UYesu Kristu

Ingcaciso: Ngokuphela koNyana kaThixo amzeleyo, okuphela koNyana owaveliswa nguThixo eyedwa. Lo Nyana ulizibulo layo yonke indalo. Ngaye zonke ezinye izinto ezulwini nasemhlabeni zadalwa. Ungoyena mntu ungowesibini ngobukhulu kwindalo iphela. Ngulo Nyana uYehova awamthuma emhlabeni ukuba ancame ubomi bakhe njengentlawulelo yoluntu, ngaloo ndlela evulela indlela yobomi obungunaphakade kwabo benzala ka-Adam ababeya kuba nokholo. Kwalo Nyana, wabuyiselwa kuzuko lwasezulwini, ngoku ulawula njengoKumkani, unegunya lokuphelisa bonke ubungendawo nokuphumeza injongo kaYise yangaphambili ngomhlaba. Imo yesiHebhere yegama elithi Yesu ithetha ukuthi “uYehova Ulusindiso”; elithi Kristu liyafana nelesiHebhere elithi Ma·shiʹach (uMesiya), gama elo elithetha “UMthanjiswa.”

Ngaba uYesu Kristu wayengumntu wokwenene nowayekho kwimbali?

IBhayibhile ibubungqina obuphambili bokuba uYesu Kristu ungumntu owayekho embalini. Ingxelo ekwiiVangeli asikokubaliswa nje kweziganeko ngokungacacanga nokuthetha ngexesha elithile ekungaqinisekwanga ngalo nendawo engenagama. Ngokucacileyo ichaza ixesha nendawo ngokweenkcukacha ezinkulu. Ngokomzekelo, bona uLuka 3:1, 2, 21-23.

Umbhali-mbali ongumYuda wenkulungwane yokuqala ogama linguJosephus wathetha ngokuxulutywa ngamatye “kukaYakobi, umntakobo Yesu owayebizwa ngokuba unguKristu.” (The Jewish Antiquities, Josephus, iNcwadi XX, ica. 200) Imbekiselo engoYesu engqalileyo nethandwa gqitha, efumaneka kwiNcwadi XVIII, icandelo 63, 64, iye yacelw’ umngeni ngabathile abathi imele ukuba yongezelelwa kamva okanye yahonjiswa ngamaKristu; kodwa kuyavunywa ukuba isigama nohlobo ebhalwe ngalo ngokusisiseko lolo lukaJosephus, ibe esi sicatshulwa sifunyanwa kuyo yonke imibhalo-ngqangi efumanekayo.

UTacitus, umbhali-mbali ongumRoma owayephila kwinxalenye yokugqibela yenkulungwane yokuqala C.E.; wabhala oku: “UChristus [igama lesiLatini elithetha “uKristu”], eliphuma kulo igama elithi [umKristu], weva ubunzima besohlwayo esiqatha ebudeni bolawulo lukaTiberius ezandleni zomnye ummeli wethu, uPontius Pilatus.”—The Complete Works of Tacitus (New York, 1942), “The Annals,” iNcwadi 15, isiqe. 44.

Ibhekisela kwiincwadi zokuqala ezingokwembali nezingezozamaKristu ezazingoYesu, iThe New Encyclopædia Britannica ithi: “Ezi ngxelo zizimeleyo zingqina ukuba kumaxesha amandulo kwanabachasi bobuKristu abazange babuthandabuze ubukho obungokwembali bukaYesu, obabuphikwa okokuqala ibe ngezizathu ezinganelisiyo ngababhali abaliqela ekupheleni kwenkulungwane ye-18, ebudeni beye-19, nasekuqalekeni kweyama-20.”—(1976), Macropædia, Umqu. 10, iphe. 145.

Ngaba uYesu Kristu wayeyindoda nje elungileyo?

Into ebangela umdla kukuba, uYesu wayikhalimela indoda eyathi kuye “Mfundisi Olungileyo,” kuba uYesu wayengazigqali yena ngokwakhe kodwa wayegqala uYise inguye owayengumlinganiselo wokulunga. (Marko 10:17, 18) Noko ke, ukuze abe koko abantu ngokuqhelekileyo basingisele kuko xa besithi uthile ulungile, uYesu ngokuqinisekileyo umele ukuba wayengonenyaniso. Eneneni, kwaneentshaba zakhe zavuma ukuba wayenjalo. (Marko 12:14) Nguye ngokwakhe owathi wayekhe waphila ngaphambi kokuba ngumntu, nokuba wayenguNyana oncamisileyo kaThixo nowathi wayenguMesiya, lowo ukuza kwakhe kwaxelwa kwangaphambili kuzo zonke iZibhalo zesiHebhere. Enoba wayeyiloo nto wathi uyiyo okanye umhanahanisi ombi, kodwa akukho nto ivumayo ukuba kuthiwe wayeyindoda nje elungileyo.—Yoh. 3:13; 10:36; 4:25, 26; Luka 24:44-48.

