IiNdibano Zethu ZeSithili—Ubungqina Obunamandla Benyaniso
1. Imithendeleko eyayisibakho rhoqo ngonyaka yayinika amaSirayeli ithuba lokucinga nokuncokola ngaziphi iinyaniso zonqulo ezibalulekileyo?
1 USirayeli wamandulo wayehlanganisana kathathu ukuze aye kwimithendeleko eyayisibakho rhoqo ngonyaka. Nangona yayingamadoda kuphela ekwakufuneka aye, iintsapho zazidla ngokuya eYerusalem ukuze zibekho kwezi ndibano ekwakusonwatywa kuzo. (Dut. 16:15, 16) Abantu ababesiya apho babefumana ithuba lokucamngca nelokuncokola ngeenyaniso zonqulo ezibalulekileyo. Ziziphi ezinye zezi nyaniso? Enye, yeyokuba uYehova nguThixo onobubele nonothando. (Dut. 15:4, 5) Enye, yeyokuba sinokumthemba ukuze asikhokele aze asikhusele. (Dut. 32:9, 10) AmaSirayeli ayefumana nethuba lokuqonda ukuba, ekubeni ayebizwa ngegama likaYehova ayefanele aphile ngokuvisisana neendlela zakhe zobulungisa. (Dut. 7:6, 11) Nathi ziyasinceda iindibano zethu zesithili ezibakho rhoqo ngonyaka.
2. Izinto eziza kufundiswa kwindibano yesithili ziza kuyenza njani icace nangakumbi inyaniso?
2 Izinto Ezifundiswayo Ziyenza Icace Nangakumbi Inyaniso: Kwiindibano zethu zesithili kubakho iintetho, iidrama, imiboniso kunye nodliwano-ndlebe oluzenza zicace nangakumbi iinyaniso ezibalulekileyo zeBhayibhile. (Yoh. 17:17) Sithethanje, mkhulu umsebenzi osele wenziwe kulungiselelwa le ndibano yesithili siya kuyo. Intlangano kaYehova ilungiselela ucwangciso oluza kunceda abazalwana abasehlabathini lonke kwiimeko abajamelene nazo namhlanje. (Mat. 24:45-47) Ngaba uzimisele ukubona nokuva oko kuza kufundiswa?
3. Yintoni esifanele siyenze ukuze sizuze kucwangciso?
3 Kakade ke, siya kungenelwa kakhulu ukuba sibakho kuzo zontathu iintsuku zendibano yaye siyaphulaphula. Ukuba ubungekayenzi loo nto, cela kumqeshi wakho ukuba akuvumele uye endibanweni. Qiniseka ukuba uphumla ngokwaneleyo busuku ngabunye ukuze ukwazi ukuphulaphula xa kuqhubeka indibano. Kuye kwabanceda bakwazi ukuphulaphula abanye ukujonga isithethi nokubhala amanqaku amafutshane. Ungavumeli iselifowuni okanye ipager iphazamise wena okanye abanye. Musa ukuncokola, ukuthumela iisms, ukutya okanye ukusela ngoxa kuqhubeka ucwangciso.
4. Abazali banokubanceda njani abantwana babo bangenelwe endibanweni?
4 Ngonyaka weSabatha xa amaSirayeli ayedibana ukuze eve uMthetho ufundwa ngoMthendeleko weMinquba, ayesiya “nabantwana” bawo “ukuze baphulaphule nokuze bafunde.” (Dut. 31:12) Kukhuthaza ngokwenene ukubona iintsapho zihleli kunye endibanweni yaye abantwana bephulaphule! Rhoqo ngorhatya ninokufunda amanqaku eniwabhalileyo nize nincokole ngeengongoma enizithandileyo kwezo ziye zafundiswa. “Ubudenge bubotshiwe entliziyweni yenkwenkwe,” ngenxa yoko abazali kufuneka bababek’ esweni abantwana babo, kuquka nabo bakwishumi elivisayo, ebudeni bekhefu lasemini okanye xa besehotele, kunokuba ‘babayeke’ bathi saa.—IMize. 22:15; 29:15.
5. Ihambo yethu entle xa sisehotele iya kuyihombisa njani inyaniso?
5 Ihambo Yethu Entle Iyayihombisa Inyaniso: Indlela esiziphatha ngayo iyayihombisa inyaniso. (Tito 2:10) Abasebenzi basehotele bayabona xa abantu bethobela imithetho naxa bebaphatha ngobubele nangembeko. (Kol. 4:6) Xa abameli beofisi yesebe babeye kuqesha iihotele kunyaka ophelileyo, umphathi wenye ihotele wathi kubo: “Sikuvuyela gqitha ukuba nabantu benkonzo yenu kwihotele yethu, kuba ningabantu abalungileyo. Ninembeko nobubele, yaye nibaphatha ngentlonelo abasebenzi bethu.”
