Siqinisekiswa Ukuba Ziza Kuphela Izinto Ezimbi!

UTHIXO usinike iLizwi lakhe eliphefumlelweyo elisichazela isizathu sokuba abantu benze izinto ezimbi. Kwakhona usenze sakwazi ukuzikhethela nokuzeyisa nto leyo esenza sikwazi ukukhetha ukungazenzi izinto ezimbi. (Duteronomi 30:15, 16, 19) Loo nto isenza sikwazi ukuyibona imikhwa emibi esenokuba iyakhula kuthi size siyilungise. Ekugqibeleni ukuphepha izinto ezimbi kuya kusenza sonwabe thina kunye nabo basaziyo.—INdumiso 1:1.

Nakuba kunjalo, enoba sizama kangakanani na ukungazenzi izinto ezimbi, ihlabathi lisazaliswe yinkohlakalo eyenziwa ngabantu abangendawo. IBhayibhile ithi: “Ke, kwazi oku, ukuba ngemihla yokugqibela kuya kufika amaxesha amanqam ekunzima ukujamelana nawo.” Ihlabela mgama ichaza isizathu sokuba kube ‘nzima ukujamelana nale mihla’ isithi: “Kuba abantu baya kuba ngabazithandayo, abathandi bemali, abazidlayo, abanekratshi, abanyelisi, abangathobeli bazali, abangenambulelo, abanganyanisekanga, abangenawo umsa wemvelo, abangayifuni kwaphela imvisiswano, abanyelisi, abangenakuzeyisa, iindlobongela, abangathandi kulunga, abangcatshi, abaneentloko ezilukhuni, abakhukhumele likratshi, abathandi beziyolo kunokuba bathande uThixo, benembonakalo yozinikelo lobuthixo kodwa bengaphili ngokuvisisana nalo; ngoko ke zikhwebule kwabanjalo.”—2 Timoti 3:1-5.

Mhlawumbi uliphawule ibinzana elithi ‘imihla yokugqibela’ kwesi siprofeto kuthethwe ngaso ngasentla. Lithetha ukuthini kuwe eli binzana? Abantu abaninzi bathi lithetha ukuthi into ethile iza kuphela. Yintoni bethu le iza kuphela? Khawuve oko uThixo akuthembisayo kwiLizwi lakhe.

Abantu abangendawo baza kutshabalala.

“Kusele ithutyana, angabikho ongendawo; Uya kuyikhangela indawo yakhe, abe engekho. Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”—INDUMISO 37:10, 11.

“UYehova uyabalinda bonke abo bamthandayo, kodwa bonke abangendawo uya kubabhubhisa.”—INDUMISO 145:20.

Ingcinezelo iza kuphela.

“Kuba uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi. Uya kuwukhulula umphefumlo wabo kwingcinezelo nakugonyamelo.”—INDUMISO 72:12, 14.

“Indalo ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo.”—ROMA 8:21.

UThixo uza kubanyamekela abantu.

“Baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo.”—MIKA 4:4.

“Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kwakha kuhlale abanye; abayi kutyala kudle abanye. Kuba njengemihla yomthi iya kuba njalo imihla yabantu bam; nomsebenzi wezandla zabanyuliweyo bam baya kuwusebenzisa ngokupheleleyo.”—ISAYA 65:21, 22.

Kuza kubakho okusesikweni.

“Ngokuqinisekileyo, ngoko, akayi kuthi na uThixo abangele ukuba okusesikweni kwenziwe kwabo banyuliweyo bakhe abadanduluka kuye imini nobusuku . . . ? Ndithi kuni, Uya kubangela ukuba okusesikweni kwenziwe kubo ngokukhawuleza.”—LUKA 18:7, 8.

“Kuba uYehova ngumthandi wokusesikweni, yaye akayi kubashiya abanyanisekileyo bakhe. Ngokuqinisekileyo baya kulindwa ukusa kwixesha elingenammiselo.”—INDUMISO 37:28.

Ukuzingca kuya kuthatyathelw’ indawo bubulungisa.

“Ngokuqinisekileyo abemi belizwe elinemveliso baya kufunda ubulungisa.”—ISAYA 26:9.

“Silindele amazulu amatsha nomhlaba omtsha, ngokwesithembiso sakhe, apho kumi ubulungisa.”—2 PETROS 3:13.

Nanamhlanje Bakhona Abantu Abatshintshayo

Ngokungathandabuzekiyo, sonke siyavuya xa sisiva ezi zithembiso. Kodwa yintoni esenza siqiniseke ukuba ziza kuzaliseka? Kaloku sele bukho ubungqina bokuba izithembiso zikaThixo ziza kuzaliseka. Bubuphi obo bungqina? Sibubona kwinto yokuba izigidi zabantu emhlabeni jikelele sele zikwazile ukwahlukana nekratshi, ukuziphatha okubi nobundlobongela kwaye ziye zafunda ukunyaniseka, ukuba noxolo nokuba ngabantu abanobubele. Namhlanje amaNgqina kaYehova angaphezu kwezigidi ezisixhenxe ehlabathini jikelele awohlukaniswanga bubuhlanga, ezopolitiko nezoqoqosho, zinto ezo eziye zabangela intiyo engathethekiyo, ugonyamelo nokuphalazwa kwegazi ukutyhubela imbali.a Ukwenzeka kotshintsho olunjalo kwenza siqiniseke ukuba ziza kuzaliseka ngomlinganiselo omkhulu zonke izithembiso zikaThixo.