Ngaba uYesu wayengumprofeti nje owayenegunya elifana nelo likaMoses, uBhuda, uMohamedi, nezinye iinkokeli zonqulo?

UYesu wafundisa ukuba wayenguNyana okhethekileyo kaThixo (Yoh. 10:36; Mat. 16:15-17), ukuba wayenguMesiya owaxelwa kwangaphambili (Marko 14:61, 62), ukuba wayekhe waphila ngaphambi kokuba ngumntu ezulwini (Yoh. 6:38; 8:23, 58), ukuba wayeza kubulawa aze ke avuselwe ebomini ngosuku lwesithathu yaye emva koko abuyele emazulwini. (Mat. 16:21; Yoh. 14:2, 3) Ngaba la mabango ayeyinyaniso, ibe ngaloo ndlela wayahluke ngokwenene kubo bonke abanye abaprofeti bokwenyaniso bakaThixo yaye ahluke gqitha kuzo zonke iinkokeli zonqulo ezizibiza njalo? Ubunyaniso balo mbandela babuya kucaca ngosuku lwesithathu lokufa kwakhe. Ngaba uThixo ngoko wamvusa kwelabafileyo, ngaloo ndlela eqinisekisa ukuba uYesu Kristu wayethetha inyaniso ibe eneneni wayenguNyana kaThixo oncamisileyo? (Roma 1:3, 4) Angaphezu kwama-500 amangqina ambona ngokwenene uYesu ephilile emva kovuko lwakhe, ibe abapostile bakhe abathembekileyo babengamangqina okuzibonela njengoko wayeqalisa ukubuyela emva ezulwini yaye esithi shwaka emehlweni abo esemafini. (1 Kor. 15:3-8; Ize. 1:2, 3, 9) Ngoko babeyiseke ngokwenene ukuba wayevusiwe kwelabafileyo kangangokuba abaninzi babo bachanaba ubomi babo bexelela abanye ngako oku.—Ize. 4:18-33.

Kutheni le nto amaYuda ngokubanzi engazange amamkele uYesu njengoMesiya?

IEncyclopaedia Judaica ithi: “AmaYuda ethuba lamaRoma [uMesiya] amkholelwa njengoya kuveliswa nguThixo ukuze aphule idyokhwe yabahedeni aze alawule kuBukumkani obumiselweyo bukaSirayeli.” (Jerusalem, 1971, Umqu. II, umhl. 1407) Ayefuna ukukhululeka kwidyokhwe yeRoma. Imbali yamaYuda iqinisekisa ukuba ngokwesiprofeto sikaMesiya esibhalwe kuDaniyeli 9:24-27 kwakukho amaYuda awayelindele uMesiya ebudeni benkulungwane yokuqala C.E. (Luka 3:15) Kodwa eso siprofeto sasikwanxibelelanisa ukuza kwakhe ‘nokuphelisa isono,’ yaye uIsaya isahluko 53 wabonisa ukuba uMesiya wayeza kufa ukuze oku kube nokwenzeka. Noko ke, amaYuda ngokubanzi aba noluvo lokuba akuyomfuneko ngaye nabani na ukuba afele izono zawo. Ayekholelwa ukuba ayenokuma okulungileyo noThixo ngenxa yokuba ayeyinzala ka-Abraham. IA Rabbinic Anthology ithi, “[Ukufaneleka] kuka-Abraham kukhulu gqitha kangangokuba kunokucamagushela lonke ikratshi nobuxoki obuthethwe nguSirayeli kweli hlabathi.” (London, 1938, C. Montefiore noH. Loewe, iphe. 676) Ngokuchasa kwawo uYesu njengoMesiya, amaYuda azalisekisa isiprofeto esasixele kwangaphambili oku ngaye: “Udeliwe, ushiyiwe ngabantu.”—Isa. 53:3.

