“Ndifuna Ukuphuma Mna Kule Nto!”

Indlu ewohlokayo ibonisa ukungahoywa. Sele kuyiminyaka ithwaxwa ziinkqwithela yaye ayikhange ikwazi ukumelana nezinye zazo. Ngoku ayisomelelanga yaye sele kucaca ukuba inokuwa nanini na.

LO MZEKELO ukunceda ubone imeko ekuyo imitshato emininzi namhlanje. Ngaba nawe wakha wabona ngathi nowakho umtshato ukuloo meko? Ukuba kunjalo, qiniseka ukuba asikho isibini esitshatileyo esingenazo iingxaki. Inyanisile iBhayibhile xa isithi abo batshatileyo baya “kuba nembandezelo enyameni yabo.”—1 Korinte 7:28.

Libethelela ukuba yinyaniso kwaloo mazwi, elinye iqela labaphengululi lithi umtshato “yeyona nto ingaqinisekanga yenziwa rhoqo ngabona bantu baninzi, kwibutho lethu, bengakhange bacingisise ngayo.” Eli qela longezelela ngelithi: “Unokuqala ngathi yeyona nto iyolisayo nethembisayo, uze uphele sele uyeyona nto ibuhlungu ngendlela engathethekiyo kubo bonke ubomi bomntu.”

Kuthekani ke ngowakho umtshato? Ngaba uthwaxwa yenye okanye engakumbi yezi zinto zilandelayo?

● Kusoloko kuxanjuliswana

● Kuyathukwana

● Kukho ongathembekanga

● Kuzondwene

Ukuba umtshato wenu uneengxaki yaye ubonakala unokuphela nanini na ufanele wenze ntoni? Ngaba ukuwuqhawula kusisicombululo?

[Ibhokisi/Umfanekiso okwiphepha 3]

“LWALUNQABILE KODWA NGOKU LUSISONKA SEMIHLA NGEMIHLA”

Inani lemitshato eqhawulwayo lintinga ngokukhawuleza kwamanye amazwe. Cinga nje ngeUnited States, ebekungaqhawulwa mitshato ingako kuyo kangangeminyaka emininzi. Kwincwadi yakhe ethi The Divorce Culture, uBarbara Dafoe Whitehead ubhala athi, kuthe emva kowe-1960, “eli nani landa ngokukhawuleza ngendlela ebingalindelekanga.” Uthi: “Liye laphindaphindeka kwisithuba nje esimalunga neshumi leminyaka laza laqhubeka lintinga de ebutsheni beminyaka yee-1980 laya kuma ngaphezulu kwamanye amazwe ahambele phambili aseNtshona. Ngenxa yoku kuntinga kungathethekiyo, kwisithuba nje seminyaka engama-30, uqhawulo-mtshato luye lwayeka ukuba yinto enqabileyo lwaba sisonka semihla ngemihla.”