Xa Ucinga Ngokuzibulala

NYAKA ngamnye amashumi amawaka abemi baseUnited States bazama ukuzibulala. IBhayibhile isichazela isizathu esiyintloko esibangela ukuba abantu abaninzi baphelelwe lithemba. Ithi siphila ‘kumaxesha amanqam ekunzima ukujamelana nawo.’ Abantu bathwaxwa kanobom ziingcinezelo zemihla ngemihla. (2 Timoti 3:1; iNtshumayeli 7:7) Xa umntu esonganyelwa ziingxaki zobomi, angade acinge ukuba kubhetele azibulale. Yintoni onokuyenza xa ukhe wacinga ngokuzibulala?

Akuwedwa!

Nangona imeko yakho isenokukhangeleka imandundu, khumbula ukuba akuwedwa yaye okubuhlungu kukuba phantse wonke umntu uneengxaki zakhe. IBhayibhile ithi: “Yonke indalo iyagcuma kwaye isentlungwini.” (Roma 8:22) Nangona kusenokubonakala ngathi le ngxaki yakho ayinakuze iphele, izinto zidla ngokutshintsha njengoko ixesha lihamba. Kodwa ke yintoni enokukunceda okwangoku?

Phalaza imbilini yakho kumhlobo wakho onamava nomthembileyo. IBhayibhile ithi: “Iqabane lokwenyaniso lithanda ngamaxesha onke, yaye lingumzalwana ozalelwe ixesha lokubandezeleka.” (IMizekeliso 17:17) Xa wayeneengxaki, uYobhi indoda elilungisa echazwe eBhayibhileni, waphalaz’ imbilini yakhe kwabanye. Xa wayeziva ‘ezothekile bubomi bakhe’, wathi: “Ndiza kukukhupha ukuxhalaba kwam ngesiqu sam. Ndiza kuthetha ngobukrakra bomphefumlo wam!” (Yobhi 10:1) Ukuzityand’ igila kwabanye kunokukuthomalalisa ukukhathazeka yaye kungade kutshintshe nendlela oyibona ngayo ingxaki ojamelene nayo.a

Phalaza imbilini yakho kuThixo ngomthandazo. Abanye bacinga ukuba umthandazo yindlela nje yokuthomalalisa ingqondo, kodwa iBhayibhile ithetha okwahlukileyo koko. INdumiso 65:2 ithi uYehova uThixo ‘ngumphulaphuli wemithandazo,’ yaye eyoku-1 kaPetros 5:7 ithi: ‘Ukukhathalele.’ IBhayibhile igxininisa ukubaluleka kokuthembela kuThixo. Ngokomzekelo:

“Kholosa ngoYehova ngayo yonke intliziyo yakho, ungayami ngokwakho ukuqonda. Uze umgqale yena ezindleleni zakho zonke, kwaye uya kuwenza uthi tye umendo wakho.”​—IMIZEKELISO 3:5, 6.

“[UYehova] uya kukwenza oko kunqwenelwa ngabo bamoyikayo, nokukhalela kwabo uncedo uya kukuva, yaye uya kubasindisa.”​—INDUMISO 145:19.

“Sinentembelo yokuba, kungakhathaliseki ukuba yintoni na esiyicelayo ngokuvumelana nokuthanda kwakhe, uyasiva.”​—1 YOHANE 5:14.

“UYehova ukude nabangendawo, kodwa umthandazo wamalungisa uyawuva.”​—IMIZEKELISO 15:29.

Ukuba uyamazisa uThixo ngobunzima ojamelana nabo, ngokuqinisekileyo uya kukunceda. IBhayibhile ikukhuthaza isithi ‘kholosa ngaye ngamaxesha onke. . . Phalaza intliziyo yakho phambi kwakhe.’​—INdumiso 62:8.

Xa Kufuneka Okungakumbi

Uhlolisiso lubonisa ukuba uninzi lwabantu abazibulalayo bakha badandatheka kangangethuba elide ebomini babo.b Oku kubonisa indlela ekubaluleke ngayo ukuya kugqirha. Ugqirha unokukunika amayeza aze akucebise ngokutya omele ukutye. Kwezinye iimeko, unyango nokwenza umthambo rhoqo kuyanceda. Unyango lukagqirha luye lwabanceda abantu abaninzi.c

IBhayibhile iqulethe inkcazelo eninzi enokukuxhasa ize ikunike ithemba. Ngokomzekelo, kwiSityhilelo 21:4, iBhayibhile ithi ngoYehova: “Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” Esi sisithembiso esivela kuThixo yaye ukucamngca ngaso kunokukuzisela isiqabu.

AmaNgqina kaYehova axelela izigidi zabantu ehlabathini lonke ngeli themba lisekelwe eBhayibhileni. Ngenxa yoko, abantu abaninzi banethemba lokwenene kula maxesha obunzima. Ukuze ufumane inkcazelo engakumbi, qhagamshelana namaNgqina kaYehova endawo ohlala kuyo, ngokuya kwiHolo yoBukumkani ekufuphi kuwe okanye ngokubhalela kwiadresi efanelekileyo kwezidweliswe kwiphepha 5 leli phephancwadi. Kwakhona unokuya kwiWebhsayithi yethu ethi www.watchtower.org.

[Imibhalo esemazantsi]

[Ibhokisi ekwiphepha 16]

UNCEDO OLUSUKA EBHAYIBHILENI

● “Musani ukuxhalela nantoni na, kodwa ezintweni zonke zaziseni izibongozo zenu kuThixo ngomthandazo nesikhungo nombulelo; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.”—Filipi 4:6, 7.

● “Ndabuza kuYehova, waza wandiphendula, yaye wandihlangula kwizinto ezindothusayo.”—INdumiso 34:4.

● “UYehova usondele kwabo baphuke intliziyo; yaye abo bamoya utyumkileyo uyabasindisa.”—INdumiso 34:18.

● “Uyabaphilisa abo baphuke intliziyo, uyazibopha iindawo zabo ezibuhlungu.”—INdumiso 147:3.

[Ibhokisi ekwiphepha 17, 18]

UKUBA UCINGA UKUZIBULALA . . .

Zityand’ igila kumhlobo omthembileyo

Thetha noThixo ngomthandazo

Dibana noogqirha

[Ibhokisi/Umfanekiso okwiphepha 18]

KWINTSAPHO NAKUBAHLOBO

Amalungu entsapho kunye nabahlobo badla ngokuba ngabokuqala ukubona xa umntu odandathekileyo ecinga ngokuzibulala. Ukuthatha inyathelo kunokusindisa ubomi bakhe! Mphulaphule uze ube novelwano. Musa ukungayamkeli into yokuba loo mntu ujamelene nobunzima. IBhayibhile ithi: “Yithuthuzeleni imiphefumlo edandathekileyo.” (1 Tesalonika 5:14) Mbongoze lowo udimazekileyo ukuba afune uncedo yaye ukuba kuyimfuneko qiniseka ukuba uyalufumana olo ncedo.