Ngaphambi kokufa kwakhe, uMoses waxela kwangaphambili ukuba uhlanga lwaluya kutyeka kunqulo lokwenyaniso nokuba, ngenxa yoko, lwaluya kuhlelwa yintlekele. (Funda iDuteronomi 31:27-29.) Incwadi yaBagwebi iqinisekisa ukuba oku kwenzeka ngokuphindaphindiweyo. Ngemihla yomprofeti uYeremiya, ukungathembeki kolo hlanga kwakhokelela ekubeni olu hlanga luthinjelwe eBhabhiloni. Kutheni le nto uThixo wakwavumela amaRoma ukuba atshabalalise iYerusalem netempile yayo ngowama-70 C.E.? Kukuphi ukungathembeki olo hlanga olwalunako ukuze uThixo angalukhuseli njengoko wayenzile xa lwalukholose ngaye? Ngaphambi nje koku lwathi lwachasa uYesu njengoMesiya.

Ngaba uYesu Kristu ngokwenene unguThixo?

Yoh. 17:3: “[UYesu wathandaza kuYise wathi:] Bubo ke obu ubomi obungunaphakade, ukuba mabakwazi, wena ukuphela koThixo oyinyaniso [“wena nguwe wedwa uThixo oyinyaniso,” NE], naye uYesu Kristu omthumileyo.” (Phawula ukuba uYesu akazange abhekisele kuye kodwa kuYise ezulwini ‘njengokuphela koThixo oyinyaniso.’)

Yoh. 20:17: “Uthi uYesu kuye [uMariya waseMagadala], Ungandichukumisi; kuba andikanyuki ndiye kuBawo; ke yiya kubazalwana bam, uthi kubo, Ndiyenyuka, ndiya kuBawo, kuYihlo; kuThixo wam, kuThixo wenu.” (Ngoko kuYesu ovusiweyo, uYise wayenguThixo, kanye njengokuba uYise wayenguThixo kuMariya waseMagadala. Okubangel’ umdla kukuba, akukho nanye indawo eZibhalweni apho sifumana uYise esithi kuNyana “Thixo wam.”)

Bona kwanephepha 45, 50, 51, phantsi komxholo othi “UBathathu Emnye.”

Ngaba uYohane 1:1 ungqina ukuba uYesu unguThixo?

Yoh. 1:1: “Ekuqalekeni ube ekho uLizwi, waye uLizwi ekuye uThixo, waye uLizwi enguThixo [kwaneAP, TE, KJ, JB, Dy, Kx, NAB].” INE ifundeka ngolu hlobo “oko uThixo wayekuko, koko uLizwi wayekuko.” IMo ithi “uLizwi wayengokobuthixo.” IAT neSd zisixelela ukuba “uLizwi wayengokobuthixo.” Inguqulelo yeelwimi ezahlukahlukeneyo yeED ithi “uthixo wayenguLizwi.” INW ifundeka ngokuthi “uLizwi wayenguthixo”; iNTIV isebenzisa amazwi afanayo.

Yintoni le ibonwa ngaba baguquleli kwisiHebhere eshukumisa abathile babo ukuba bangatsho ukuba “uLizwi wayenguThixo”? Idefinite article (enguho) ibonakala ingaphambi kothe·osʹ (uThixo) kodwa ayibonakali ngaphambi kowesibini. Xa kubonakala iarticle kwisibizo oko kuthetha ukuba elo ligama lomntu, ngoxa xa isibizo sikwisinye yaye singenayo iarticle ibe singaphambi kwesenzi (njengoko esi sivakalisi sakhiwe njalo kwisiGrike) kubonisa ukuba olo luphawu olungothile. Ngoko esi sibhalo asitsho ukuba uLizwi (uYesu) wayekwanguThixo awayekunye naye kodwa, kunoko, sithi uLizwi wayekwimo yobuthixo, engokobuthixo, enguthixo. (Bona iNW uhlelo oluneeMbekiselo lowe-1984, iphe. 1579.)

Wayetheth’ ukuthini umpostile uYohane xa wabhala uYohane 1:1? Ngaba wayethetha ukuba uYesu unguThixo ngokwakhe okanye mhlawumbi wayethetha ukuba uYesu unguThixo omnye noYise? Kwakweso sahluko, kwindinyana 18, uYohane wabhala oku: “Akukho namnye [“akukho mntu,” AP, KJ, Dy] wakha wambona uThixo; uNyana okuphela kwamzeleyo [“okuphela kothixo ozelweyo,” NW], lowo usesifubeni sikaYise, nguye ocacise oko.” Ngaba kwakukho nabaphi na abantu abakhe babona uYesu Kristu, uNyana? Ewe bakho! Ke ngoko, ngaba uYohane wayethetha ukuba uYesu unguThixo? Ngokucacileyo wayengathethi oko. Ngasekupheleni kweVangeli yakhe, uYohane washwankathela imicimbi, esithi: “Ibhalelwe ukuze nikholwe ukuba uYesu unguye uKristu, [akangoThixo, kodwa unguye] uNyana kaThixo.”—Yoh. 20:31.

