Xa Abantu Besiba Nezinwe
UKUBA ubunokunikwa ithuba lokupha ukumkani othile isipho, ubuya kumpha ntoni? Kuthekani ukuba ebengoyena mlawuli usisityebi nosisilumko ehlabathini? Ngaba sikho isipho ocinga ukuba besiya kumvuyisa? Kwiminyaka emalunga namawaka amathathu eyadlulayo, ukumkanikazi waseShebha wayejikajikana naloo mibuzo engqondweni yakhe xa wayelungiselela ukutyelela umlawuli onjalo kanye—uKumkani uSolomon wakwaSirayeli.
IBhayibhile isixelela ukuba isipho sakhe sasiquka iitalente zegolide ezili-120, “nasebulawini into eninzi kunene, namatye anqabileyo.” Ngokwemali yale mihla, igolide iyodwa nje yayixabisa malunga nama-R242 000 000. Ubulawu, obabuyioli eyayisisiqholo esinevumba elimnandi neyayisetyenziswa nakwezamayeza, babulingana negolide ngexabiso. Ngoxa iBhayibhile ingachazi ukuba babubungakanani na obo bulawu ukumkanikazi awabupha uSolomon, iyasixelela ukuba akuzange kubekho bulawu bulingana nabo emva koko.—1 Kumkani 10:10.
Ngokuqinisekileyo ukumkanikazi waseShebha wayelibhinqa elisisityebi nelalinezinwe. Ibe ukuba nezinwe kwakhe kwabuyekezwa. IBhayibhile ithi: “Ukumkani uSolomon wamnika ukumkanikazi waseShebha konke ukuthanda kwakhe awakucelayo; kukodwa khona awakuzisayo kukumkani.” (2 Kronike 9:12, akekeliswe sithi.) Kuyinyaniso ukuba, kusenokuba kwakuyinto eqhelekileyo kookumkani ukuphana izipho; kodwa iBhayibhile ikukhankanya ngokukhethekileyo ‘ukuba nezinwe’ kukaSolomon. (1 Kumkani 10:13, NW) USolomon wabhala: “Umphefumlo osikelelayo uyatyetyiswa; oseza ahluthise abanye, uyasezwa ahluthe naye.”—IMizekeliso 11:25.
Kakade ke, ukumkanikazi waseShebha wancama ixesha lakhe elininzi waza wenza umgudu wokuya kutyelela uSolomon. Kuyabonakala ukuba iShebha yayikwindawo namhlanje eyiRiphabliki yaseYemen; ngoko lo kumkanikazi kunye neenkamela zakhe bahamba umgama ongaphezu kweekhilomitha ezili-1 900 ukuya eYerusalem. Kunjengokuba uYesu watshoyo, “weza evela eziphelweni zomhlaba.” Kwakutheni ukuze ukumkanikazi waseShebha azixhamle kangako? Ngokuyintloko wayeze ‘kuva ubulumko bukaSolomon.’—Luka 11:31.
Eyokuqala yooKumkani 10:1, 2 ithi ukumkanikazi waseShebha “weza ukumlinga [uSolomon] ngemibuzo elukhuni. . . . [Lo kumkanikazi] wathetha naye konke okube kusentliziyweni yakhe.” Wasabela njani uSolomon? “USolomon wamtyhilela onke amazwi akhe; akubangakho lizwi lifihlakeleyo kukumkani, angabanga nakumtyhilela lona.”—1 Kumkani 10:3.
Ekhwankqiswe koko wayekuva nawayekubona, ngokuzithoba ukumkanikazi waphendula esithi: “Anoyolo amadoda akho, banoyolo aba bakhonzi bakho bemiyo phambi kwakho amaxesha onke, bebuva ubulumko bakho.” (1 Kumkani 10:4-8) Akazange athi abakhonzi bakaSolomon banoyolo kuba bengqongwe bubunewunewu—nangona kwakunjalo. Kunoko, abakhonzi bakaSolomon babesikelelwe kuba ngamaxesha onke babenokuphulaphula ubulumko bukaSolomon abunikwe nguThixo. Hayi indlela angumzekelo omhle ngayo ukumkanikazi waseShebha kubantu bakaYehova namhlanje, abaphulaphule ubulumko boMdali ngenkqu noboNyana wakhe, uYesu Kristu!
