IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • km 3/01 iphe. 3-6
  • UAprili—Lixesha ‘Lokuba Sisebenze Nzima Yaye Sizibhokoxe’

No video available for this selection.

Sorry, there was an error loading the video.

  • UAprili—Lixesha ‘Lokuba Sisebenze Nzima Yaye Sizibhokoxe’
  • Ubulungiseleli Bethu BoBukumkani—2001
  • Amanqaku Afanayo
  • Ngaba Sinokwenza UAprili Wama-2000 Abe Yeyona Nyanga Isemagqabini Kuthi?
    Ubulungiseleli Bethu BoBukumkani—2000
  • ‘Lishumayele Ilizwi LikaThixo Ngokupheleleyo’
    Ubulungiseleli Bethu BoBukumkani—2002
  • Yenza Okulungileyo!
    Ubulungiseleli Bethu BoBukumkani—2003
  • Ngaba UAprili Uza Kuba Yinyanga Ekhethekileyo Kuwe?
    Ubulungiseleli Bethu BoBukumkani—1992
Khangela Okunye
Ubulungiseleli Bethu BoBukumkani—2001
km 3/01 iphe. 3-6

UAprili—Lixesha ‘Lokuba Sisebenze Nzima Yaye Sizibhokoxe’

1 Iiveki zexesha leSikhumbuzo lithuba lokucamngca kubantu bakaYehova. Eli lixesha lokucamngca ngoko kwafezwa kukufa kukaKristu nokucinga nzulu ngethemba esilinikwe nguThixo elabakho ngokuphalala kwegazi likaYesu. Njengokuba ucinga ngoAprili 19 walo nyaka uphelileyo, yintoni ethi qatha engqondweni yakho? Ngaba usabakhumbula abantu owababona ngolo rhatya? imekobume yaseSikhumbuzweni etyebileyo ngokomoya? ingxubusho enzulu yeBhayibhile nemithandazo esuka entliziyweni? Mhlawumbi wenza isigqibo sokubonisa umbulelo onzulu ngothando olwaboniswa nguYehova noYesu. Kukuchaphazela njani ngoku ukucamngca ngeso sihlandlo?

2 Kucacile ukuba abantu bakaYehova babonisa umbulelo kungekuphela nje ngamazwi. (Kol. 3:15, 17) Kulo Aprili udluleyo, sazibhokoxa kanobom kubulungiseleli bamaKristu ukuze sibonise uxabiso lwethu ngamalungiselelo kaYehova osindiso. Amawaka oovulindlela abangabancedani, ayedlula ngama-27 ekhulwini incopho yangaphambili yeli loMzantsi Afrika. Namanye amazwe angaphantsi kwesebe loMzantsi Afrika nawo aye anengxelo yeencopho ezintsha zoovulindlela abangabancedani. Umgudu wawo, kunye nowabo bonke abanye abavakalisi boBukumkani, uye waphumela ekubeni kubekho iincopho ezintsha zeeyure, ezokuhanjiswa kwamaphephancwadi nezamabuyelo. Savuyiswa ngakumbi kukuqaliswa kwamawaka ezifundo zeBhayibhile ezitsha nangabantu abaninzi abeze eSikhumbuzweni!

3 Eneneni, ukuqiniseka kwethemba lethu kusishukumisela ekubeni sithabath’ inyathelo. Kunjengokuba umpostile uPawulos wabhala wathi: “Kungenxa yoko le nto sisebenza nzima yaye siyazibhokoxa, ngokuba sibeke ithemba lethu kuThixo ophilayo, onguMsindisi wazo zonke iintlobo zabantu, ngokukodwa abo bathembekileyo.”—1 Tim. 4:10.

4 Kwesi Sikhumbuzo, uya kulubonisa njani ukholo lwakho kumalungiselelo kaYehova obomi? Kulo Aprili udluleyo siye sanelona nani likhulu labavakalisi boBukumkani kwimbali yoMzantsi Afrika. Ngaba sinako ukwenza okungakumbi kulo Aprili? Konke kusemandleni ethu. Kodwa bonke abavakalisi, ababhaptiziweyo nabangabhaptizwanga, kuya kufuneka babe nenxaxheba. Nabaninzi abasebatsha banokufanelekela ukuba nenxaxheba. Ngoko ke, njengokuba uceba ukuzibhokoxa kulo Aprili, cinga ngeendlela onokubakhuthaza ngazo abanye, kuquka abatsha nabangenamava ukuba bakupheleke.