Ngaba ukukhuza kukaTomas kuYohane 20:28 kungqina ukuba uYesu ngokwenyaniso unguThixo?

UYohane 20:28 ufundeka ngolu hlobo: “Uphendule uTomas, wathi kuye, Nkosi yam, Thixo wam!”

Alichasekanga elokuba kubhekiselwe kuYesu ‘njengoThixo,’ ukuba oku koko uTomas wayekucinga. Oku bekuya kuvisisana nengcaphulo kaYesu ephuma kwiiNdumiso ekwathiwa kuzo amadoda anamandla, abagwebi, ‘bangoothixo.’ (Yoh. 10:34, 35; INdu. 82:1-6) Kakade ke, uKristu ukwisigxina esiphakame kakhulu kunamadoda anjalo. Ngenxa yokukhetheka kwesigxina sakhe ngokuhlobene nesikaYehova, kuYohane 1:18 (NW) kubhekiselwa kuYesu ‘njengokuphela kothixo ozelweyo.’ (Bona kwaneRo, By.) UIsaya 9:6 ngokuprofetayo naye uchaza uYesu ‘njengoThixo oligorha,’ kodwa akutshiwo ukuba unguThixo uSomandla. Konke oku kuvisisana nokuchazwa kukaYesu ‘njengothixo,’ okanye “ongokobuthixo,” kuYohane 1:1 (NW, AT).

Umongo uyasinceda ukuba sifikelele kwisigqibo esifanelekileyo koku. Ngaphambi nje kokufa kukaYesu, noTomas wayemvile uYesu ethandaza apho wathi wabhekisa kuYise ‘njengokuphela koThixo oyinyaniso.’ (Yoh. 17:3) Emva kokuvuka kukaYesu wayethumele isigidimi kubapostile bakhe, kuquka noTomas, awathi kuso wathetha oku: “Ndiyenyuka, ndiya . . . kuThixo wam, kuThixo wenu.” (Yoh. 20:17) Emva kokubhala oko uTomas wayekuthethile xa wambona ngokoqobo waza wachukumisa uKristu ovusiweyo, umpostile uYohane wathi: “Le ibhalelwe ukuze nikholwe ukuba uYesu unguye uKristu, uNyana kaThixo, nokuze nithi, nikholwa, nibe nabo ubomi egameni lakhe.” (Yoh. 20:31) Ngoko, ukuba nabani na uye wagqiba ngokwendlela uTomas awakhuza ngayo ukuba uYesu ‘ungokuphela koThixo oyinyaniso’ okanye uYesu “unguThixo uNyana” oyinxalenye kaBathathu Emnye, kufuneka abuye akukhangele oko uYesu wakuthethayo (kwindi. 17) aze akhangele nakumazwi okugqibela achazwe ngokucacileyo ngumpostile uYohane (indi. 31).

Ngaba uMateyu 1:23 ubonisa ukuba uYesu xa wayesemhlabeni wayenguThixo?

Mat. 1:23: “Yabonani, intombi le iya kumitha izale unyana, bambize ngegama elinguImanuweli, oko kukuthi ngentetho evakalayo, uThixo unathi.”

Ekuvakaliseni ukuzalwa kukaYesu okwakuseza, ngaba isithunywa sezulu sikaYehova sathi lo mntwana wayeza kuba nguThixo ngokwakhe? Akunjalo, kwathiwa: “Yena uya kuba mkhulu, abizwe ngokuba nguNyana wOsenyangweni.” (Luka 1:32, 35; likekeliswe sithi.) Ibe uYesu akazange athi unguThixo kodwa, kunoko, wathi ‘unguNyana kaThixo.’ (Yoh. 10:36, likekeliswe sithi.) UYesu wayethunywe ehlabathini nguThixo; ngoko ngalo Nyana okuphela kozelweyo, uThixo wayenoluntu.—Yoh. 3:17; 17:8.

Kwakungeyonto ingaqhelekanga ngamagama esiHebhere ukuba aquke igama likaThixo okanye kwanemo eshunqulelweyo yegama likaThixo lobuqu. Ngokomzekelo, uEliyata uthetha ukuba “uThixo uzile”; uYehu uthetha ukuba “uYehova uNguye”; uEliya uthetha ukuba “uThixo wam unguYehova.” Kodwa akukho nalinye kula magama elalithetha ukuba lo wayethiywe elo gama wayenguThixo ngokwakhe.

Iyintoni intsingiselo kaYohane 5:18?

