Uza Kuthini Kumntu OngumYuda?
1 Kwinkulungwane yokuqala, “oonyana bakaSirayeli” abaninzi basabela kakuhle kwintshumayelo kaYesu nabapostile bakhe. (IZe. 10:36) Njengoko kwakunjalo ngelo xesha, amaYuda amaninzi anyanisekileyo namhlanje amkela inyaniso ngokusuka entliziyweni—kungekuphela nje eIsrael kodwa naseRashiya, eUnited States nakwamanye amazwe. Ngaba ungathanda ukuphumelela ngakumbi ekufikeleleni abantu abangamaYuda? Amacebiso alandelayo aya kukunceda ukuba unikele ubungqina ngobuchule kumaYuda anqulayo nanganquliyo.
2 Ukunikela Ubungqina KumaYuda Anqulayo: Kufanele kuqondwe ukuba amaYuda anqulayo ngokufuthi akuxhalabele gqitha ukugcina izithethe zoorabhi kuneemfundiso ezithile. Eneneni, ngokuqhelekileyo agqala isithethe njengegunya elilinganayo neZibhalo. Ngenxa yoko, akanamdla wokuxubusha imibandela enzulu yeBhayibhile. Kwakhona atyekele ekucingeni ukuba iBhayibhile iyincwadi yamaKristu. Ngenxa yoko, ngokufuthi kulungile ukuba xa ubhekisela eBhayibhileni usebenzise amabinzana athi “iZibhalo zesiHebhere,” “iTorah” okanye “iZibhalo.” Impapasho entle elungiselelwe ngokukhethekileyo abantu abangamaYuda yincwadana enemifanekiso ethi Will There Ever Be a World Without War?
3 Yiyiphi imibandela enokubangela umdla kumaYuda anqulayo? Kaloku, akholelwa ukuba kukho uThixo omnye, onomdla kakhulu kumntu. Kwakhona akholelwa ukuba uThixo uyangenelela kwimibandela yoluntu. Usenokusebenzisa ezi ngongoma ukuze uvelise izinto enivisisana kuzo. Ngapha koko, inkoliso yamaYuda inomdla kakhulu ekubandezelekeni kwabantu bayo ebudeni beMfazwe Yehlabathi II. Ayisiqondi isizathu sokuba uThixo evumele okungekho sikweni nexesha lokupheliswa kobungendawo. Sixhobe ngokwaneleyo ukuphendula imibuzo enjalo, ngokomzekelo, sibhekisela koko abazalwana bethu abajamelana nako ebudeni Bokubulalwa Kwabantu Ngenkohlakalo.
4 Kakade ke, ukuphepha ukumenza achase umninimzi, kulunge ngakumbi ukungawuvelisi ngokukhawuleza umbandela wokuba ungubani uMesiya encokweni. Kunoko, usenokuxubusha indima kaMoses kwimbali yamaSirayeli uze umbuze umninimzi enoba uyakholelwa kusini na ukuba iimfundiso zikaMoses ziyasebenza namhlanje. Xa kubonakala ukuba kufanelekile ukuxubusha ukuba ungubani uMesiya, usenokuqala ufunde iDuteronomi 18:15, ethi: “UYehova uThixo wakho uya kunikela umprofeti ophuma phakathi kwenu, kubazalwana benu, onjengam; ize niphulaphule yena.” Buza umninimzi ngalowo uMoses wayecinga ngaye xa wathetha ngomprofeti onjengaye. Ngoko gubungela iingongoma ezimbalwa kwincwadana enemifanekiso ethi World Without War, iphepha 14, isiqendu 17 nese-18.
5 AmaYuda Anganquliyo Azijonga Ngelinye Iliso Izinto: Asinguye wonke ubani ozibiza ngokuthi ungumYuda ozamkelayo iimfundiso zobuYuda. AmaYuda amaninzi akanquli. Anomdla kakhulu ekukhuthazeni uhlobo olwahlukileyo lobuYuda, obunendlela yabo yokuphila, isithethe nemfundo, kunokuqhelisela unqulo lobuYuda. Amanye amaYuda anganquliyo akholelwa kukuba uThixo akanakwaziwa—yaye aliqela akakholelwa ukuba uThixo ukho. Ekuqaleni, akukho into ingako unokuyiphumeza ngokucaphula kakhulu kwiZibhalo zesiHebhere. Kuya kuba yingenelo ngakumbi ukuqalisa incoko ngendlela obuya kwenza ngayo kumntu onganquliyo. Ngokomzekelo, usenokucacisa indlela iBhayibhile esebenza ngayo kwixesha lethu. Ukuba umninimzi akakholelwa ukuba iBhayibhile iphefumlelwe, ezinye iingongoma ezikwincwadana enemifanekiso ethi World Without War zingaluncedo, ingakumbi ezo zifumaneka kwicandelo elikwiphepha 3 elinomxholo othi “IBhayibhile—Ngaba Iphefumlelwe nguThixo?”
6 Xa unikela ubungqina kumntu ongumYuda, usenokuthi:
◼ “Inkoliso yethu iye yafelwa ngumntu emthandayo. Ucinga ukuba kwenzeka ntoni kuthi xa sisifa?” Vumela impendulo. Yandula ke walathisele umninimzi kwibhokisi enomxholo othi “Ukufa Nomphefumlo—Ziintoni Ezo Zinto?” kwiphepha 22 lencwandana enemifanekiso ethi World Without War. Le bhokisi ithelekisa oko iZibhalo zikuthethayo ngobomi emva kokufa noko oorabhi bakufundisayo. Ngoko tyhila kwisiqendu 17 kwiphepha 23, uze umbonise ngokweZibhalo, ukuba abafileyo baya kuvuselwa ebomini kwiparadesi esemhlabeni. Hambisa incwadana enemifanekiso. Xa ulungiselela ukubuyela, usenokuchaza ukuba usolusapho uYobhi wayenethemba lovuko. Bhekisela kwizibhalo ezicatshulwe ekugqibeleni kwesiqendu 17, uze uthembise ukubuyela uze uxubushe ngazo.
7 Incwadi kaMateyu, kaMarko, kaLuka, kaYohane neyeZenzo zinamava amaYuda awaphulaphulayo aza asabela kwinyaniso. UYehova usayivulile indlela esa ebomini obungunaphakade. AmaYuda amaninzi anyanisekileyo asafanele afunde ngoYehova, uThixo oyinyaniso, ukuze nawo akwazi ukuphila ngonaphakade kwihlabathi elitsha likaThixo.—Mika 4:1-4.