Izimvo Zabafundi BakaVukani!
Ukunqongophala Kwamanzi—Kwenziwa Ntoni Ngako? (Januwari 2009) Ndinengxaki ngento ethethwa kweli nqaku. Kunokuba nikhuthaze abafundi bakaVukani! ukuba bancede abanye ngokwakha amaqula, baxhase iinkqubo zokulondolozwa kwamanzi okanye bacinge ngezinye izinto ezibangela le ngxaki, eli nqaku lithi: “NguThixo kungekhona umntu onokucombulula ingxaki yokunqongophala kwamanzi” yaye Uya “‘kwenza zonke izinto zibe ntsha.’ (ISityhilelo 21:5) Nakuba oku kukhuthaza, bekuya kuba bhetele ukuba okwangoku bekunokunikelwa uncedo. Zininzi iingxaki kweli hlabathi. Nangona siqinisekile ukuba uThixo unaso isicombululo, asinakusuka nje sisong’ izandla ngoxa uMtyholi eqhubeka esenza unothanda.
US. S., waseUnited States
“UVukani!” uyaphendula: Eli nqaku alibhalelwanga ukuchazela abantu ukuba bahlale bangenzi migudu yokuphucula imeko ekhoyo. Lona kanye eli nqaku lithi, “UThixo wanika abantu imbopheleleko yokunyamekela lo mhlaba.” Yiyo loo nto siye sapapasha amanqaku amaninzi kumaphephancwadi ethu akhuthaza abafundi bawo ukuba balondoloze baze bakhusele indalo. Noko ke, okulusizi kukuba imigudu yabantu yokukhusela indalo iye yaphazanyiswa yimithetho exhasa ukuhambela phambili kwezoqoqosho kunaleyo ikhuthaza ukulondolozwa kwendalo kanti ezinye ingxaki zibangelwa kukuba abantu abangafezekanga bayabawa yaye bayazingca. Yiloo nto kanye ebangela ukuba sithi “nguThixo, kungekhona umntu onokucombulula ingxaki yokunqongophala kwamanzi.”
Umhlaba—Wadalelwa Ukuba Kuphilwe Kuwo (Februwari 2009) Ngoxa amaziko eendaba ebhala ngezinto ezixhalabisayo zodwa ngokufudumala ngokugqith’ emgceni, ukufunda olu ngcelele lwamanqaku kundenza ndibe noxolo lwengqondo ngokwenene. Ndikhuthazwe gqitha kukwazi ukuba ikamva lomhlaba alikho mfiliba kodwa ngokoqobo nangokomoya, umhlaba uya kuba yiparadesi apho abantu baza kuphila ngoxolo. Sibamba ngazibini.
UM. H., waseJapan
Idyslexia Ayikhange Ibe Ngumqobo (Februwari 2009) Nam ndinengxaki yedyslexia yaye ngelishwa ndandingayiqondi ncam ukuba ingakanani le ngxaki de mna nenkosikazi yam saba ngabavangeli basemazweni ndaza ndazama ukufunda olunye ulwimi. Lindikhuthazile kakhulu eli nqaku, ngokukodwa ibhokisi ekwiphepha 22, eye yandinceda ndaluqonda uhlobo lwengxaki endinayo. Kundichukumisile ukufunda ngendlela uMichael Henborg awakwazi ngayo ukufunda iilwimi eziliqela. Ndibulela kakhulu.
UM. M., waseTanzania
Abantu Abaselula Bayabuza . . . Ndingenza Njani Ukuze Ndikuthande Ukufunda IBhayibhile? (Aprili 2009) Andiboni yaye esikolweni ndisebenzisa iBraille. Ndibulela kakhulu ngeempapasho zenu, kuba ziye zandinceda ndatyhubela kwiingxaki ezininzi ebendinazo. Ndidla ngokuphulaphula iikhasethi neeCD zenu ngaphambi kokuba ndiye kulala. Oko kundenza ndilale ndicinga ngezinto ezihlaziyayo. Ndiye ndaliphulaphula kahlanu eli nqaku yaye ndiye ndafumanisa ezinye iindlela zokuphucula isifundo sam sobuqu.
US. H., waseFransi