Ngaba Kukho Umntu Obangela Bonke Obu Bubi?

“NDENZE isivumelwano nomtyholi.” Yatsho njalo inkumanda yomkhosi weUnited Nations, ithetha ngokusilela kwawo ukuthintela ukubulawa kwabantu eRwanda ngowe-1994. Ebhekisela kuloo nkohlakalo, omnye umakhi mkhanya wathi: “Ukuba kukho umntu ongakholelwayo nangoku ukuba ukho uSathana, masidibane emangcwabeni eRwanda.” Ngaba ngokwenene lo ngumsebenzi kaMtyholi?

Abantu abaninzi abajongi ugonyamelo nenkohlakalo njengebangelwa sisidalwa somoya esingendawo. Abaninzi bacinga ukuba ezo zinto zibangelwa bububi esidalwe nabo njengabantu nokuba oyena nobangela wobubi ikwasithi. Abanye banoluvo lokuba kukho iqela lezityebi ezinempembelelo ehlabathini lonke, eliye lasebenzisa amaqhinga kangangamashumi eminyaka lizama ukulawula ihlabathi. Kukho nabanye abathi konke ukungabikho kokusesikweni nokubandezeleka esikubonayo kubangelwa ngoorhulumente.

Uthini wena? Kutheni ububi, inkohlakalo, izinto ezimasikizi nokubandezeleka kuxhaphake kangaka ehlabathini lonke ngaphezu kwazo nje iinzame zokuziphelisa? Kutheni uluntu lubonakala luzibetha ngenyhek’ etyeni, lungazinanzi izilumkiso eziphindaphindiweyo oluzifumanayo? Ngaba ukho umntu obangela ezi zinto? Ngubani ngokwenene olawula ihlabathi? Unokothuka xa usiva impendulo yalo mbuzo.