5 Ukunceda Abanye Baphinde Baqalise Ukusebenza: Ukuba bakho abathile obaziyo abebengayi kwinkonzo yasentsimini inyanga enye okanye ezimbini, mhlawumbi ungabakhuthaza uze ubameme ukuba bakupheleke kwinkonzo yasentsimini. Ukuba abathile ebandleni baye baphola, abadala baya kwenza unako nako wokubatyelela ukuze babakhuthaze baqalise kwakhona ngoAprili.

6 Sonke kufuneka siqhubeke sicela umoya kaYehova ukuze usomeleze enkonzweni yakhe. (Luka 11:13) Yintoni ekufuneka siyenze ukuze sifumane loo moya? Funda iLizwi likaThixo eliphefumlelweyo. (2 Tim. 3:16, 17) Kwakhona simele ‘sive oko ukutshoyo umoya kuwo amabandla’ ngokubakho kuzo zontlanu iintlanganiso veki nganye. (ISityhi. 3:6) Eli lithuba lokunceda abaxhiphulisayo nabapholileyo baphucule imikhwa yabo yofundisiso neyokuza ezintlanganisweni rhoqo. (INdu. 50:23) Senza oku ngoxa sibeke iliso elibukhali kwimpilo yethu yokomoya. Phofu ke, kukho okuthile okufunekayo.

7 Umpostile uPetros wathi uThixo ubanika umoya oyingcwele “abo bamthobelayo njengomlawuli.” (IZe 5:32) Intobelo enjalo iquka ukuthobela umyalelo wokuba “sishumayele ebantwini nokuba sinikele ubungqina obucokisekileyo.” (IZe 1:8; 10:42) Ngaloo ndlela, nangona liyinyaniso elokuba sifuna umoya kaThixo ukuba usomeleze sishumayele, likwayinene nelokuba njengokuba siqalisa ukubonisa umnqweno wethu wokumkholisa uYehova, usinceda ngakumbi. Ngamana singangaze sikweye ukubaluleka kokuthabatha loo manyathelo okuthobela ngokuzithandela!

8 Ukunceda Abaselula: Bazali, ngaba bukho ubungqina bokuba abantwana benu bafuna ukuthetha nabanye ngenyaniso? Ngaba bebekupheleka kwinkonzo yasentsimini? Ngaba bangumzekelo kwihambo yabo? Ukuba kunjalo, kutheni uthandabuza? Thetha nelinye lamalungu eKomiti Yenkonzo Yebandla, uze ubone enoba umntwana wakho uyakufanelekela kusini na ukuba ngumvakalisi kulo Aprili. (Bona incwadi ethi Ubulungiseleli Bethu, iphepha 99-100.) Qonda ukuba abantwana bakho banokuba negalelo ngendlela ephawulekayo kwintsholo yendumiso eya kuYehova kwesi Sikhumbuzo.—Mat. 21:15, 16.

9 Omnye umama ongumKristu eGeorgia, eUnited States, usoloko ekhuthaza intombazana yakhe ukuba ithethe nabanye ngoYehova. Kulo nyaka uphelileyo, njengokuba le ntwazana yayikubulungiseleli nonina, yahambisela enye indoda incwadana enemifanekiso ethi Okufunwa NguThixo yaza yabetha koomofu iyichazela iziqulatho. Yabuza: “Mingaphi iminyaka yakho?” Yathi: “Isixhenxe.” Le ndoda yayimangalisiwe kukuyiva ishumayela ngobuchule. Kwathi kanti yayikhulele enyanisweni, kodwa ayizange iyithabathe nzulu njengendlela yobomi. Ngokukhawuleza, kwaqhutywa isifundo seBhayibhile nale ndoda, umfazi wayo nentombazana yayo.

10 Uninzi lolutsha sele lungabavakalisi, yaye siyakunandipha ukuhamba nabo njengokuba besebenza nathi enkonzweni. Olu lutsha lunokuba lukhuthazo koontanga balo. Ngaphezu koko uAprili lixesha elihle lokuba iintsapho zomeleze amaqhina zize zizakhe ngokomoya ngokusebenza kunye enkonzweni engcwele. Iintloko-ntsapho zifanele zikhokele koku.—IMize. 24:27.

