninomoya wobulali; uzilumkela ukuba ungahendwa nawe.”
1 Tim. 5:20: “Abo bonayo, bohlwaye emehlweni abantu bonke [oko kukuthi, abo bawazi ngokobuqu umcimbi], ukuze nabanye aba babe nokoyika.”
1 Kor. 5:11-13: “Maningazidibanisi nosukuba enegama lokuba ngumzalwana, ukanti wenza umbulo [uhenyuzo, NW], nokuba ulibawa, nokuba ungumkhonzi wezithixo, nokuba ungumtshabhisi, nokuba ulinxila, nokuba ungumphangi; ningakhe nidle nokudla nonjalo. . . . Ize nimnyothule kuni nina lowo ungendawo.”