“Eyona Mini Imyoli Ebomini Bethu”
UMSITHO womtshato usisihlandlo esivuyisayo. Izibini ezininzi ziye zathi: “Yayiyeyona mini imyoli ebomini bethu.” Kodwa isenokuba yiyo neyona mini ilucelomngeni. Uxinezeleko nokudinwa okufunyanwa ngumtshakazi nomyeni neentsapho zakwamawabo lusenokuba lukhulu ngenxa yazo zonke izigqibo namalungiselelo ayimfuneko, kuquka nentaphane yabantu eza kuzimasa umtshakazi nomyeni ngaloo mini.
Umsitho womtshato uphawula ukuqala kwendlela entsha yobomi kwesi sibini. Kodwa akuchaphazeleki sona kuphela. Ekubeni umtshato wentombi, unyana, udade wenu, umntakwenu udla ngokuthetha ukuba othandekayo wakha umzi owahlukileyo, intsapho idla ngokuba mbono-mbini.
Iindlela oqhutywa ngazo umsitho womtshato ziyahluka kwilizwe ngalinye, kwaye asinakukwazi ukuzixubusha zonke apha. La manqaku aya kubhekisela ingqalelo kwizinto eziqhelekileyo kumazwe aseNtshona nafana nawo. Apho ukutshata kuyabiza kakhulu. Abanye bachitha imali eninzi gqitha kumhla womsitho womtshato, kuquka ukuqesha iholo okanye ivenkile yokutyela kwakunye nokutya okuza kuhanjiswa apho. Kuqikelelwa ukuba eItali umtshato oqhelekileyo uxabisa ngaphezu kwee-R90 000. EJapan, nakwezinye iindawo eli nani linokuba ngaphezulu. Ngokuqhelekileyo le mali ayihlawulwa ngumtshakazi nomyeni. Ihlawulwa ngabazali.
Imisitho yomtshato yenza imali eninzi. Iinkampani ezininzi zibonisa imifanekiso yemisitho yomtshato “egqibeleleyo,” engenanto isilelayo. Ngapha koko, zibethelela isibakala sokuba, “le yeyona mini imyoli ebomini benu!” Ngenxa yoko, zibonisa izinto neenkonzo eziliqela “ezibalulekileyo” ukwenza imini yakho enkulu “ibe semagqabini.” Kusenokukhutshwa izimemo ezikhethekileyo, ilokhwe yakho “yephupha,” iilokhwe zabakhaphi, iisuti ezinamagama zamadoda aze kumsitho womtshato. Kuphinde kubekho neentyatyambo, iminyobo yeenqwelo-mafutha, mhlawumbi indawo yokutyela apho ukutya kungumdliva, umfoti, iqela lomculo nezinye izinto. Uludwe lwazo zonke izinto ezinokunqwenelwa ngumyeni nomtshakazi, kwakunye noludwe lweendleko zazo, lunokubaxhalabisa oobawo abaninzi.
Kwiindawo ezininzi kubalaseliswa isithethe. Kukho indlela ethile emiselwayo ekumele kwenziwe ngayo, yaye kulindelwe ukuba umtshakazi nomyeni benze ngolo hlobo. Ewe, zininzi izinto ezimele zikhunjulwe, kodwa zonke zimele zilungiswe ngexeshana nje.
Ngaba lithemba elivuyisayo okanye elaphul’ intliziyo? Enoba uphendula uthini na, ukucinga ngoko kunokuqukwa ngumsitho womtshato kuphakamisa imibuzo emininzi. Kuthetha ukuthini ukutshata kule mihla? Ngaba yonke le nto iyimfuneko ukuze ube utshate “kakuhle.” Zinokoyiswa njani iingxaki ezingokweemvakalelo?
Phezu kwalo nje uxinezeleko, abaninzi baye bahlangabezana ngokuphumelelayo nobucukubhede bomsitho womtshato yaye baye basinandipha eso sihlandlo. Amava abo anokubanceda abo balungiselela isihlandlo esifanayo. Kanti ikho imigaqo yeBhayibhile enokuba luncedo xa kusenziwa amalungiselelo, ukuze le mini iyolise, ibe mnandi ize yakhe kubo bonke.