Yoh. 5:18: “Ngenxa yoko ke ayefuna ngakumbi amaYuda ukumbulala; ngokuba ubengaphule sabatha yodwa, wayetshilo nokuthi, uThixo ngowakhe uYise, ezenza alingane noThixo.”

YayingamaYuda angakholwayo awayeqiqa ukuba uYesu wayelinga ukuzenza alingane noThixo ngokuthi uThixo unguYise. Ngoxa ngokufanelekileyo wayebhekisela kuThixo njengoYise, uYesu akazange athi wayelingana noThixo. Ngokungqalileyo wawaphendula amaYuda wathi: “Inene, inene, ndithi kuni, UNyana akanakwenza nto ngokwakhe, engathanga abone uYise eyenza.” (Yoh. 5:19; bona kwanoYohane 14:28; Yohane 10:36.) Yayikwangaloo maYuda angakholwayo nawathi uYesu wayesaphula iSabatha, kodwa ayekwaphosisile nangaloo nto. UYesu wayegcina umthetho ngokugqibeleleyo, ibe wathi: “Kuvumelekile ukwenza okulungileyo ngesabatha.”—Mat. 12:10-12.

Ngaba isibakala sokuba unqulo lunikelwa kuYesu singqina ukuba unguThixo?

KumaHebhere 1:6, izithunywa zezulu ziyalelwa ukuba “zimnqule” uYesu, ngokutsho kwenguqulelo yeTE, RS, TEV, KJ, JB, neNAB. INW ithi “mazizithobe kuye.” KuMateyu 14:33, abafundi bakaYesu kuthiwa “bamnqula,” ngokutsho kweRS, TEV, KJ; ezinye iinguqulelo zithi “babonakalisa intlonelo kuye” (NAB) “baqubuda kuye” (BX, TE, JB), “bawa ezinyaweni zakhe” (NE), “bazithoba kuye” (NW).

Igama lesiGrike eliguqulelwe ngokuthi ‘ukunqula’ lithi prosky·neʹo, iA Greek-English Lexicon of the New Testament and Other Early Christian Literature ethi ngalo “lalisetyenziswa ukubonisa isiko lokuqubuda kukabani phambi komntu aze ange iinyawo zakhe, umqukumbelo wengubo yakhe, umgangatho.” (Chicago, 1979, Bauer, Arndt, Gingrich, Danker; uhlelo lwesibini lwesiNgesi; iphe. 716) Eli ligama elisetyenziswe kuMateyu 14:33 ukuchaza oko abafundi bakwenzayo kuYesu; kumaHebhere 1:6 ukubonisa oko izithunywa zezulu zimele kukukwenza kuYesu; kwiGenesis 22:5 ngokweSeptuagint yesiGrike ukuchaza oko uAbraham wakwenzayo kuYehova nakwiGenesis 23:7 ukuchaza oko uAbraham wakwenzayo, ngokuvisisana nesiko lelo xesha, ebantwini awayeshishina nabo; kweyoku-1 yooKumkani 1:23 ngokweSeptuagint ukuchaza isenzo somprofeti uNatan xa wayesondela kuKumkani uDavide.

KuMateyu 4:10, uYesu wathi: “YiNkosi uThixo wakho oya kuqubuda [eliphuma kwelithi pro·sky·neʹo] kuyo, ukhonze yona yodwa.” (KwiDuteronomi 6:13, ngokucacileyo uYesu acaphula yona apha, kubonakala igama lobuqu likaThixo, iTetragrammaton.) Ngokuvisisana noko, simele siqonde ukuba nguprosky·neʹo ngesimo esithile sentliziyo nengqondo omele alathiselwe kuThixo kuphela.

Ngaba imimangaliso eyenziwa nguYesu ingqina ukuba unguThixo?

Ize. 10:34, 38: “UPetros wawuvula umlomo wakhe wathi, . . . UThixo wamthambisa ngoMoya oyiNgcwele nangamandla uYesu waseNazarete, owagqiba ilizwe esiza, ephilisa bonke abaxinzelelweyo nguye uMtyholi; ngokuba uThixo ubenaye.” (Ngoko uPetros akazange agqibe ngokwemimangaliso ukuba wayebonile ukuba uYesu wayenguThixo kodwa, kunoko, wagqiba kwelokuba uThixo wayekunye noYesu. Thelekisa uMateyu 16:16, 17.)