Ukanti enye into ebangel’ umdla ngamazwi awathethwa ngulo kumkanikazi kuSolomon emva koko: “Makabongwe uYehova uThixo wakho.” (1 Kumkani 10:9) Kuyabonakala ukuba wayeyiqonda into yokuba nguYehova owayenike uSolomon ubulumko nobuncwane. Oku kuvisisana noko uYehova wayekuthembise uSirayeli ngaphambilana. Wathi: ‘Yigcineni ke imimiselo yam niyenze; ngokuba oku bubulumko benu, nengqondo yenu, emehlweni abantu abaya kuyiva yonke le mimiselo; bathi, Olu hlanga lukhulu ngabantu abalumkileyo, abanengqondo bodwa.’—Duteronomi 4:5-7.
Ukusondela Kulowo Unika Ubulumko
Kule mihla, bangumMbo nomXesibeOk for X abantu abaye basondezwa kwintlangano kaYehova kuba beye babona ukuba “uSirayeli kaThixo” ‘uluhlanga lwabantu abalumkileyo abanengqondo,’ kungekuba luzalwa lunjalo, kodwa ngenxa yokuba lukhokelwa yimithetho nemigaqo kaThixo egqibeleleyo. (Galati 6:16) Amanani abo babhaptizwayo abonisa ukuba kwiminyaka yakutshanje, unyaka ngamnye baba ngamakhulu amawaka abafundi abatsha abaye, ngokungathi kunjalo, bathi kuSirayeli wokomoya: “Siya kuhamba nani, ngokuba sivile ukuba uThixo unani.” (Zekariya 8:23) Hayi indlela abamangaliswa ngayo abo basebatsha xa bebona isidlo sokomoya uYehova asibeke phambi kwabakhonzi bakhe! Abazange basibone isidlo esinjalo kwiinkonzo abasuka kuzo.—Isaya 25:6.
Ukupha Oyena Mphi Ubalaseleyo
Bakuba benzelwe izinwe ezingako, abo banoxabiso ngokuqhelekileyo baye bazibuze ukuba yintoni na abanokumbuyekeza ngayo oyena Kumkani ubalaseleyo nokwanguMphi, uYehova uThixo. IBhayibhile iyachaza ukuba esona sipho sihle esinokumpha sona uYehova ‘ngumbingelelo wendumiso.’ (Hebhere 13:15) Ngoba? Ngenxa yokuba loo mbingelelo unxibelelene ngokungqalileyo nokusindiswa kobomi, nto leyo ayixhalabele ngokuyintloko uYehova kweli xesha lesiphelo. (Hezekile 18:23) Ukongezelela koko, ukunikela ngamandla akho nangexesha lakho ukuze uncede abagulayo, abadandathekileyo nabanye kungumbingelelo owamkelekileyo.—1 Tesalonika 5:14; Hebhere 13:16; Yakobi 1:27.
Iminikelo yemali inendima ephambili. Iyanceda ekuveliseni iiBhayibhile, uncwadi olusekelwe eBhayibhileni, kuze kufunyanwe neendawo zokuhlanganisana zamaKristu. (Hebhere 10:24, 25) Iminikelo ikwaxhasa neengxowa-mali zokunceda amaxhoba eemfazwe neentlekele zemvelo.
Ukuze linikele ulwalathiso kumbandela wokupha, iLizwi likaThixo libeka imigaqo emihle. Ngokomzekelo, lifundisa ukuba amaKristu akanikeli imali ethile emiselweyo, kodwa anikela oko akwazi ngokusengqiqweni ukukunikela, akwenza oko ngokuzithandela, nangentliziyo evuyayo. (2 Korinte 9:7) Amanye anokunikela kakhulu; amanye, njengomhlolokazi owayelihlwempu wexesha likaYesu, anokukwazi ukunikela okuncinane nje kuphela. (Luka 21:2-4) Ngaba ayisimangalisi into yokuba uYehova—uMnini ndalo iphela—asixabise nasiphi na isipho esinikelwe ngenjongo entle kunye nokuzincama okwenziwe ngenxa yakhe?—Hebhere 6:10.
Ukuze banikele bevuya, abantu bakaYehova basoloko besaziswa ngeentswelo ezahlukeneyo nangeendlela ezisebenzisekayo ekunokuhlangatyezwana ngazo nezo ntswelo. Uyandula ke umoya oyingcwele kaYehova ushukumisele iintliziyo ezivumayo ukuba zisabele. Le nkqubo yayisetyenziswa kuSirayeli wamandulo xa kwakusakhiwa umnquba, nasemva koko xa kwakusakhiwa itempile. (Eksodus 25:2; 35:5, 21, 29; 36:5-7; 39:32; 1 Kronike 29:1-19) Ngenkulungwane yokuqala yeXesha Eliqhelekileyo, loo nkqubo ikwanye yenza amaKristu akwazi ukufumana izinto eziyimfuneko ukuze kusiwe iindaba ezilungileyo zoBukumkani kwiintlanga nokuze kuxhaswe abazalwana bakwaSirayeli ngexesha lendlala.—1 Korinte 16:2-4; 2 Korinte 8:4, 15; Kolose 1:23.