6. Sinokuyihombisa njani inyaniso ngendlela esinxiba ngayo xa siye endibanweni?
6 Ukunxiba kwethu iibheji akuyi kuphelela nje ekubhengezeni indibano nasekusenzeni sibonwe ngamanye amaNgqina, kodwa kuya kunikela ubungqina obuhle kwabanye. Abantu ababukeleyo baya kuphawula ukuba abo banxibe iibheji zendibano banxibe kakuhle nangokundilisekileyo, abanxibanga ngokungakhathali nangendlela engenasidima yeli hlabathi. (1 Tim. 2:9, 10) Ngoko sifanele siyijonge indlela esinxiba nesizilungisa ngayo xa sisendibanweni, naxa sisehotele. Ukufika ehotele unxibe ibhulukhwe emfutshane nesikipa akundilisekanga. Kwanokuba indibano ikwibala lemidlalo, sifanele sinxibe ngokundilisekileyo. Ukuba sitshintsha impahla emva kocwangciso size siye kwindawo yokutyela, sifanele sikhumbule ukuba siziindwendwe zendibano, ngoko asifanele sinxibe ngokugabadeleyo.
7. Yiyiphi enye indlela esinokulunandipha ngayo umanyano lobuKristu ebudeni bendibano?
7 Xa eye emthendelekweni, amaSirayeli ayeluvuyela ulwalamano kunye nabo babevela kweminye imimandla, yaye oku kwakuluqinisa umanyano lwabo. (IZe. 2:1, 5) Kwiindibano zesithili kuye kubonakale ngokucacileyo ukuba singamaKristu amanyeneyo. Yaye olu manyano silunandiphayo kule paradesi yethu yokomoya lunomtsalane kwabanye. (INdu. 133:1) Ngoko, endaweni yokuba uphume uye kuthenga ukutya ngaphandle ebudeni bekhefu, kubhetele uziphathele umphako ukuze ukwazi ukuncokola nabazalwana noodade abahleli kufutshane nawe!
8. Ziziphi izizathu esinazo zokufuna ukuncedisa endibanweni xa iimeko zisivumela?
8 Abantu badla ngokuchukumiseka yindlela ezilungelelene ngayo iindibano zethu, ingakumbi xa bephawula ukuba wonke lo msebenzi wenziwa ngamatsha-ntliziyo angahlawulwayo. Ngaba ‘ungazinikela ngokuvumayo’ ukuba usebenze endibanweni? (INdu. 110:3) Ezinye iintsapho zidla ngokusebenza endibanweni ukuze ziqeqeshe abantwana bazo baqhele ukunceda abantu. Ukuba ungumntu oneentloni, ukusebenza endibanweni yindlela entle yokukunceda udibane nabahlobo abatsha. Omnye udade wathi: “Abantu abaninzi ndandingabaqhelanga, ngaphandle nje kwentsapho yam nabahlobo abambalwa. Kodwa xa ndancedisa ekucoceni endibanweni, ndatsho ndadibana nabazalwana noodade abaninzi. Ndakunandipha gqitha oko!” Ukuphangalala ekwenzeni abahlobo ngokuthi sincedise endibanweni kuya kusenza sivuye. (2 Kor. 6:12, 13) Ukuba akuzange ukhe ube litsha-ntliziyo, buza abadala oko ufanele ukwenze ukuze ukwazi ukuncedisa.
9. Siza kubamema njani abanye ukuba beze endibanweni?
9 Mema Abanye Ukuba Beve Inyaniso: Kwiiveki ezintathu ngaphambi kwendibano, siza kuphinda sibe nephulo elikhulu lokumema, njengoko siqhele ukwenza. Amabandla afanele azimisele ukuhambisa izimemo kwinxalenye yentsimi yawo enkulu kangangoko kunokwenzeka. (Funda ibhokisi ethi “Siza Kuzihambisa Njani Izimemo?”) Izimemo eziseleyo zifanele ziziswe endibanweni. Ziza kunikwa abo bezileyo endibanweni ukuze bazihambise kubantu abadibana nabo ebudeni bexesha lendibano.
