UGawulayo EAfrika—Liliphi Ithemba Elikhoyo Kweli Waka Leminyaka Litsha?
NGUMBHALELI KAVUKANI! EZAMBIA
KUSEPTEMBA odluleyo kwakuthontelene iindwendwe ezivela kwiindawo ezahlukahlukeneyo zaseAfrika eLusaka, eZambia, kwiNkongolo Yezizwe Ngezizwe ye-11 kaGawulayo neZifo Ezidluliselwa Ngeentlobano Zesini eAfrika. Eyona njongo yaloo nkongolo yayikukukhuthaza intsebenziswano enkulu phakathi kwezo nqila ukuze kuphendulwe umbuzo othi, Singakuthintela njani ukusasazeka kukaGawulayo eAfrika?
UNjingalwazi Nkandu Luo, owayengumphathiswa wezempilo eZambia ngoko, wathi imeko yaseAfrika neyezinye iindawo ezikumazwe asakhasayo “imaxongo ngokugqithiseleyo,” wongezelela ngelithi “ithintela ize ibuyisel’ umva nenkqubela ephawulekayo eyenziwa licandelo lempilo nezinye iinkalo zoqoqosho lwasekuhlaleni.”
Kungcelele lweentetho oluphathelele umbandela wokukhuseleka kwegazi kwavunywa ukuba uGawulayo uye wadluliselwa ngokutofelwa kwegazi. Omnye ugqirha owayengummeli weWorld Health Organization’s Blood Safety Unit, watsho ngokuphandle ukuba ngoxa ukuba neentlobano zesini neqabane elinesi sifo kungasoloko kudlulisela intsholongwane iHIV, lowo utofelwa igazi elinoGawulayo uya kosulelwa—phantsi kwayo nayiphi na imeko! Ngesizathu esivakalayo, lo gqirha wathi kwimeko enjalo, “olona tofelo-gazi lukhuselekileyo lolo lunganikelwanga.”
Le nkongolo yagxininisa kwinto yokuba ixabiso elixhome ngokugqithiseleyo lokunyanga esi sifo lenza kube nzima phofu ukuba kuyenzeka kwaukwenzeka ukuba abo banoGawulayo bakwazi ukuhlawulela loo mayeza. Ngokomzekelo, ngokomlinganiselo umntu waseUganda ohlala edolophini wamkela imali emalunga nee-R1 200 ngenyanga. Kodwa ukusebenzisa amayeza enza ubani achache kunokuxabisa ukuya kutsho kwi-R6 000 ngenyanga!
Le nkongolo yaseLusaka yatyhila ukuba ukuqala kweli waka leminyaka litsha kwakungayi kuza nasicombululo silula ekusasazekeni kukaGawulayo. Noko ke, abafundi beBhayibhile bayaqonda ukuba ekugqibeleni isicombululo sako konke ukugula sixhomekeke kuMdali, uYehova uThixo, othembisa ukuba kwihlabathi lakhe elitsha “akakho ummi wakhona oya kuthi: ‘Ndiyagula.’”—Isaya 33:24.
[Imaphu/Imifanekiso ekwiphepha 31]
UNjingalwazi Nkandu Luo
[Inkcazelo]
Photograph by permission of E. Mwanaleza, Times of Zambia