Ngokufanayo namhlanje, uYehova uye wabasikelela abantu bakhe, kwaye useza kuqhubeka ebasikelela, ebanika oko bakufunayo ukuze bagqibezele elona phulo likhulu lokushumayela nelokufundisa elakha lakho ehlabathini.—Mateyu 24:14; 28:19, 20.
Ziziphi Iintswelo Ezikhoyo Namhlanje?
Kwiminyaka yakutshanje amaNgqina kaYehova aye amkelwa ngokusemthethweni kumazwe amaninzi apho umsebenzi wawo ubukade ubekelwe imiqathango. Ngenxa yoko, uninzi lwala mazwe luye lwanolwando olukhulu lwenani labavakalisi. Ngesizathu esiqondakalayo, iiBhayibhile kunye noncwadi olusekelwe eBhayibhileni zifuneka kakhulu.
Kunjalo ke nangeeHolo zoBukumkani. Sithethanje, ehlabathini lonke kufuneka iiHolo zoBukumkani ezingama-9 000. Ukuba bekunokwakhiwa iHolo yoBukumkani enye ngosuku, bekuya kufuneka iminyaka engaphezu kwama-24 ukuze kuhlangatyezwane neentswelo ezikhoyo ngoku! Kwangaxeshanye, kumiselwa amabandla amatsha asixhenxe usuku ngalunye, uninzi lwawo lukwiindawo apho kunqabe imali. Kwelinye icala, kuninzi lwezi ndawo akuyomfuneko ukwakha isakhiwo esixhomileyo ngeendleko. Kwezinye iindawo, iHolo yoBukumkani ehlangabezana neentswelo nenikela ubungqina obuhle ekuhlaleni inokwakhiwa igqitywe kwanangama-R36 000.
Ngenkulungwane yokuqala, amaKristu athile ayefumile noko kunamanye, ngoko umpostile uPawulos wabhala: “Ngokulinganisa intsalela yenu khona ngoku ilingane ukuswela kwabo, ukuze intsalela yabo nayo ifike ukuze ilingane ukuswela kwenu, ukuze ukulinganisa kwenzeke.” (2 Korinte 8:14) Nanamhlanje, ‘ukulinganisa’ okufanayo kwenza ukuba kubekho imali eyimfuneko kuveliswe iiBhayibhile, uncwadi lweBhayibhile, iiHolo zoBukumkani, uncedo lwamaxhoba eentlekele, nezinye izinto ezenzeka kwiindawo ezininzi ehlabathini. Hayi indlela okuyintsikelelo ngayo ukupha okunjalo—kulowo uphayo nakulowo uphiwayo!—IZenzo 20:35.
Njengoko kuboniswe ziileta ezifunyanwa nguMbutho ezisuka kubantu abanezinwe, uninzi lwabafundi beli phephancwadi lufuna ukunceda kodwa aluqinisekanga ngeendlela ezahlukeneyo olunokunikela ngazo. Ngokuqinisekileyo ibhokisi elandelayo iya kuyiphendula imibuzo yalo.
Ebudeni bolawulo oluzukileyo lukaSolomon, “bonke ookumkani bomhlaba” abevayo ngaye beza kumtyelela. Kodwa iBhayibhile ibiza abe mnye ngegama—ukumkanikazi waseShebha. (2 Kronike 9:23) Hayi indlela awazincama ngayo! Kodwa ke wabuyekezwa kakhulu ngaloo nto—kangangokuba lwathi luphela utyelelo lwakhe, wabe sele “ekhwankqisiwe yaye emangalisiwe.”—2 Kronike 9:4, Today’s English Version.
Kwixesha elizayo, uYehova, uKumkani noMphi ozukileyo, uya kwenza okungaphezulu kunoko kwakunokwenziwa nguSolomon kwabo baye bazincama ngenxa Yakhe. Ngenxa yoko, nabo baya ‘kukhwankqiswa yaye bamangaliswe,’ kuba uYehova akayi kwanela ukubasindisa kwimini yakhe eyoyikekayo yomgwebo kodwa emva koko uya ‘kusivula isandla sakhe, azihluthise iinto zonke eziphilileyo.’—INdumiso 145:16.
[Imifanekiso ekwiphepha 23]
Umsebenzi wamaNgqina kaYehova uxhaswa ngeminikelo yokuzithandela