10. Balisa amava abonisa ukuba ikho imiphumo yokusasaza izimemo zendibano minyaka le.
10 Ngaba abantu bayasabela kweli phulo laminyaka le? Kwenye indibano, umlindi wayenceda enye indoda kunye nomfazi wayo ukuze bafumane indawo yokuhlala. Bamchazela ukuba bafumene isimemo baza “banomdla kuso.” Babehambe ngemoto umgama ongaphezu kweekhilomitha ezingama-320 ukuza endibanweni! Ukanti ngenye imini, omnye udade owayeshumayela kwindlu ngendlu wanika enye indoda eyayibonakala inomdla wokwazi okungakumbi ngendibano isimemo. Emva koko wayicacisela ngeso simemo. Kwiintsuku ezimbalwa kamva, lo dade wabona le ndoda imi kunye nomnye umhlobo wayo endibanweni, ibe babephethe enye yeempapasho ezintsha!
11. Kutheni kubalulekile nje ukuya kwiindibano zesithili zaminyaka le?
11 Imithendeleko yaminyaka le yayililungiselelo lothando elivela kuYehova ukuze ancede amaSirayeli ukuze ‘amkhonze ngokungenasiphoso nangenyaniso.’ (Yoshuwa 24:14) Nathi ukuya kwiindibano zesithili ezibakho rhoqo ngonyaka kusinceda ‘siqhubeke sihamba enyanisweni’ yaye ziyinxalenye ebalulekileyo yonqulo lwethu. (3 Yohane 3) Ngamana uYehova angayisikelela yonke imigudu yabathandi benyaniso yokulungiselela ukuya nokungenelwa ngokupheleleyo kwezi ndibano!
[Amagama acatshulweyo akwiphepha 3]
Ukuziphatha kwethu kakuhle xa sisendibanweni kuyenza ibe nomtsalane inyaniso
[Amagama acatshulweyo akwiphepha 4]
Kwiiveki ezintathu ngaphambi kwendibano, siza kuba nephulo lokumema abanye ukuze babekho
[Ibhokisi ekwiphepha 5]
Izikhumbuzo Zendibano Yesithili Yowama-2012
◼ Ixesha Locwangciso: Ucwangciso luza kuqalisa ngentsimbi yesi-9:00 kusasa zontathu iintsuku. Amasango aya kuvulwa ngentsimbi yesi-7:00 kusasa. Xa kuqalisa umculo, sonke sifanele siye kuhlala phantsi ukuze ucwangciso luqalwe ngendlela endilisekileyo. Ucwangciso luza kuqukunjelwa ngeye-4:35 emva kwemini ngoLwesihlanu nangoMgqibelo, luze luqukunjelwe ngeye-3:20 ngeCawa.
◼ Indawo Yokupaka Iimoto: Kuzo zonke iindawo ekuqhutyelwa kuzo iindibano ezineendawo zokupaka eziza kwalathiswa sithi, ziza kufumaneka simahla yaye ziya kunikwa abantu abafike kuqala. Ekubeni indawo yokupaka idla ngokuba ncinane, ukuba kunokwenzeka sebenzisani imoto enye.
◼ Indawo Yokuhlala: Abavakalisi abafuna indawo yokuhlala bangazifumanela iifomu zeSicelo Esikhethekileyo Samagumbi (CO-5). IKomiti Yenkonzo Yebandla ifanele ihlole enoba abavakalisi bayafaneleka kusini na, isebenzisa ulwalathiso oluchazwe kule fomu kunye neleta kaDisemba 14, 2010, eya kuwo onke amaqumrhu abadala. Eli lungiselelo lenzelwe kuphela abavakalisi abangumzekelo kunye nabantwana babo abaziphethe kakuhle.
◼ Ukubeka Izihlalo: Izihlalo unokuzibekela abantu ohamba nabo ngemoto okanye ohlala nabo, kuquka abo ubafundela iBhayibhile.—1 Kor. 13:5.
◼ Isidlo Sasemini: Sicela niziphathele isidlo sasemini kunokuba niphume niye kufuna ukutya ebudeni bekhefu lasemini. Ninokusebenzisa icooler bag enokufakwa phantsi kwesitulo. Iicooler bag ezinkulu zepikiniki zinokubekwa kwindawo abalindi abacela ukuba zibekwe kuyo. Izitya zeglasi kunye notywala azivumelekanga kwindawo ekuqhutyelwa kuyo indibano.