11 Ukunceda Abasebatsha: Kuthekani ngabo batsha ufunda nabo iBhayibhile? Ngaba banokuba negalelo elikhethekileyo kulo Aprili? Mhlawumbi babonisa umnqweno wokuthetha nabanye ngoko bakufundayo njengokuba uqhubeka nesahluko 2, isiqendu 22, okanye isahluko 11, isiqendu 14, kwincwadi ethi Ulwazi. Ukuba sele uza kuyigqiba incwadi, lungiselela ukuwuxubusha ngokucokisekileyo lo mbandela njengokuba ugubungela isahluko 18, isiqendu 8, esithi: “Umele ukuba ulangazelela ukuxelela izalamane zakho, abahlobo nabanye ngoko ukufundayo. Enyanisweni, kusenokwenzeka ukuba ubusele ukwenza oku, kanye njengokuba noYesu wayesabelana nabanye ngeendaba ezilungileyo ngokungacwangciswanga. (Luka 10:38, 39; Yohane 4:6-15) Mhlawumbi ngoku ufuna ukwenza okungakumbi.” Ngaba kunjalo ngabo ufunda nabo?

12 Ngaba isifundo sakho siyalikholelwa iLizwi likaThixo? Ngaba siyayisebenzisa imigaqo yeBhayibhile? Ngaba ubomi baso buyavisisana nemilinganiselo yobuthixo? Ngaba siyaya kwiintlanganiso zebandla? Ngaba siyafuna ukukhonza uYehova uThixo? Kutheni ungasikhuthazi sithethe nabadala ukuze babone enoba siyakufanelekela ukuba ngumvakalisi ongabhaptizwanga size sisebenze nawe ngoAprili? (Bona incwadi ethi Ubulungiseleli Bethu, iphepha 97-9.) Ngale ndlela sinokuqalisa ukungcamla indlela intlangano kaYehova eza kusixhasa ngayo kwimigudu yaso yokukhonza uYehova.

13 Eneneni, bambi abafundi benza inkqubela ngokukhawuleza kunabanye. Ngaloo ndlela, ngokuvisisana nolwalathiso olukuBulungiseleli Bethu bukaJuni 2000, iphepha 4, isiqendu 5-6, abaninzi bafunda incwadi yesibini nabantu ababebonise umdla ekuqaleni kodwa abafuna uncedo olongezelelekileyo ukuze banxulumane ngokukhutheleyo. Asiphelelwa lithemba lokuba aba bantu baneentliziyo ezinyanisekileyo baya kuze babe ngabafundi abanyanisekileyo bakaKristu, ‘enoba kusemva kwexesha elifutshane okanye elide.’ (IZe. 26:29) Kodwa, ukuba iinyanga obufunda ngazo nabo bantu zinokuchazwa ‘njengexesha elide,’ ngaba esi Sikhumbuzo sinokuba lixesha elihle lokuba isifundo sakho siqalise ukubonisa ubunzulu boxabiso lwaso ngentlawulelo kaKristu?

14 Indlela Yokubanceda Babe Nesabelo: Sifunda okungakumbi ngokunceda abafanelekayo baqalise kubulungiseleli ngokuhlolisisa indlela awabaqeqesha ngayo uYesu abanye. Wayenganeli nje kukufumana isihlwele aze ayalele abapostile bakhe ukuba bathethe naso. Okokuqala wabalaselisa imfuneko yomsebenzi wokushumayela, wakhuthaza isimo sengqondo sokuthandaza, wandula ke wabalungiselela izinto ezintathu ezisisiseko: iqabane, intsimi nesigidimi. (Mat. 9:35-38; 10:5-7; Marko 6:7; Luka 9:2, 6) Unokwenza okufanayo. Enoba uza kube unceda umntwana wakho, isifundo esitsha okanye ubani ongazange afake ingxelo yomsebenzi kangengexesha elithile, kuya kuba kuhle ukwenza umgudu okhethekileyo wokusebenzisa ezi nkalo zilandelayo.