Yoh. 20:30, 31: “Mininzi ke okunene neminye imiqondiso [“imimangaliso,” AP, TEV, Kx] awayenzayo uYesu emehlweni abafundi bakhe, engabhalwanga kuyo le ncwadi; kodwa le ibhalelwe ukuze nikholwe ukuba uYesu unguye uKristu, uNyana kaThixo, nokuze nithi, nikholwa, nibe nabo ubomi egameni lakhe.” (Ngoko isigqibo ngokufanelekileyo esimele sifikelele kuso ngemimangaliso sesokuba uYesu ‘unguKristu,’ uMesiya, “uNyana kaThixo.” Ibinzana elithi “uNyana kaThixo” lahluke gqitha kwelithi “uThixo uNyana.”)

Abaprofeti ababengaphambi kwexesha lobuKristu abanjengoEliya noElisha benza imimangaliso efana naleyo kaYesu. Kanti ngokuqinisekileyo oko asibobungqina bokuba babenguThixo.

Ngaba uYesu uyafana noYehova ‘kwiTestamente Endala’?

Bona iphepha 394, phantsi komxholo omkhulu othi “UYehova.”

Ngaba ukukholelwa kuYesu Kristu kuko konke okufunekayo ukuze sisindiswe?

Ize. 16:30-32: “Zinkosi, ndimelwe kukuthini na, ukuze ndisindiswe? Bathi ke bona [uPawulos noSilas], Kholwa kuyo iNkosi uYesu Kristu, wosindiswa wena nendlu yakho. Balithetha kuye ilizwi leNkosi [“likaThixo,” NAB, kwanombhalo osemazantsi weJB neNE; “isigidimi sikaThixo,” AT], nakubo bonke ababesendlwini yakhe.” (Ngaba ‘ukukholwa kwaloo ndoda eNkosini uYesu’ kwakungumcimbi nje wokuthi ngokunyanisekileyo yayikholwa? UPawulos wabonisa ukuba kwakufuneka okungakumbi—okukoku, ulwazi nokwamkela iLizwi likaThixo, njengoko uPawulos noSilas ngoku bahlabela mgama belishumayela kumgcini-mabanjwa. Ngaba ukukholelwa komntu kuYesu bekuya kuba kokwenyaniso ukuba ebengamnquli uThixo uYesu amnqulayo, ukuba ebengakusebenzisi oko uYesu wakufundisayo ngokubhekisele kuhlobo lwabantu abafundi bakhe abamele babe lulo, okanye ukuba ebengawenzi umsebenzi uYesu awayalela abalandeli bakhe ukuba bawenze? Asinakuzenza silufanelekele usindiso; lunokufumaneka kuphela ngesizinzi sokukholwa kwixabiso ledini lobomi bobuntu bukaYesu. Kodwa ubomi bethu bumele buhambisane nokholo esithi sinalo, nakubeni oko kusenokuquka ubunzima. KuMateyu 10:22 uYesu wathi: “Onyamezeleyo kwada kwaba sekupheleni, uya kusindiswa yena.”)

Ngaba uYesu wayekhe waphila ezulwini ngaphambi kokuba ngumntu?

Kol. 1:15-17: “[UYesu] umfanekiselo kaThixo ongenakubonwa, owamazibulo kwindalo yonke. . . . Zonke izinto zidalwe nguye, zidalelwe yena. Yena ke ungaphambi kweento zonke.”

Yoh. 17:5: “[Emthandazweni uYesu wathi:] Ndizukise ke ngoku, wena Bawo, kuwe ngokwakho, ngozuko ebendinalo kuwe, lingekabikho ihlabathi.” (KwanoYohane 8:23)

Ngaba uYesu unomzimba wakhe wenyama ezulwini?

1 Kor. 15:42-50: “Lunjalo ke kanye novuko lwabafileyo. Umzimba uhlwayelwa unokonakala, uvuka ungenakonakala. . . . Kuhlwayelwa umzimba ongowemvelo, kuvuka umzimba ongowomoya. . . . Ngokunjalo kubhaliwe kwathiwa, Owokuqala umntu uAdam waba ngumphefumlo odla ubomi; owokugqibela uAdam [uYesu Kristu, owayengumntu ofezekileyo njengokuba uAdam wayenjalo ekuqalekeni] waba nguMoya odlisa ubomi. . . . Ke, bazalwana, nditsho ukuthi, inyama negazi azinako ukubudla ilifa ubukumkani bukaThixo; nokonakala akunakukudla ilifa ukungonakali.” (Likekeliswe sithi.)

1 Pet. 3:18: “NoKristu wabuva kwakanye ubunzima ngenxa yezono, . . . ebulewe okunene esenyameni, kodwa edliswe ubomi ekuwo umoya [“ekuwo umoya,” NE, AT, JB, Dy].” (Bona iphepha 368.)

