Yintoni Ibanjwa Elinokuyifunda Kwintaka?

NGUMBHALELI KAVUKANI! EMZANTSI AFRIKA

NGOKUTSHO kwephephandaba iSunday Tribune laseDurban, eMzantsi Afrika, iintaka zinenxaxheba ekuthambiseni iintliziyo zamabanjwa kwiNtolongo yasePollsmoor. Sithethanje ngamabanjwa ali-14 anenxaxheba kwinkqubo ebandakanya ukunyamekela iicockatiel neelovebird kwizisele zawo.

Yenziwa njani le nkqubo? Banjwa ngalinye elinenxaxheba linomatshini wokuqandusela kwisisele salo. Intshontsho eliqanduselweyo linyanyekelwa lelo banjwa, lincede ekondleni olo sizana lungenabani rhoqo emva kweyure okanye ezimbini, ubusuku nemini, kangangeeveki ezintlanu. Iya kwandula ke loo ntaka ibekwe kwindlwana yayo elapho kwakweso sisele. Yakuba ikhulile loo ntaka, ithengiselwa abantu. Wambi amabanjwa aye azithande ngeyona ndlela iintaka zawo kangangokuba aye akhale xa esahlukaniswa nazo.

Nkqu nezona zaphuli-mthetho zincanyiweyo ziye zanothando nobuntu obungakumbi ngokuphawulekayo emva kokuthetha nokunyamekela ezo ntaka yonk’ imihla. Elinye ibanjwa lathi: “Ndilulamisa iintaka, kodwa ziye zandilulamisa nam.” Elinye lithi iintaka ziye zalifundisa ukuba nomonde nokuzeyisa. Elinye ibanjwa elibanjelwe ubusela lithi ukunyamekela intaka kulenze laqonda ukuba, ukuba ngumzali “kuyimbopheleleko enkulu”—nto leyo elayityeshelayo kwabalo abantwana xa lalingekabanjwa.

Ngokunyamekela ezi ntaka la mabanjwa azuza nenye ingenelo. UWikus Gresse, owaqalisa le nkqubo uthi: “Ngobuchule abufunde apha, anokufumana umsebenzi ngaphandle kubafuyi beentaka okanye oogqirha bezilwanyana.”