Zimisele Ukuba Sisityebi Ngokomoya
UKUBA sisityebi ngokwezinto eziphathekayo kufuna ulungelelwano nokuzincama. Kunjalo ke nangokuba sisityebi ngokomoya. Oku koko kwathethwa nguYesu xa wathi: “Ziqwebeleni ubuncwane ezulwini.” (Mateyu 6:20) Ubutyebi bokomoya abuziqwebi ngokwabo. Ukuba kunqulo oluthile akuthethi ukuba usisityebi ngokomoya. Kaloku, ukuba neakhawunti ebhankini akuthethi ukuba usisityebi. Ukuhlakulela ulwalamano olusondeleyo noThixo, ukukhula njengomntu wokomoya nokuhlakulela iimpawu zokomoya kufuna umgudu, ixesha nokuzincama.—IMizekeliso 2:1-6.
Ngaba Unokuba Sisityebi Ngezi Ndlela Zombini?
Ngaba umntu unokuba sisityebi ngokomoya nangezinto eziphathekayo? Mhlawumbi unokuba siso, kodwa inye kuphela enokufikelelwa ngokuphumelelayo. UYesu wathi: “Aninakukhonza uThixo nobuTyebi.” (Mateyu 6:24b) Kutheni kunjalo nje? Ngenxa yokuba, ukusukela ubutyebi bokomoya nezinto eziphathekayo akuhambi kunye. Enye ithabatha indawo yenye. Ngaphambi kokuba uYesu axelele abafundi bakhe ngokuziqwebela ubutyebi ezulwini ngezinto zokomoya, uYesu wathi: “Musani ukuziqwebela ubuncwane emhlabeni.”—Mateyu 6:19.
Masithi ke, umntu utsiba ngaphaya kweli cebiso likaYesu, aze yena asukele izinto zokomoya neziphathekayo, kwenzeka ntoni kuye? UYesu wathi: “Akukho bani unokukhonza iinkosi ezimbini; kuba usenokuyithiya enye aze ayithande enye, okanye anamathele kwenye aze ayidele enye. Aninakukhonza uThixo nobuTyebi.” (Mateyu 6:24a) Masithi ke uzisukela zombini. Izinto zokomoya unokuzenza kuba umele uzenze, kodwa ekuhambeni kwexesha ziba yindinisa exabe phambi kolonwabo lwakho. Endaweni yokufuna ulwalathiso lukaThixo, loo mntu unokusithela ngemali ukuze acombulule iingxaki zakhe zobomi. Kanye njengokuba uYesu watsho: “Kaloku apho bukhoyo ubutyebi benu, yoba lapho nentliziyo yenu.”—Mateyu 6:21, INguqulelo YeBhayibhile yesiXhosa yowe-1996.
MKristu ngamnye umele acingisise nzulu ngeli cebiso leBhayibhile ngaphambi kokugqiba enokuba yintoni eza kuchitha ixesha, ithimbe ingqalelo nentliziyo yakhe. UThixo akamiselanga mlinganiselo wemali amele umKristu ngamnye abe nayo, noko ke, oko akuthethi ukuba ukugatya isilumkiso sakhe akunasohlwayo. (1 Korinte 6:9, 10) Abo bagatya isiluleko seBhayibhile baze bafune ukuba zizityebi nokuba sekumnyam’ entla, bayaxhwaleka ngokomoya, ngokwasengqondweni, nangokweemvakalelo kanye njengokuba sele sibonile. (Galati 6:7) Ngokwahlukileyo koko, uYesu wathi abo bayixhalabeleyo intswelo yabo yokomoya baya konwaba. (Mateyu 5:3) Ngaphandle kwamathandabuzo, uMdali wethu noNyana wakhe bayakwazi oko kusifaneleyo ukuze sonwabe!—Isaya 48:17, 18.
