3 UThixo Unempindezelo—Ngaba Yinyaniso?
Mhlawumbi wakhe weva kusithiwa: “UThixo ubhala zonke izono esizenzayo aze aboni abohlwaye ngokubatshisa esihogweni somlilo ngonaphakade.”
“UThixo ubohlwaya ngeentlekele zemvelo aboni.”
Oko kufundiswa yiBhayibhile: Eyesibini kaPetros 3:9 ithi uYehova “akanqweneli ukuba kutshabalale nabani na kodwa unqwenela ukuba bonke bafikelele enguqukweni.” Kunokuba anikele ingqalelo kwiintsilelo zethu, ujonga izinto ezintle esizenzayo. “Amehlo [kaThixo] asingasinga emhlabeni wonke ukuba ababonise amandla abo bantliziyo ziphelele kuye.”—2 Kronike 16:9.
Ukutshiswa kwabantu esihogweni asiyomfundiso yeBhayibhile—uyayicekisa uThixo loo nto. Esona sohlwayo siqatha anokubohlwaya ngaso abantu abangendawo kukubohlutha isipho sobomi. (Yeremiya 7:31; Roma 6:7) Iintlekele zemvelo ezitshabalalisa kwanto, aziveli kuThixo, kodwa zizehlo ezingenakubonwa kwangaphambili ezinokwehlela nabani na.—INtshumayeli 9:11.
Indlela ekukunceda ngayo ukwazi inyaniso: Sinokusondela kuThixo xa siqonda ukuba “ukulungele ukuxolela” yaye akasoloko esihlaba amadlala. (INdumiso 86:5) Asimele sikhonze uThixo kuba siziva sinetyala okanye sisoyika isohlwayo. Kunoko, ukholo lwethu sinokulusekela ekuthandeni uYehova. Olo thando lusikhuthaza ukuba senze konke okusemandleni ukuze simkholise.—Mateyu 22:36-38; 1 Yohane 5:3.
Nakuba uThixo efuna wonke umntu aguquke, uyazi ukuba abantu abaninzi abasoze bakwazi. Ukuba ebengasoze abohlwaye abo benza izinto ezimbi, ebengayi kwahluka kumlawuli owenza imithetho akugqiba angayilandeleli, avumele ukungabikho kokusesikweni nokubandezeleka kuqhubeke. (INtshumayeli 8:11) Ukwazi ukuba uThixo akasoze abuvumele ngonaphakade ubungendawo kusinika ithemba lekamva eliqaqambileyo. UThixo usithembise ukuba uza kubatshabalalisa abo baqhubeka besenza izinto ezimbi ukuze “abalulamileyo” bafumane ubomi obungunaphakade emhlabeni ngokuvisisana nenjongo yakhe yantlandlolo.—INdumiso 37:10, 11, 29.a
[Umbhalo osemazantsi]
a Ukuze ufunde okungakumbi ngendlela uThixo aza kuwenza ngayo umhlaba ube yiparadesi, funda isahluko 3 nese-8 sencwadi ethi Yintoni Ngokwenene Efundiswa YiBhayibhile?
[Amagama acatshulweyo akwiphepha 6]
Ngaba uThixo ebeya kufuna simkhonze kuba sisoyika ukohlwaywa?
[Inkcazelo Ngomfanekiso okwiphepha 6]
Engravings by Doré