Ukubopheleleka Kumtshato Ongenaluthando
“Kwibutho labantu elizaliswe luqhawulo-mtshato, imitshato engenalonwabo ayipheleli nje kuqhawulo-mtshato, kodwa ukongezelela, kukho imitshato emininzi engenalonwabo.”—IBHUNGA ELIJONGENE NEENTSAPHO EMERIKA.
KUTHIWA olona lonwabo ebomini nelona shwangusha liphuma kumthombo ofanayo—umtshato womntu. Enyanisweni zimbalwa izinto ebomini ezikwaziyo ukubangela imincili ngolo hlobo—okanye zibangele imbandezelo elolo hlobo. Njengoko ibhokisi ekweli nqaku ibonisa, izibini ezininzi zithwaxwa kanobom yimbandezelo.
Kodwa umlinganiselo woqhawulo-mtshato utyhila nje inxalenye yale ngxaki. Xa umtshato ngamnye usilela, eminye emininzi isala ibambelele kodwa izaliswe ziinkathazo. Lizityand’ igila, elinye ibhinqa ebelitshate kangangeminyaka engama-30 lathi: “Sasiyintsapho eyonwabileyo, kodwa iminyaka eli-12 edluleyo ibinzima kakhulu. Umyeni wam akanamdla kwindlela endivakalelwa ngayo. Ngoyena mntu undenza ndivakalelwe kabuhlungu.” Ngokufanayo, enye indoda ebitshate malunga neminyaka engama-25 yakhalaza ngelithi: “Umfazi wam wandixelela ukuba akasandithandi. Uthi ukuba nje sinokuhlala kwigumbi elinye yaye kunokuba bhetele ukuba ngamnye kuthi azonwabise ngendlela afuna ngayo.”
Kambe ke, abanye bathi bakuba sezingxakini bayiqhawule imitshato yabo. Noko ke, abanye abathandi kuqhawula imitshato yabo. Ngoba? Ngokutsho kukaGqr. Karen Kayser, abantwana, igama umntu analo kwibutho labantu, imali, abahlobo, izalamane neenkolelo zonqulo zisenokusigcina isibini sihlala kunye, kwanokuba asithandani. Uthi: “Enoba akawuqhawuli ngokusemthethweni umtshato, la maqabane akhetha ukuhlala neqabane asele eqhawule umtshato nalo ngokweemvakalelo.”
Ngaba isibini esinolwalamano olungeluhle sifanele sizinikele kubomi bokunganeliseki? Ngaba umtshato ongenaluthando ukuphela kwento ebangela uqhawulo-mtshato? Amava abonisa ukuba imitshato emininzi ezaliswe ziinkathazo inokukhuselwa—kungekuphela nje kwintlungu yokuqhawuka kwayo kodwa nakwishwangusha lokungabi naluthando.
[Ibhokisi ekwiphepha 3]
UQHAWULO-MTSHATO EHLABATHINI LONKE
• EOstreliya: Umlinganiselo uye waphindaphindeka kane ukususela ngeminyaka yee-1960.
• EBritani: Ngokoqikelelo, imitshato emi-4 kweli-10 iya kuphelela kuqhawulo-mtshato.
• EKhanada naseJapan: Uqhawulo-mtshato luchaphazela malunga nesinye kwisithathu semitshato.
• EUnited States: Ukususela ngowe-1970, izibini ezitshatayo zinamathuba angama-50 kwangama-50 kuphela okuhlala kunye.
• EZimbabwe: Imitshato emi-2 kuyo nayiphi emi-5 iphelela kuqhawulo-mtshato.