Indlela Igama LikaThixo Eliye Laziwa Ngayo
UMDUMISI ekuthethwa ngaye eBhayibhileni wavuma ingoma esithi: “Ndiya kulidumisa ngengoma igama likaThixo.” UDavide wayelazi igama likaYehova yaye kwingoma yakhe wahlab’ ikhwelo esithi: “Makabongwe uYehova . . . Malibongwe igama lakhe elizukileyo.” (INdumiso 69:30; 72:18, 19) Eyona ndlela iqhelekileyo elisetyenziswa ngayo eli gama ngesiXhosa yethi Yehova yaye liguqulelwe lisuka kwigama lesiHebhere lithi הוה. Livela kangangezihlandlo ezingama-7 000 eBhayibhileni.
Kwiinkulungwane zakutshanje, igama likaThixo liye lasetyenziswa ezintweni ezininzi ngaphandle kwaseBhayibhile. Ngokomzekelo, amagama esiLatin athi “Benedictus Sit Iehova Deus,” athetha ukuba “Ngamana UYehova UThixo Angadunyiswa,” afumaneka kwiingqekembe zegolide zaseSwitzerland ebezisenziwa kangangeminyaka emininzi [1]. Kula makhulu aliqela eminyaka adluleyo, ngesiHebhere nangesiLatin igama likaThixo liye labonakala kwiingqekembe nakwiimbasa ezahlukahlukeneyo ezingaphezu kwewaka!
Yintoni eye yakhokelela ekwaziweni kangaka kwegama likaThixo? Imizekelo yoku siyibona kweli phepha nakwelilandelayo.
Kutheni Kusetyenziswa Igama LikaThixo?
Ekuqaleni kwenkulungwane ye-16, kuyo yonke iNtshona Yurophu kwabakho idabi phakathi kwamaRoma Katolika namaProtestanti. Imimandla yamaphondo aliqela aseSpeyin yaqhekeka kwiCawa yamaRoma Katolika, ikhetha ukuba ngamalungu eCawa Ehlaziyiweyo. Oku kwakhokelela ekuqhambukeni kwemfazwe yamakhaya yeecawa. Imifanekiso namacala omabini eengqekembe ayesetyenziselwa ukudlulisa umyalezo wokuba uThixo uxhasa liphi icala.
Indlela Igama LikaThixo Elalisetyenziswa Ngayo
Abakroli beengqekembe balibhala igama likaThixo, uYehova ngoonobumba abane besiHebhere abaziwa ngokuba yiTetragrammaton. Xa beguqulelwe kwisiNgesi baba nguJHWH okanye YHWH. Ngoko ke, ngenxa yokuba aba nobumba babekhutshelwa ngokuphindaphindiweyo ngabantu abahlukahlukeneyo, babhalwa ngeendlela ezahlukahlukeneyo.
Ngowe-1568, eSweden babhala igama likaThixo kwiingqekembe zemali [2], ukanti eSkotlani benz’ okufanayo ngowe-1591. Malunga nonyaka we-1600, uKumkani uCharles IX walibhala ngeendlela ezahlukahlukeneyo igama likaThixo kwiingqekembe zemali njengokuthi Ihehova, Iehova, nokuthi Iehovah [3]. Wayalela ukuba olunye uhlobo lwengqekembe yemali lubhalwe ngegolide exabisa umvuzo weenyanga ezine!
Iingqekembe ezingaphezu kwezingama-60 ezaziwa ngokuba ziingqekembe zikaYehova zaziwa ukususela kwixesha likaChristian IV, ukumkani waseDenmark naseNorway owayelawula ukususela ngowe-1588 ukuya 1648. Phakathi kwinkulungwane ye-17, “iingqekembe ezibhalwe igama likaYehova” zazisenziwa ePoland naseSwitzerland. Zazisenziwa naseJamani.
Ebudeni beMfazwe Yeminyaka Engamashumi Amathathu eyayiseYurophu, esusela ngowe-1618 ukuya ngowe-1648 neyaqala iyimfazwe yonqulo ezo ngqekembe zanda. Emva kokoyisa kwiDabi laseBreitenfeld ngowe-1631, uKumkani uGustav II Adolph waseSweden wayeneengqekembe ezazibhalwe oonobumba abane [4]. Ezi zazenziwe kwiidolophu ezinjengeErfurt, eFürth,eMainz, naseWürzburg. Kwangaxeshanye, ukumkani waseSweden wayalela ukuba kwiingqekembe zemali kubhalwe igama likaThixo.
Nasebudeni beminyaka eli-150 emva kokuba iMfazwe eyoyikekayo Yeminyaka Engamashumi Amathathu yaphelayo, igama likaThixo lalisabonakala kwiingqekembe zemali nakwiimbasa. Ezo ngqekembe zazikrolwe eFransi, eMexico, eOstreliya, eRashiya nakwamanye amazwe. Noko ke, ngasekuqaleni kwenkulungwane ye-18 igama likaThixo belingabonakali kangako kwiingqekembe zemali. Ekugqibeleni belingasabonakali kwaukubonakala.
Ukwazisa Igama LikaThixo
Nangona igama likaThixo lingekho kwimali esetyenziswayo namhlanje, laziswa ngeny’ indlela. Kwakude kudala uThixo wakhetha abantu ababeza kumkhonza waza wathi kubo: “Ningamangqina am, . . . yaye mna ndinguThixo.” (Isaya 43:12) Akukho ngqekembe yemali inokwazisa igama likaThixo. Abo basebenzisa iingqekembe zemali ukwazisa igama likaThixo badlulisela ubungqina bobuxoki ngaye kuba babekwafuna ukuxhaswa nguye ezimfazweni zenkohlakalo. Namhlanje, abanye abantu bayalazisa igama likaThixo.
AmaNgqina kaYehova akukhuthaza ukuba ufunde okungakumbi ngoThixo oyinyaniso, uYehova nentsingiselo yegama lakhe. Umdumisi wabhala wathi ngaye: “Ukuze abantu bazi ukuba wena, ogama linguYehova, nguwe wedwa Oyena Uphakamileyo phezu komhlaba wonke.” (INdumiso 83:18) Ukwazi uYehova kubalulekile njengokuba uNyana wakhe watshoyo xa wayethandaza: “ Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.”—Yohane 17:3.
[Umfanekiso okwiphepha 20, 21]
Izixhobo zokwenza iingqekembe zemali
[Inkcazelo Ngemifanekiso ekwiphepha 20]
Coin 1 and tools: Hans-Peter-Marquardt.net; coin 2: Mit freundlicher Genehmigung Sammlung Julius Hagander
[Inkcazelo Ngomfanekiso okwiphepha 21]
Coins 3 and 4: Mit freundlicher Genehmigung Sammlung Julius Hagander