NGABA UMHLABA UNOKUKWAZI UKUSINDA?
UMOYA
SIYAWUDINGA umoya ukuze siphefumle nokuze ukhusele umhlaba wethu kubushushu obuvela elangeni. Ukuba ubungekho umoya bekuza kubanda kakhulu apha emhlabeni.
Ubungozi Obubangelwa Kukungcoliswa Komoya
Ukungcoliswa komoya kunokuzibulala izinto eziphilayo emhlabeni. Ngokutsho kweWorld Health Organization, bambalwa kakhulu abantu abaphefumla umoya oklini emhlabeni.
Ukungcoliswa komoya kuye kwabangela nezifo ezinokwenza nemiphunga, umhlaza wemiphunga nezinye izifo ezichaphazela intliziyo. Kukwabangele nokuba abantu abamalunga ne-7 000 000 bakhawuleze basweleke.
Umhlaba Wethu—Udalelwe Ukuba Ukwazi Ukuzilungisa
Umhlaba wethu wenziwe ngendlela yokuba ukwazi ukwenza umoya oklini owaneleyo, okwaziyo ukunceda zonke izinto eziphilayo ezilapha emhlabeni. Kodwa ukwazi ukuyenza le nto xa abantu bekulumkele ukungcolisa umhlaba. Khawucinge ngale mizekelo imbalwa.
Abantu bayayazi ukuba amahlathi ayakwazi ukufunxa icarbon dioxide esemoyeni. Into engaxhaphakanga kukuba imithi ekuthiwa ziimangroves ekhula ngakwimigxobhozo engaselwandle inokuyenza bhetele le nto. Ezimangroves zenza umsebenzi omkhulu wokususa icarbon dioxide emoyeni ngokuphindaphindwe kayi-5 kunaleyo isuswa ngamahlathi anetha imvula kakhulu.
Uphando lubonisa ukuba ingca enkulu yaselwandle efana nekelp ayifunxi nje icarbon dioxide emoyeni kodwa ikwayigcina phantsi komhlaba. Amagqabi ekelp aneendawo ezigcina umoya, eziwanceda ahlale phezu kwamanzi kangangexesha elide. Xa sele ekude elunxwemeni ezindawo zinomoya ziyagqabhuka, ize ikelp enecarbon dioxide yehle iye emazantsi olwandle. Xa ifika ezantsi, ihlala igqunyelelwe ukuze ingabiyongozi kangangamawaka eminyaka.
Ngexesha lokuvaleleka ezindlini ngenxa yeKhorona, siyibonile indlela umoya okwazi ngayo ukuzicoca nangona ubungcoliswe kakhulu. Ngo-2020, emhlabeni wonke xa iifactory zayeka ukusebenza njengesiqhelo kungekho neemoto ezininzi ezihambayo, umoya waye wakhawuleza ukuziklina. “I-2020 World Air Quality Report” ithe, uninzi lwamazwe ababewahlola aye anomoya oklini nangakumbi emva kokuba abantu bevaleleke ezindlini.
Iinzame Ezenziwe Ngabantu
Ukuya ngebhayisekile emsebenzini nasesikolweni kunceda umoya ungabimdaka kakhulu
Oorhulumente baqhubeka bexelela iinkampani indlela yokunciphisa ukungcoliswa komoya. Noososayensi beza neendlela ezintsha zokuklina nalo moya sele umdaka. Ngokomzekelo, enye into abayisebenzisayo zizinto eziphilayo ezingenakubonwa ngamehlo ezijika ubumdaka obusemoyeni buyeke ukuba yingozi. Eny’into, iingcali zicebisa abantu ukuba bahambe ngeenyawo okanye ngeebhayisekile kunokuba baqhube, zikwabacebisa ukuba bazame iindlela zokungawusebenzisi kakhulu umbane emakhayeni abo.
Abanye oorhulumente baye bathengela abantu basemazweni abo izitovu ezikwaziyo ukunceda umoya ungangcoli kakhulu, kodwa abantu abaninzi abakabinazo ezi zitovu
Ingxelo eyenziwa ngo-2022 ziinkampani ezisebenza emhlabeni wonke kuquka iWorld Health Organization neWorld Bank, yabonisa ukuba kusafuneka kusetyenzwe kakhulu.
Le ngxelo yayibonisa ukuba ngo-2020 umntu omnye kwabathathu emhlabeni wonke wayepheka ngezinto ezaziwungcolisa umoya. Kwiindawo ezininzi bambalwa abantu abakwaziyo ukuthenga izitovu ezitsha okanye ezinye izinto ezingawungcolisiyo umoya.
Izizathu Zokuba Nethemba—Ithini IBhayibhile?
“Uthi uThixo wokwenene uYehova, UMdali wamazulu . . . Lowo wolula umhlaba nemveliso yawo, Lowo unika abantu abakuwo impefumlo.”—Isaya 42:5.
NguThixo owenze lo moya siwuphefumlayo ibe nemijikelo yendalo ekhoyo yenzelwe ukuba icoce lo moya. Amandla akhe nothando analo ngabantu makhulu kakhulu futhi awasoze aphele. Ngenxa yaloo nto kusengqiqweni ukukholelwa ukuba uza kukususa ukungcola okusemoyeni. Jonga inqaku elithi “Isithembiso SikaThixo Sokuba Ukungcoliswa Komhlaba Kuza Kuphela.”