Yintoni eye yatshintsha aba bantu? Impendulo ifumaneka kwesinye isithembiso seBhayibhile esabhalwa ngumprofeti uIsaya. Wathi:

“Ingcuka iya kuhlala ithutyana nenkunzi yemvana, ihlosi libuthe netakane, kubuthe ndawonye ithole lenkomo nengonyama entsha enesingci, nesilwanyana esondlekileyo; nenkwenkwana iziqhube ezo zinto. . . . Kwanengonyama iya kudla iindiza kanye njengenkunzi yenkomo. Umntwana owanyayo ngokuqinisekileyo uya kudlala emngxunyeni wephimpi; nomntwana olunyulweyo abeke isandla sakhe emngxunyeni wenyoka enobuhlungu. Aziyi kwenzakalisa okanye zonakalise entabeni yam yonke engcwele; ngenxa yokuba umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.”—Isaya 11:6-9.

Ngaba esi siprofeto sithetha kuphela ngexesha apho abantu beya kuhlala ngoxolo nezilwanyana? Akunjalo, kunoko sithetha okungakumbi. Phawula ukuba isivakalisi sokugqibela sichaza isizathu solu tshintsho sisithi: “Umhlaba ngokuqinisekileyo uya kuzaliswa kukwazi uYehova.” Ngaba ukwazi uThixo kuyazitshintsha izilwanyana? Ayikwazi ukwenzeka loo nto. Kodwa olo lwazi luyakwazi ukutshintha abantu. Esi siprofeto sithi abantu abaziphatha okwezilwanyana baza kutshintsha baze babe nobuntu obufana nobukaKristu ngenxa yokuthobela iBhayibhile.

Ngokomzekelo, makhe sithethe ngoPedro.b Le ndoda yajoyina umbutho wabagrogrisi kuba icinga ukuba ilwela okusesikweni. Emva kokuba iqeqeshiwe yathunywa ukuba iye kuqhushumbisa inkampu ehlala amapolisa. Kodwa ke yabanjwa njengoko yayilungiselela ukuya apho. UPedro wabanjwa iinyanga ezili-18 yaye nentolongo leyo ayizange imtshintshe. Kodwa ke ngelo xesha umkakhe waqalisa ukufunda iBhayibhile namaNgqina kaYehova. NoPedro waqalisa ukufunda iBhayibhile emva kokukhululwa kwakhe yaye izinto awazifunda ngoYehova uThixo zamenza watshintsha ubuntu bakhe nendlela awayephila ngayo. UPedro uthi: “Ndiyambulela uYehova kuba ndingazange ndide ndibulale mntu ngoxa ndandingumgrogrisi. Ngoku ndisebenzisa ikrele lomoya kaThixo iBhayibhile ukuze ndifundise abantu ngoxolo nobulungisa bokwenene—iindaba ezilungileyo ezingoBukumkani bukaThixo.” UPedro wade waya nakwinkampu awayeceba ukuyiqhushumbisa ukuze aye kufundisa abantu ngehlabathi elinoxolo nelingenalo ugonyamelo.

Indlela elibutshintsha ngayo ubomi babantu iLizwi likaThixo isinika izizathu ezingakumbi zokuba nokholo kwizithembiso zikaThixo zokuba uza kubuphelisa bonke ubungendawo. Abantu abazukuqhubeka besenza izinto ezimbi ngonaphakade kodwa baza kutshintsha. Kungekudala uYehova uza kususa oyena nobangela wobungendawo, uSathana uMtyholi. Kaloku iBhayibhile ithi: “Ihlabathi liphela lisemandleni ongendawo.” (1 Yohane 5:19) Kodwa ke uza kutshabalala kungekudala. Kuza kuba njalo nakubantu abala ngenkani ukushiya iindlela zabo ezimbi. Kuza kuba mnandi ngokwenene ukuphila ngelo xesha.

Yintoni omele uyenze ukuze uphile ngelo xesha? Khumbula ukuba “kukwazi uYehova” okutshintsha abantu namhlanje nokuza kutshintsha umhlaba wonke kwixesha elizayo. Nawe unokuba nethuba lokuphila kwihlabathi ‘elinobulungisa’ ukuba ufumana ulwazi oluchanileyo oluseBhayibhileni uze ulusebenzise njengoPedro. (2 Petros 3:13) Ngoko sikukhuthaza ukuba usebenzise eli thuba liseleyo ukuze ufunde ngoThixo noYesu Kristu, kuba loo nto inokukwenza uphile ngonaphakade.—Yohane 17:3.

[Imibhalo esemazantsi]

[Amagama acatshulweyo akwiphepha 9]

Unokuba nethuba lokuphila kwihlabathi ‘elinobulungisa.’—2 PETROS 3:13