15 Balaselisa Imfuneko: Bethelela ukubaluleka komsebenzi wokushumayela kulo mntu. Yiba nehlombe ngawo. Balisa amava abonisa oko kufezwa libandla kubulungiseleli. Bonisa umoya owakhuthazwa nguYesu kuMateyu 9:36-38. Mkhuthaze lo usenokuba ngumvakalisi okanye upholileyo ukuba athandazele ukuba nenxaxheba kubulungiseleli nempumelelo yomsebenzi owenziwa emhlabeni wonke.

16 Khuthaza Lo Mntu Ukuba Axhakamfule Amathuba Amaninzi Okunikela Ubungqina: Khankanya amathuba okuhlanganisana neqela lesifundo sencwadi ukuze kunikelwe ubungqina kwindlu ngendlu. Mkhuthaze ancokole nezalamane nabantu aqhelene nabo okanye athethe nabantu asebenza nabo okanye abo afunda nabo ngamaxesha esidlo sasemini. Xa ehamba ngezithuthi zikawonke wonke, usenokuqalisa incoko ngokubonisa umdla kwabo akhwele nabo. Xa siqalisa ngokwethu, oku kudla ngokuvula ithuba lokunikela ubungqina obusemagqabini. Enyanisweni kukho amathuba amaninzi okwabelana nabanye ngethemba lethu “imihla ngemihla.”—INdu. 96:2, 3.

17 Noko ke, bekungakuhle ukuba wena nomvakalisi omtsha nisebenze kunye kwindlu ngendlu ngokukhawuleza kangangoko kunokwenzeka. Ukuba uzibekele usukelo lokwandisa inkonzo yakho ebudeni buka-Aprili, cela isicaka sentsimi ukuba sikunike intsimi esebenzeka lula ukuba iyafumaneka. Oku kuya kukunika amathuba okuba uyisebenze ngokucokisekileyo. Ngokomzekelo, njengokuba ugqibezela inkonzo okanye usiya ezintlanganisweni okanye kwezinye iindawo, usenokuphawula ukuba kukho umntu kwikhaya ebekungakhange kufumaneke mntu kulo okanye apho kwakuboniswe umdla khona. Ukuba kunokwenzeka, batyelele ubethe koomofu ngexesha eliya kuba nemiphumo emihle. Oku kuya kukwenza uzive ufeze okuthile yaye uvuya kubulungiseleli.

18 Lungiselela Isigidimi Esinomtsalane: Yenye into ukuba nesabelo kwisigidimi soBukumkani, iphinde ibe yenye ukuzithemba xa uthetha, ngokukodwa ukuba umtsha okanye sele unethuba ungasayi enkonzweni. Ukunceda abatsha nabapholileyo balungiselele elo lixesha elisetyenziswe kakuhle. IiNtlanganiso zeNkonzo neentlanganiso zenkonzo yasentsimini zinokusinceda kakhulu, kodwa azikuthabatheli indawo ukulungiselela ngokobuqu.

19 Unokubanceda njani abasebatsha balungiselele inkonzo? Qala ngentshumayelo yokuhambisa amaphephancwadi, uze uyigcine ilula yaye imfutshane! Bacele bacinge ngeziganeko ekuthethwa ngazo ezindabeni ezinxunguphalisayo ekuhlaleni, uze usebenzise inqaku lelinye lamaphephancwadi akutshanje elinombandela ohlobeneyo naso. Yiqheliseleni kunye intshumayelo, uze uyisebenzise kubulungiseleli ngokukhawuleza kangangoko kunokwenzeka.

20 Ukulungiselela Ulwando Olunokubakho Kwixesha Elizayo: Kulo nyaka uphelileyo ababekho eSikhumbuzweni baye bangaphezu kwezigidi ezili-14,8. Inani labo banikela ingxelo njengabavakalisi libe ngaphezulwana kancinane kwezigidi ezithandathu. Oku kuthetha ukuba abantu abamalunga nezigidi ezisisi-8,8, babe nomdla wokuza kolu cwangciso lukhethekileyo ukuze beve ukucaciswa kwezinye zeemfundiso ezingundoqo zeBhayibhile. Baye babazi ngokobuqu abanye bethu, nto leyo enokuba yabachukumisa kakhulu. Abaninzi babo bathetha kakuhle ngathi, banikela ngokuthile emsebenzini wethu owenziwa ehlabathini lonke, yaye bayasithethelela kwabanye. Eli qela libonisa ulwando olunokubakho kwixa elizayo. Yintoni esinokuyenza ukubanceda benze inkqubela engakumbi?

