Ukuphumelela Phezu Kobunzima

Njengoko kwaxelwayo yiBhayibhile, siphila ‘kumaxesha amanqam ekunzima ukujamelana nawo.’ (2 Timoti 3:1) Iingxaki zentsapho, ezempilo nezemali zezinye nje kwiingxaki ekunokwenzeka ziyakuthwaxa. Maxa wambi usenokuvakalelwa kukuba awusakwazi kuzinyamezela. Sekunjalo, unako ukuphumelela phezu kobo bunzima. Cinga ngalo mzekelo ulandelayo.

Intyatyambo iTeide violet ikhula kwintaba ephakame phantse kangangeemitha ezingama-3 700 kwisiqithi saseTenerife ngaphaya konxweme loMntla Afrika. IPico de Teide, inkcochoyi yamatye, elithatyathwe kuyo igama lale ntyatyambo, yeyona iphakamileyo kwesi siqithi sikwisubtropic. Kufuphi nenkcochoyi kubonakala kunzima ukuba kungakho into ekhulayo. Kodwa entwasahlobo, ukunyibilika kwekhephu kwenza kubekho amanzi aneleyo ukugcina ezi ntyatyambo ziphila njengoko ziwutsho loo mmandla ukufutshane nenkcochoyi yale ntaba ube mhle ngendlela engathethekiyo nguloo mbala umfusa. Ewe, le ntyatyambo isenokubonakala ibuthathaka yaye iethe-ethe, kodwa iyakwazi ukuphila ize ichume kule nkqantosi nemeko enje ukuba maxongo.

Njengale ntyatyambo iTeide violet, unako ukunyamezela phezu kwazo nje iimeko ezinzima. IBhayibhile incede amaNgqina kaYehova amaninzi enjenjalo naphantsi kwawona maxesha anzima. Ngokomzekelo, lawo ayevalelwe kwiinkampu zoxinaniso zamaNazi eJamani aphumelela. Intatheli yaseSweden uBjörn Hallström uthi: “Aphathwa kakubi gqitha kunabanye abantu, kodwa ngenxa yokholo lwawo kuThixo ngawona akwaziyo ukujamelana kakuhle naloo meko kunabanye abantu.”

Kungakhathaliseki ukuba injani na imeko ozifumana ukuyo, iBhayibhile inokukunceda ujamelane ngempumelelo nobunzima. Qhagamshelana namaNgqina kaYehova akwindawo ohlala kuyo, okanye ubhalele kwidilesi efanelekileyo kwezidweliswe kwiphepha 5 leli phephancwadi ukuze ufumane isifundo seBhayibhile sasekhaya sesisa.