Xelisa Ukungakhethi Buso KukaYehova
1 UYehova unenkxalabo ngabantu. Wamkela ngokungenamkhethe nabani na owenza ukuthanda kwakhe. (IZe. 10:34, 35) Xa uYesu wayeshumayela ebantwini, naye ngokufanayo wayengenamkhethe. (Luka 20:21) Kufuneka sixelise umzekelo wabo, njengokuba uPawulos wenzayo, owabhala wathi: “Kukho iNkosi enye kubo bonke, esisityebi kubo bonke abo babiza kuyo.”—Rom. 10:12.
2 Ukuvakalisa iindaba ezilungileyo zoBukumkani bukaThixo kubo bonke esidibana nabo kuzisa uzuko kuThixo. Simele siqhubeke sisabelana nabanye ngesi sigidimi simangalisayo, kungakhathaliseki uhlanga abalulo, umgangatho wobomi, imfundo, okanye imali abanayo. (Rom. 10:11-13) Oku kuthetha ukushumayela kwabo baya kuphulaphula—amadoda, amabhinqa, abaselula nabakhulileyo. Kufuneka singene kuyo yonke imizi ukuze sinike umninimzi ngamnye ithuba lokuva inyaniso.
3 Yiba Nomdla Kuye Wonk’ Ubani: Usukelo lwethu kukuba siqhagamshelane naye wonk’ ubani esinokumfumana. Becinga ngoku, bambi abavakalisi baye banempumelelo ekunikeleni ubungqina kubantu abeze kugqirha, ezibhedlele, kumakhaya abongikazi, kwiiofisi zoonontlalontle nakumaziko okubuyisela kwimeko yangaphambili. Ukongezelela, abavakalisi baye banikela ubungqina kubalathisi bemizi yemingcwabo, abaphathi bezikolo, abaluleki nakubagwebi. Xa uthetha nabasemagunyeni, kuhle ukuvakalisa uxabiso ngeenkonzo eziluncedo ababonelela ngazo ekuhlaleni. Yiba nentlonelo, uze ukhethe amanqaku asexesheni axubusha ngokukhethekileyo ngohlobo lomsebenzi wabo neengxaki ezinxulumene nawo.
4 Kwenye imeko omnye udade wakwazi ukuthetha nomgwebi eofisini yakhe. Emva kwencoko yobuhlobo, wagqabaza wathi: “Uyazi ukuba yintoni endiyithandayo ngamaNgqina kaYehova? Anemigaqo egqwesileyo angaphambukiyo kuyo.” Kwanikelwa ubungqina obuhle kwesi sidwangube.
5 Asinakuzifunda iintliziyo zabantu. Noko ke, ngokuthetha naye wonk’ ubani esidibana naye, sibonisa ukholo lwethu kumandla kaThixo okukwazi ukwalathisa umsebenzi wethu. Ukongezelela, oku kunika abantu ilungelo lokuba baphulaphule baze basabele kwesi sigidimi sethemba. (1 Tim. 2:3, 4) Masilibenzise ngobulumko ixesha lethu size sizabalazele ukuxelisa uYehova ongakhethi buso ngokufikelela bonke abantu esinokubafumana ngeendaba ezilungileyo.—Rom. 2:11; Efe. 5:1, 2.