Umzekeliso: Ukuba umntu uhlawula ityala lomhlobo wakhe kodwa ke ngokukhawuleza ayibuyisele kuye intlawulo, ngokucacileyo ityala liyaqhubeka. Ngokukwanjalo, ukuba, xa wavuswayo, uYesu wayewuthabathele kuye umzimba wakhe wobuntu ongowenyama negazi, owawunikelwe njengedini lokuhlawula ixabiso lentlawulelo, oko kwakuya kuba nawuphi umphumo kwilungiselelo awayelenza lokukhulula abantu abathembekileyo kwityala lesono?

Kuyinyaniso ukuba uYesu wabonakala ngokwenyama kubafundi bakhe emva kovuko lwakhe. Kodwa izihlandlo ezithile, kutheni le nto ekuqaleni babengamqondi? (Luka 24:15-32; Yoh. 20:14-16) Ngasihlandlo sithile, ukuze kungenelwe uTomas, uYesu wabonakala ngomzimba wenyama owawunobungqina beziva zezikhonkwane ezandleni zakhe nenxeba lekrele ecaleni. Kodwa kwenzeka njani ukuba ngeso sihlandlo athi ngequbuliso abonakale phakathi kwabo nakubeni iingcango zazivaliwe nje? (Yoh. 20:26, 27) Ngokucacileyo uYesu wazambathisa imizimba ngezi zihlandlo, njengoko izithunywa zezulu zazenjenjalo kwixa elingaphambili xa zazibonakala ebantwini. Ukushenxisa umzimba kaYesu wenyama ngexesha lokuvuka kwakhe kwakungeyongxaki kuThixo. Into ebangel’ umdla kukuba, nangona umzimba wenyama uThixo engazange awushiye engcwabeni (ngokucacileyo ukuze aqinise ukholo lwabafundi ngento yokuba uYesu ngokwenene wayevusiwe), amalaphu elinen awayebotshwe ngawo ayeshiwe apho; kanti, uYesu ovusiweyo wayesoloko ebonakala enxibe ngokupheleleyo.—Yoh. 20:6, 7.

Ngaba uYesu Kristu ukwangumntu ekuthiwa nguMikayeli isiphatha-zithunywa zezulu?

Igama lalo Mikayeli libonakala izihlandlo ezihlanu kuphela eBhayibhileni. Umntu ongumoya ozukileyo oneli gama kuthethwa ngaye ‘njengomnye wabathetheli abaziintloko,’ ‘umthetheli omkhulu, omela oonyana babantu bakowenu [bakuloDaniyeli],’ nangokuthi “isiphatha-zithunywa zezulu.” (Dan. 10:13; 12:1; Yuda 9) Igama elithi Mikayeli lithetha “Ngubani OnjengoThixo?” Ngokucacileyo eli gama lichaza uMikayeli njengokhokelayo ekuxhaseni ulongamo lukaYehova nasekutshabalaliseni iintshaba zikaThixo.

Kweyoku-1 yabaseTesalonika 4:16, umyalelo kaYesu Kristu wokuqaliswa kovuko uchazwa ‘njengelizwi lesiphatha-zithunywa,’ ibe uYuda 9 uthi isiphatha-zithunywa zezulu nguMikayeli. Ngaba bekuya kufaneleka ukufanisa ilizwi likaYesu lokuyalela nelo lothile ongaphantsi ngegunya? Ngoko, ngokusengqiqweni, uMikayeli osisiphatha zithunywa zezulu unguYesu Kristu. (Okubangel’ umdla kukuba, ibinzana elithi “isiphatha-zithunywa zezulu” alize lifunyanwe likwimo yesininzi kwiZibhalo, ngaloo ndlela kubonisa ukuba sinye kuphela.)

ISityhilelo 12:7-12 sithi uMikayeli nezithunywa zezulu zakhe ulwa noSathana aze amphose yena nezithunywa zakhe ezingendawo ngaphandle ezulwini ngokunxibelelene nokujizekwa kwegunya lokulawula kukaKristu. Kamva uYesu uchazwa njengokhokela imikhosi yezulu kwimfazwe enxamnye neentlanga zehlabathi. (ISityhi. 19:11-16) Akukho ngqiqweni na ukuthi uYesu wayeza kuba kwangulowo wenza okuthile nxamnye nalowo uchazwe ‘njengomlawuli weli hlabathi,’ uSathana uMtyholi? (Yoh. 12:31) UDaniyeli 12:1 unxulumanisa ‘ukuma kukaMikayeli’ ephumeza isenzo ngegunya ‘nexesha lembandezelo engazange ibekho enjalo, ukususela koko lwabakhoyo uhlanga, kude kube lelo xesha.’ Ngokuqinisekileyo oko bekuya kuwafanela amava eentlanga xa uKristu njengomgwebi wasezulwini esenza okuthile nxamnye nazo. Ngoko ubungqina bubonisa ukuba uNyana kaThixo wayesaziwa njengoMikayeli ngaphambi kokuza emhlabeni ibe ukwaziwa nangelo gama ukususela ekubuyeleni kwakhe ezulwini apho ahlala khona njengoNyana kaThixo ongumoya nozukisiweyo.