21 Uninzi lwabo batsha beza eSikhumbuzweni beza kuba bemenywe ngomnye wethu. Oku kuthetha ukuba ubuncinane banomntu omnye abamqhelileyo kubaphulaphuli. Ukuba ubani uzile kuba esabela kwisimemo sethu, sinembopheleleko yokumenza azive amkelekile yaye simncede angenelwe ngokupheleleyo kucwangciso. Ekubeni iholo iza kube izele, mncede afumane isihlalo. Mboleke iBhayibhile, uze ucule naye. Yiphendule yonke imibuzo anokuba nayo. Ububele bakho bunokuba ngundoqo ekukhuliseni umdla wakhe. Kakade ke, yimbopheleleko yethu sonke leyo—ukuba sibona umntu omtsha, masimamkele ngokufudumeleyo size sincokole naye ukuze simazi.

22 Ukubakho eSikhumbuzweni kunokwenza lukhulu kwindlela ubani azijonga ngayo izinto. Isibakala sokuba eze entlanganisweni sinokubonisa ukuba akakakufumani oko akufunayo kwenye indawo yaye kumenza abe nento anokuyihlolisisa. Ingcaciso yelungiselelo lentlawulelo elingummangaliso isenokuthetha lukhulu emntwini ongenalo nofifi ngothando lukaYehova olungasikelwanga mda. Usenokukhawuleza abone ukuba sahlukile—sinyanisekile, sinobuhlobo, sinothando yaye sinentlonelo. Iholo yethu ayifani nezinto azibone ecaweni njengemifanekiso nezithethe ezingenantsingiselo. Ngokuqinisekileyo aba basebatsha baza kuphawula ukuba abaphulaphuli baneemvelaphi ezahlukahlukeneyo nokuba akukho nkongozelo. Olu tyelelo lunokuba lukhuthazo olunamandla lokuba babuye.

23 Emva kweSikhumbuzo, uthile ufanele alungele ukubuyela ngenjongo yokunceda wonke umntu omtsha oye wakho. Ukuba ubumeme abasebatsha, unembopheleleko ekhethekileyo. Ngaphambi kokuba banduluke, qinisekisa ukuba bayazi ngezinye iintlanganiso eziqhutyelwa kwiHolo yoBukumkani. Baxelele umxholo wentetho yesidlangalala elandelayo. Bazise indawo nexesha esiqhutywa ngalo iSifundo Sencwadi Sebandla esikufutshane nekhaya labo. Wandule ke, ubanike umbhalo wencwadi ethi Iphulo, ubazise ukuba ingxubusho ngeveki ka-Aprili 16 iza kube isithi “UbuKristu—Ngaba UYesu Wayeyindlela Yokuya KuThixo?”

24 Batyelele emakhayeni abo. Qinisekisa ukuba banayo incwadana enemifanekiso ethi Okufunwa NguThixo nencwadi ethi Ulwazi, ezibaqhelanisa neemfundiso ezisisiseko zeBhayibhile. Ukuba bebengekaqalisi ukufunda, cela ukubaqhubela isifundo seBhayibhile. Bacebise ukuba bafunde incwadana enemifanekiso ethi AmaNgqina KaYehova, ebonisa ngokucacileyo indlela esebenza ngayo intlangano. Bameme ukuze babone iividiyo zethu, njengaleyo ithi Our Whole Association of Brothers. Lungiselela ukuba badibane nabanye ebandleni. Kwiinyanga ezilandelayo, qhubeka uqhagamshelana nabasebatsha; bameme ukuba beze ezintlanganisweni xa umveleli wesiphaluka etyelele okanye xa ninendibano yesiphaluka okanye indibano ekhethekileyo yosuku olunye. Bavulele onke amathuba okuzingqina “benotyekelo olufanelekileyo ngobomi obungunaphakade”!—IZe. 13:48.