◼ Iminikelo: Sinokubonisa uxabiso esinalo ngamalungiselelo endibano ngokunikela ngokuzithandela kumsebenzi owenziwa ehlabathini endibanweni. Ukuba unikela ngetsheke bhala oku kuyo “Christian Congregation of Jehovah’s Witnesses of South Africa.” Kwiindibano ezithile kuya kubakho ilungiselelo lokunikela ngekhadi ledebit/credit ukongezelela ekunikeleni ngemali netsheke.
◼ Iingozi Neemeko Zongxamiseko: Xa umntu egula ngesiquphe endibanweni, nceda uchazele umlindi okufutshane, ibe yena uya kwazisa iSebe Loncedo Lokuqala ukuze ibe ngabantu abaqeqeshiweyo abahlola imeko baze bancede.
◼ Amayeza: Ukuba usebenzisa iyeza elikhethekileyo elinconyelwe ngugqirha, qiniseka ukuba uziphathela elanele loo mini, kuba akayi kufumaneka amayeza anjalo endibanweni. Izitofu zabo baneswekile nezinye izitofu zimele zilahlwe endaweni elungiselelwe zona endibanweni nasezihotele.
◼ Izihlangu: Nyaka ngamnye ziba ninzi iingozi ezibangelwa zizihlangu. Kubalulekile ukunxiba izihlangu ezindilisekileyo, ezikulingana kakuhle, eziza kukuhambisa kakuhle kwizinyuko, nezingayi kukuwisa lula, njalo njalo.
◼ Iinqwelo Zabantwana: Iinqwelo zabantwana azifanele zingene kwindawo yendibano. Noko ke, izihlalo ezenzelwe ukhuseleko lwabantwana ezinokukwazi ukufakwa zize zixokonyezelwe kwisihlalo esisecaleni kwabazali zinokungena.
◼ Iziqholo: Ezinye iindibano ziqhutywa kwizakhiwo ezivalekileyo apho abantu baxhomekeka kwiifeni ukuze kungene umoya. Ngoko ke, kuya kuba kuhle ukuba singazigaleli kakhulu iziqholo ezinamandla nezinokuba yingxaki kwabo baneengxaki zokuphefumla okanye abanezinye izigulo.—1 Kor. 10:24
◼ Iifomu Ezithi Nceda Ubuyele (S-43): Ifomu ethi Nceda Ubuyele (S-43) ifanele isetyenziswe xa kubhalwa inkcazelo ephathelele abo banomdla ngoxa besishumayela ngokungacwangciswanga ebudeni bendibano. Abavakalisi bafanele baphathe ifomu ibe nye okanye zibe mbini endibanweni. Iifomu ezizalisiweyo zinokusiwa kwiSebe Leencwadi okanye xa ubuyela ebandleni uzinike unobhala webandla lakho.—Bona UBulungiseleli Bethu BoBukumkani bukaMeyi 2011, iphepha 3.
◼ Iivenkile Zokutyela: Zukisa igama likaYehova ngokuziphatha kakuhle kwiivenkile zokutyela. Kuyinto eqhelekileyo ukushiya imadlana esisipho kubasebenzi bevenkile yokutyela emalunga ne-10 ukuya kwi-15 ekhulwini lexabiso laloo nto uyenzelweyo.
◼ Inkonzo Yamatsha-ntliziyo: Bonke abo bangathanda ukuncedisa bafanele baye kwiSebe Lenkonzo Lamatsha-ntliziyo endibanweni. Abantwana abangaphantsi kweminyaka eli-16 ubudala nabo banokuncedisa ngokusebenza phantsi kweliso labazali babo okanye lomntu obagcinileyo okanye omnye umntu omdala ogunyaziswe ngabo.
◼ Iingoma: Amabandla aya kukuvuyela ukuqhelisela ezi ngoma ziza kuculwa endibanweni kusengaphambili. NgoLwesihlanu: 52, 57,113, 106, 116 neye-98. NgoMgqibelo: 93, 68, 58, 67, 95 neye-89. NgeCawa: 110, 61, 134, 73, 36 neye-49.
[Ibhokisi ekwiphepha 4]
Siza Kuzihambisa Njani Izimemo?
Ukuze sikwazi ukumema bonke kwintsimi yethu, kufuneka sibethe koomofu. Sisenokuthi: “Molo. Ndingathanda ukukunika esi simemo sinikwa abantu ehlabathini lonke. Nasi esakho. Iinkcukacha ezingakumbi zibhaliwe apha kuso.” Dlamka xa uthetha. Xa nisasaza izimemo ngeempelaveki, nifanele nihambise namaphephancwadi xa kufanelekile.