Ubomi Busemngciphekweni!
1 IBhayibhile ikwenza kucace ukuba kukuthanda kukaYehova “ukuba zonke iintlobo zabantu zisindiswe.” Noko ke, likwayinyaniso nelokuba amathemba obomi amawaka ezigidi axhomekeke kwisimo sawo sengqondo ngoYehova uThixo noBukumkani bakhe ngoYesu Kristu. Isimo sengqondo esifanelekileyo sinokusekelwa kuphela “elwazini oluchanileyo lwenyaniso.” (1 Tim. 2:3, 4) Ngoxa sivakalisa ukuba kungekudala umhlaba uza kucocwa kubo bonke ububi ukuze kuvulelwe indlela ihlabathi elitsha likaThixo lobulungisa, kwakhona sithunywe ukuba siphumeze umsebenzi obalulekileyo wokusindisa ubomi.—Mat. 24:14; 28:19, 20; Roma 10:13-15.
2 Kutheni Ungxamiseke Kangaka Nje? UYesu walumkisa ‘ngembandezelo enkulu ekungazange kubekho injengayo ukususela ekuqaleni kwehlabathi.’ (Mat. 24:21) Loo mbandezelo inkulu iya kufikelela incopho yayo eArmagedon. (ISityhi. 16:16) Izihlwele zabantu zijamelene nentshabalalo ukuba ziyasilela ukusabela kwiindaba ezilungileyo kuquka izalamane zethu, abamelwane, abo sisebenza nabo, abo sifunda nabo nabo siqhelene nabo. Kodwa inkxalabo yethu ikukuba sifikelele “zonke iintlobo zabantu” sixelisa uThixo, owabonakalisa uthando lwakhe ngehlabathi loluntu liphela ngokunikela ngoNyana wakhe, uYesu Kristu, njengentlawulelo yabo bonke. (Yoh. 3:16) Simele sizabalazele ukumema bonke abantu ukuba basabele kwindawo ekhuselekileyo kaThixo. Ngokuwenza kakuhle umsebenzi wokushumayela, sinokuphepha ityala legazi.—Hez. 33:1-7; 1 Kor. 9:16.
3 Yintoni Injongo Yethu? Ukubaluleka komsebenzi wokushumayela kubethelelwa kulo lonke iLizwi likaThixo. Njengokuba echaza umpostile uPawulos, “uthando lukaKristu luyasinyanzela” ukuba siphile ngokuvisisana neendlela zikaThixo. (2 Kor. 5:14) Ukongezelela, IMboniselo isoloko ibethelela imbopheleleko yethu yokushumayela. UBulungiseleli Bethu BoBukumkani ngokuqhubekayo bunikela ulwalathiso ngendlela yokwenza umsebenzi wokushumayela. Abadala balungelelanisa umsebenzi baze basikhuthaze ukuba sibe nenxaxheba kuwo. Abavakalisi esikhonza nabo bayasimema ukuba sibe nesabelo kubulungiseleli kunye nabo. Sisoloko sixelelwa ukuba sizilungiselele iintshumayelo zethu, sihambise amaphephancwadi nolunye uncwadi, senze amabuyelo, siqhube izifundo zeBhayibhile size sisebenzise onke amathuba okunikela ubungqina. Konke oku kuyasinceda sifeze injongo yokusindisa ubomi.—1 Kor. 9:22, 23; Efe. 1:13.