25 Oko Banokukwenza Abadala: Impumelelo kubulungiseleli kulo Aprili, ubukhulu becala iya kuxhomekeka kubadala. Ukuba ungumqhubi wesifundo sencwadi, yenza uludwe lwezinto onokuzenza ukuze uncede wonke ubani okwiqela lakho lesifundo sencwadi abe nenxaxheba kulo msebenzi ukhethekileyo. Ngaba bakho ababelwe kwiqela lakho abaselula, abatsha, abaxhiphulisayo okanye abapholileyo? Qinisekisa enoba abazali, oovulindlela okanye abanye abavakalisi benza okuthile ukuze babancede. Nikela naluphi na uncedo lobuqu onokulunikela. Omnye udade owayexhiphulisa kwinkonzo yasentsimini kangangeminyaka emibini uye wachitha iiyure ezingaphezu kwama-50 kulo Aprili udluleyo. Wancedwa yintoni? Uthi wancedwa ngamatyelelo okwalusa awenziwa ngabadala.

26 Abadala nezicaka zolungiselelo bafanele basebenzisane ukuqinisekisa ukuba kukho intsimi eyaneleyo, amaphephancwadi noncwadi oluza kuhanjiswa kwinyanga ezayo. Ngaba kunokulungiselelwa iintlanganiso zenkonzo yasentsimini ezingakumbi? Ukuba kunjalo, wachazeni la malungiselelo akhethekileyo. Ngaphezu kwako konke, kwimithandazo yenu yasesidlangalaleni nangasese, celani intsikelelo kaYehova kule nyanga yethu yomsebenzi woBukumkani owandisiweyo.—Roma 15:30, 31; 2 Tes. 3:1.

27 Kulo Aprili udluleyo kwibandla laseNorth Carolina, abadala bawukhuthaza ngokwenene umsebenzi owandisiweyo kubulungiseleli. Kwiintlanganiso veki nganye, bakhuthaza abavakalisi ukuba bahlolisise ngomthandazo enoba babengenakubhalisa kusini na njengoovulindlela abangabancedani. Ngamaxesha onke, bonke abadala nezicaka zolungiselelo babethetha ngehlombe ngokwenza uAprili abe yeyona nyanga isemagqabini. Ngenxa yoko, ama-58 ekhulwini abavakalisi, kuquka bonke abadala nezicaka zolungiselelo baba ngoovulindlela ngaloo nyanga!

28 Uvuyo Lokuba Nesabelo Ngokuzeleyo: Ziyintoni iintsikelelo ‘zokusebenza nzima nokuzibhokoxa’ kubulungiseleli? (1 Tim. 4:10) Ngokuphathelele inzondelelo yebandla labo kulo Aprili udluleyo, aba badala bakhankanywe ngasentla babhala: “Abazalwana noodade babesoloko bethetha ngothando nokusondelelana ngakumbi ababekuva ukususela oko baqalisa ukuzibhokoxa kubulungiseleli basentsimini.”

29 Umzalwana oselula owayengakwazi ukuhamba wayelangazelela ukuba nesabelo kumsebenzi okhethekileyo kulo Aprili udluleyo. Ngokuceba ngenyameko nangoncedo lukanina nabazalwana noodade bokomoya, wanandipha inyanga enemveliso njengovulindlela ongumncedani. Wavakalelwa njani ngala mava? Uthi: “Bekukokokuqala ebomini bam ukuba ndizive ndidlamke ngale ndlela.”

30 Ngokungathandabuzekiyo uYehova ubasikelela ngokutyebileyo abo balixabisa ngokwenene ilungelo labo lokuthetha ngoBukumkani bakhe. (INdu. 145:11, 12) Njengokuba sikhumbula ukufa kweNkosi yethu, siyaqonda ukuba iintsikelelo zozinikelo lobuthixo ziya kuba yintabalala kwixa elizayo. Umpostile uPawulos wayewulangazelela umvuzo wobomi obungunaphakade. Kanti, wayesazi ukuba wayengenakusuka ahlale asonge izandla kuba enethemba. Wabhala: “Ngenxa yoku ndisebenza nzima ngenene, ndizibhokoxa ngokuvumelana nokusebenza kwakhe okusebenzayo kum ngamandla.” (Kol. 1:29) UYehova, ngoYesu, wamenza wanamandla uPawulos ukuze afeze ubulungiseleli obusindisa ubomi, yaye Unokwenza okufanayo nakuthi namhlanje. Ngaba lawo iya kuba ngamava akho obuqu kulo Aprili?

[Ibhokisi ekwiphepha 3]

Ngubani Wena Onokumkhuthaza Ukuba Abe Ngumvakalisi NgoAprili?

Ngumntwana wakho?

Sisifundo seBhayibhile?

Ngumntu oye waphola?

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share