Ukuba Ubani Uthi—

‘Anikholelwa kuYesu’

Usenokuphendula uthi: ‘Ngokucacileyo wena ungumntu okholelwayo kuYesu. Ibe nam ndinjalo; kungenjalo ngendingekho apha endlwini yakho namhlanje.’ Mhlawumbi usenokongeza uthi: ‘Enyanisweni, ukubaluleka kokholo kuYesu kubalaseliswa ngokugqithiseleyo kwiimpapasho zethu. (Tyhila isahluko esifanelekileyo kuyo nayiphi na incwadi oyinikelayo uze usebenzise esi sahluko njengesiseko sengxubusho, ubalaselisa indima yakhe njengoKumkani. Okanye funda okuchazwe kwiphepha 2 leMboniselo, ngenjongo yeli phephancwadi.)’

Okanye unokuthi: ‘Ungakhathazeka na ukuba ndikubuza isizathu sokuba uvakalelwe ngaloo ndlela?’

Enye indlela: ‘Kucacile ukuba kukho umntu okuxeleleyo oko, kodwa mandikuxelele ukuba akunjalo, kuba sinokholo olunamandla kuYesu Kristu.’ Mhlawumbi usenokongeza uthi: (1) ‘Kodwa asikholelwa kwinto yonke abantu abayithethayo ngoYesu. Ngokomzekelo, bambi bathi wayengumntu nje olungileyo, kwakungenjalo ngoNyana kaThixo. Asikukholelwa oko, ngaba wena uyakukholelwa? . . . Asikuko okufundiswa yiBhayibhile.’ (2) ‘Asizikholelwa iimfundiso zamaqela aphikisa oko uYesu wakuthethayo ngolwalamano lwakhe noYise. (Yoh. 14:28) UYise umnike igunya lokulawula elichaphazela ubomi bethu sonke namhlanje. (Dan. 7:13, 14)’

‘Ngaba uyamamkela uYesu njengoMsindisi wakho?’

Usenokuphendula uthi: ‘Ngokucacileyo iBhayibhile ithi . . . (caphula IZenzo 4:12). Ndiyakukholelwa oko. Kodwa nam ndifundile ukuba kukho iimbopheleleko ezinzulu ezihambisana noko. Kwenzeka njani oko? Kaloku, ukuba ngokwenene ndiyakholelwa kuYesu, ngoko andinakukholelwa kuye nje ngokwendlela ebonakala indilungela.’ Mhlawumbi usenokongeza uthi: ‘Ubomi bakhe obufezekileyo obanikelwa njengedini bubangela kube nokwenzeka ngathi ukuba sixolelwe izono. Kodwa ndiyazi ukuba kukwabalulekile ukunikela ingqalelo kwimiyalelo yakhe ngeembopheleleko zethu njengamaKristu. (Ize. 1:8; Mat. 28:19, 20)’

Okanye unokuthi: ‘(Emva kokuqinisekisa ukuba uyakholelwa kuYesu njengoMsindisi, kungekuphela nje wena, kodwa bonke abanokholo kuye . . . ) Kubalulekile ukuba sisabele ngoxabiso kungekuphela nje koko wakwenzayo kwixa elidlulileyo kodwa nakoko akwenzayo ngoku. (Mat. 25:31-33)’

‘UYesu ndimamkele njengoMsindisi wam’

Usenokuphendula uthi: ‘Ndiyavuya kukuva ukuba uyakholelwa kuYesu, kuba namhlanje kukho abantu abaninzi gqitha abangakucingiyo oko uYesu wasenzela kona. Ngokungathandabuzekiyo usazi kakuhle isibhalo esikuYohane 3:16, andibi kunjalo? . . . Kodwa baya kuphila phi abantu abanjalo ngonaphakade? Bambi baya kuba noKristu ezulwini. Kodwa ngaba iBhayibhile ibonisa ukuba bonke abantu abalungileyo bayaya apho? (Mat. 6:10; 5:5)’