Nikela Ingqalelo Kwimisebenzi Emangalisayo KaThixo
1 Kwiintsuku ezintathu ebezimnandi, siye sahlanganisana kwiNdibano yeSithili ‘Yabenzi Belizwi LikaThixo.’ Besilibele ngezinto zemihla ngemihla zobomi ezifuna ukunyanyekelwa saze sanikela ingqalelo kwimisebenzi emangalisayo kaYehova. Olu cwangciso belwenzelwe ukuba lwandise ukholo lwethu kuThixo naseLizwini lakhe, lomeleze ulwalamano lwethu naye, luze lwandise inzondelelo yethu ngobulungiseleli. Singenelwe njani kwizinto esizifundisiweyo?—Yoh. 13:17.
2 Zintsapho Thobelani Ilizwi LikaThixo: Ungcelele olwalusithi “Lithobele Ilizwi LikaThixo” lusincedile sahlolisisa imeko engokomoya yeentsapho zethu. Abantwana bayakuthanda ukufunda. Ngaloo ndlela, abazali aboyika uThixo bakhuthazwa ukuba benze isifundo seBhayibhile sentsapho sibe sisiseko sokwakha iintsapho ezomeleleyo ngokomoya. Iintloko-ntsapho ezininzi zixubusha nabantwana bazo incwadana entsha enemifanekiso ethi Unako Ukuba Ngumhlobo KaThixo! Oku kuya kubanceda bahlakulele ulwalamano lolonwabo noluluqilima noYehova. Bazali, fundisani abantwana benu indlela yokunikela ingqalelo kwiimvakalelo zikaThixo. Thethani phandle ngothando lwenu ngaye nangezenzo zakhe. (INdu. 103:2) Sebenzani kunye ukuze nifikelele usukelo lweZibhalo olunento yokwenza nokubandakanyeka ngokupheleleyo ekukhonzeni uYehova.
3 Ilizwi LikaThixo Likhanyisa Indlela Yethu: Savuyiswa kukufumana incwadi entsha ethi Isiprofeto SikaIsaya—Ukhanyiselo Lwalo Lonke Uluntu I. Sele uwufunde kangakanani lo mqulu wokuqala? Incwadi kaIsaya yaxela kwangaphambili ngokugwetywa kweentlanga ezingahloneli Thixo nangezithembiso eziqaqambileyo zoBukumkani kubantu bakaThixo. (Isa. 34:2; 35:10) Kwakhona yakha ukholo nentembelo kuYehova nakwindlela yakhe yokwenza izinto.—Isa. 12:2-5.
4 Noko ke, xa ufunda Isiprofeto SikaIsaya unokuyibona indlela uIsaya awayilondoloza ngayo ingqibelelo yakhe kuYehova ngoxa wayengqongwe bubungendawo. Xa wayemenywa ukuba abe ngumthunywa kaThixo, uIsaya waphendula wathi: “Ndikho! Thuma mna.” (Isa. 6:8) Ukucamngca ngomoya wakhe ovumayo kuya kukukhuthaza uqhubeke ushumayela iindaba ezilungileyo, ube nesabelo esizeleyo ekunikeleni “ubungqina kuzo zonke iintlanga.”—Mat. 24:14.
5 Ukunikela ingqalelo kwethu kwimisebenzi kaYehova kuya kubalaselisa ubukhulu bakhe. Lixabise ilungelo lokuba ngumenzi welizwi likaThixo!