Umlambo Obuy’ Umva
NGUMBHALI KAVUKANI! EKHAMBODIYA
NGABA wakha wawabona amanzi omlambo ebuya umva? Kuthekani ngehlathi eligutyungelwe ngamanzi kangangesiqingatha sonyaka? Ubusazi na ukuba abantu bahlala kwizindlu ezidada emanzini eziphinda zibuyiselwe endaweni yazo xa amanzi ewuthile? Usenokuthi: “Into enjalo ayinakwenzeka!” Ukuba kunjalo, ungathetha into eyahlukileyo xa unokutyelela eKhambodiya ngexesha lemvula.
Ukususela ngoMeyi ukuya kutsho ngo-Oktobha, yonke imihla izulu kusa lizolile kodwa emva kwemini liyasibekela emva koko imvula igalele ngamandla. Amanzi abaleka kwiindawo ebezifudula zomile, nemilambo iphuphume.
Kutheni Ubuy’ Umva?
Jonga imaphu ekweli nqaku. Qwalasela indawo ekudibana kuyo uMlambo omkhulu iMekong noMlambo iTonle Sap. Amanzi ayadibana aze emva koko ahlukane abe nguMlambo iMekong noMlambo iBassac. Emva koko ayaqukuqela ehlele ngasemazantsi eVietnam aye kungena kwiNtili enkulu yaseMekong.
Ngokukhawuleza emva kokuqalisa kwexesha lemvula nale ntili iyazala. La manzi angena kwimifudlana edla ngokoma xa imvula ingani. Njengoko imvula iqhubeka isina, uMlambo iTonle Sap uyazala uze uqukuqelele ngasemantla endaweni yokuya ngasezantsi njengesiqhelo. Ngoko ke lo mlambo ubuya umva de uye kufika kwiChibi laseTonle Sap.
Eli chibi likwithafa elimalunga neekhilomitha ezili-100 ukusuka ePhnom Penh, esisixeko saseKhambodiya. Xa kungekho zimvula, elo chibi liba malunga nezikwekhilomitha ezingama-3,000. Kodwa ngexesha lemvula, ubukhulu balo buphindaphindeka malunga nesine ukuya kwisihlanu nto leyo ebangela ukuba libe lelona likhulu kuMzantsi-mpuma weAsiya.
Iindawo ezinamasimi erayisi, iindlela, imithi needolophana zigutyungelwa ngamanzi. Amaphenyane abalobi adla ngokudada kumanzi ayimitha e-1 ubunzulu ngoku adada kumanzi agqume imithi efikelela kwiimitha ezili-10 ubude! Izantyalantyala ezinjalo zidla ngokugqalwa njengentlekele. Kodwa abantu baseKhambodiya, bakujonga oku njengentsikelelo. Ngoba?
Iingenelo Zesikhukula
Amanzi asuka kuMlambo iTonle Sap akhukulisa umhlaba otyebileyo aye kuwufaka kwisidibi salo mlambo. Ngaphezulu, iintlanzi ezininzi ezisuka kuMlambo iMekong ziyadada ziye kweli chibi lichumileyo zize zizalele apho. Enyanisweni, ichibi laseTonle Sap lelona linentlanzi ezininzi ehlabathini. Emva kokuba iimvula ziyekile ukuna, amanzi aphela ngokukhawuleza kweli chibi kangangokuba maxa wambi abolobi baye bafumane iintlanzi emithini!
Ezi zantyalantyala zemvula ena minyaka le zichaphazela nezinto eziphilayo. Imithi nezinye izityalo zikhula ngendlela eyahlukileyo kunezo zikweminye imimandla engenazikhukula. Ngokuqhelekileyo, imithi ikhula kade, amagqabi ayawa xa kungekho mvula, aze ahlume ngexesha lemvula. Ngokwahlukileyo koku, amagqabi emithi ekummandla waseTonle Sap awa kuphela xa egutyungelwe ngamanzi emvula. Endaweni yokuba ikhule ngokukhawuleza ngexesha lemvula, le mithi ikhula kade. Emva kokuba amanzi ewuthile kuqalisa ukoma, imithi iyadubula aze amagqabi ayo akhule ngokukhawuleza. Akuba amanzi ephele tu echibini, kusala kukho amagqabi amaninzi aze abole yaye loo nto ichumisa imithi nezinye izityalo xa kungekho mvula.
Izindlu Ezikwizibonda Nezo Zidadayo
Kuthekani ngabantu? Abanye abantu abahlala ngakweli chibi, bazakhela izindlu phezu kwezibonda. Xa imvula ingani, ezi zindlu ziba ziimitha ezintandathu ukuphakama. Kodwa xa kukho izikhukula, amaphenyane abalobi namaphenyane amakhulu ekudla ngokuwezwa ngawo abantwana, ema phambi kweminyango.
Abanye babantu balapha bahlala kwizindlu ezifana namaphenyane abazakhele phezu koqoqo oluphakamileyo olukwaziyo ukudada phezu kwamanzi. Xa intsapho isanda kuye kuxokonyezelwe olunye uqoqo kwandiswe nendlu. Kuqikelewa ukuba kunabemi balo lali abamalulnga ne-170 abahlala kwizindlu ezidada phezu kwamanzi.
Ebudeni bemini, abantwana nabantu abakhulileyo baloba kuloo manzi besebenzisa iminatha nezinye izinto zokuloba. Xa amanzi enyuka okanye ewutha, izindlu okanye yonke loo lali isondela kufutshane nendawo eneentlanzi ezininzi.
Amaphenyane amade enziwe ngemithi aba ziivenkile zokutya yaye kuthuthwa ngawo nabantu. Abantwana abahamba isikolo baya kwizikolo ezidada phezu kwamanzi. Yonke into, izityalo nabantu zihamba nalo mlambo ubuy’ umva.
[Imaphu ekwiphepha 23]
(Ukuba ufuna inkcazelo ehlahlelwe kakuhle, yiya kwimpapasho)
Ixesha lokungabikho kwemvula
Ixesha lemvula
CAMBODIA
Tonle Sap Lake
Tonle Sap River
Mekong River
PHNOM PENH
Bassac River
Mekong Delta
VIETNAM
[Umfanekiso okwiphepha 23]
Inkwenkwe ehamba ngephenyane kuMlambo iTonle Sap
[Imifanekiso ekwiphepha 23]
Imifanekiso yaloo lali ngexesha lokuna kwemvula naxa kungekho mvula
[Inkcazelo Ngemifanekiso ekwiphepha 23]
Map: Based on NASA/Visible Earth imagery; village photos: FAO/Gordon Sharpless