Ukhetho Ongenakuze Uzisole Ngalo
Uya kukhetha yiphi ke wena, uThixo okanye ubutyebi? Ewe, sifanele sinikele ingqalelo kwizinto zethu eziphathekayo. Kwincwadi yakhe yokuqala eya kuTimoti, umpostile uPawulos wathi: “Ngokuqinisekileyo ukuba nabani na akabalungiseleli abo bangabakhe, ngokukodwa amalungu endlu yakhe, ngokuqinisekileyo ulukhanyele ukholo yaye mbi ngaphezu kongakholwayo.” UPawulos wakhuthaza amaKristu ukuba abeke ithemba lawo kuThixo kungekhona emalini aze “atyebe emisebenzini emihle, angagogotyi lutho, alungele ukwabelana.” (1 Timoti 5:8; 6:17, 18) Uya kunikela ingqalelo yakho entwenini? Luya kuba yintoni usukelo lwakho? Owona msebenzi mhle uPawulos athetha ngawo kukushumayela nokwenza abafundi njengokuba uYesu wayalela abapostile bakhe. (Mateyu 28:19, 20) Xa amaKristu ephila ubomi obulula, kungekhona ubomi nje bokuthi zava, banandiphe ubomi, kodwa ukwenza okungakumbi kumsebenzi owanelisayo, “aziqwebela isiseko esihle nesikhuselekileyo sekamva” kwihlabathi likaThixo elitsha. Phofu nangoku bafumana ubutyebi bokomoya “obulunge ngakumbi kunegolide!”—1 Timoti 6:19; IMizekeliso 16:16; Filipi 1:10.
Khawucinge ngomzekelo kaEddie, intsapho yakowabo yaba ngamaNgqina esemncinane kakhulu. Kukho ixesha apho intsapho yakowabo yalahlekelwe yinto yonke kwaza kwafuneka iphulukane nomzi wayo. UEddie uthi: “Ndandisoloko ndinexhala lokuba siza kulahlekelwa yinto yonke esinayo. Phofu lafika elo xesha. Uyazi ukuba kwenzeka ntoni? Zange kwenzeke nento le! Siyatya, siyasela yaye sambethe. UYehova wenza indlela yokuba siphume kuloo meko yokungabi nanto. Lonke eli xesha landenza ndacingisisa nzulu ngamazwi kaYesu akuMateyu 6:33—ukuba sibeka uBukumkani bukaThixo kuqala ebomini bethu, akuyomfuneko ukuzixhalabisa ngeemfuno zethu zokwenyama.” Namhlanje uEddie ungumveleli ohambahambayo yaye uphelekwa yinkosikazi yakhe. Banelisekile zizinto eziphathekayo abanazo. Ngaphezu koko, bazizityebi ngokomoya.
Iinzuzo Ezingenakuthelekiswa Nanto
Ngokungafaniyo nobutyebi behlabathi, obunokubiwa ngamatutu, ubutyebi bokomoya buhlala buhleli. (IMizekeliso 23:5; Mateyu 6:20) Ewe, kunzima ukuyilinganisa inkqubela yokomoya. Kunzima kaloku ukufumanisa ukuba umntu ukhule kangakanani eluthandweni, kuvuyo naselukholweni njengokuba kunjalo ukubona ukufuma ngokwasezimalini. Kodwa iinzuzo zokuba sisityebi ngokomoya azinakuthelekiswa nanto. Ethetha ngabalandeli bakhe abashiya izindlu namasimi abo, ewe, indlela yabo yokuphila ukuze bamlandele, uYesu wathi: “Inene ndithi kuni, akukho bani ushiye indlu okanye abantakwabo okanye oodade wabo okanye unina okanye uyise okanye abantwana okanye amasimi ngenxa yam nangenxa yeendaba ezilungileyo ongayi kufumana ngokuphindwe kalikhulu ngoku kwesi sihlandlo sexesha, izindlu nabantakwabo noodade wabo noonina nabantwana namasimi, kunye neentshutshiso, nakwinkqubo yezinto ezayo ubomi obungunaphakade.”—Marko 10:29, 30.
Yintoni eza kuqala ebomini bakho? Ngaba nguThixo okanye bubutyebi?
[Imifanekiso ekwiphepha 8, 9]
Ngaba usukela izinto eziphathekayo . . .
. . . okanye ubutyebi bokomoya?