Ubomi Ngamaxesha Okubhalwa KweBhayibhile—Iimvumi Nezixhobo Zazo Zomculo
“Mdumiseni ngokuvuthela isigodlo. Mdumiseni ngomrhubhe nohadi. Mdumiseni ngentambula nangokungqungqa nijikeleza. Mdumiseni ngemirhubhe nogwali. Mdumiseni ngamacangci anesandi soncuthu lomculo. Mdumiseni ngamacangci akhenkcezayo.”—INDUMISO 150:3-5.
UMCULO neemvumi kudala zaba nendima ebalulekileyo ekunquleni uYehova uThixo. Ngokomzekelo, xa uYehova wahlangula amaSirayeli ngokungummangaliso kuLwandle Olubomvu, udade boMoses uMiriyam, wahlabela ingoma yoloyiso waze wangqungqa. La mabhinqa ayedlala intambula ngoxa engqungqa. Esi siganeko sibonisa indlela owawubaluleke ngayo umculo kumaSirayeli—ayegqiba kusaba kumkhosi wamaYiputa, sekunjalo amabhinqa amaninzi ayephethe izixhobo zawo zomculo yaye ekulungele ukuzidlala. (Eksodus 15:20) Kamva, uKumkani uDavide waququzelela ukuba amawaka eemvumi adlale izixhobo zawo zomculo xa kunqulwa etempileni eyayakhiwe ngunyana wakhe uSolomon.—1 Kronike 23:5.
Zazenziwe ngantoni ezi zixhobo? Zazikhangeleka njani? Zazinezandi ezinjani? Yaye zazisetyenziswa nini?
Iintlobo Zezixhobo Zomculo
Izixhobo zomculo ezichazwe eBhayibhileni zazenziwe ngemithi exabisekileyo, izikhumba ezisukiweyo zezilwanyana, isinyithi nethambo. Ezinye zazalekwe ngophondo lwendlovu. Iintambo zazenziwe ngemicu yezityalo nangamathumbu ezilwanyana. Nakuba zingasekho izixhobo zomculo zamandulo, isekho imizobo yazo.
Izixhobo ezazisetyenziswa ngamaxesha okubhalwa kweBhayibhile zinokwahlulwa zibe ziindidi ezintathu: izixhobo ezineentambo, njengohadi, (1), nesiginkci (2); izixhobo ezivuthelwayo, njengophondo okanye isigodlo (3), ixilongo (4), imbande ethandwa gqitha okanye ugwali (5); izixhobo ezibethwayo, intambula (6), amacangci akhenkcezayo (7), amacangci abethiswanayo (8) neentsimbi (9). Iimvumi zazidlala ezi zixhobo xa kuculwa imibongo, zingqungqa, naxa zivuma. (1 Samuweli 18:6, 7) Okubaluleke nangakumbi, zazizisebenzisa xa zinqula uThixo owayezisikelele ngesipho somculo. (1 Kronike 15:16) Khawuqwalasele udidi ngalunye lwezi zixhobo.
Izixhobo Ezineentambo Uhadi lwalusisixhobo esenziwe ngomthi esineentambo, ekulula ukusiphatha. UDavide wayemdlalela uhadi uKumkani uSawule xa edandathekile. (1 Samuweli 16:23) Ezi zixhobo zazisetyenziswa kumculo weokhestra xa kwakunikezelwa itempile kaSolomon naxa kubhiyozwa.—2 Kronike 5:12; 9:11.
Isiginkci sasiyelelene kuhadi, kodwa indlela esenziwe ngayo yayahlukile. Sona sineentambo ezimbalwa. Olu hlobo lwesiginkci lwaluvelisa isandi esingafaniyo nesesiginkci esisetyenziswa kule mihla. Iintambo zaso zazenziwe ngemicu yezityalo ephothiweyo okanye ngamathumbu ezilwanyana.
Izixhobo Ezivuthelwayo Ezi, zizixhobo ezisoloko zivela eBhayibhileni. Esinye sezona zidala luphondo lwamaYuda, ekuthiwa sisigodlo. Olu phondo lwenkunz’ egusha lwalunesandi esinamandla, esingxolayo. AmaSirayeli ayevuthela isigodlo xa ehlab’ umkhosi edabini naxa kubizwa abantu.—ABagwebi 3:27; 7:22.
Esinye isixhobo esivuthelwayo yayilixilongo elenziwe ngesinyithi. Uxwebhu olwafumaneka phakathi kwemiSongo Yolwandle Olufileyo lubonisa ukuba iimvumi zazikwazi ukudlala izandi ezahlukeneyo kwezi zixhobo. UYehova wayalela uMoses ukuba enze amaxilongo amabini esilivere aza kusentyenziswa kumnquba wokuhlangana. (Numeri 10:2-7) Kamva, xa kwakunikezelwa itempile kaSolomon, amaxilongo angama-120 ongeza isandi esinamandla kulo mbhiyozo. (2 Kronike 5:12, 13) Iingcibi zazisenza amaxilongo anobude obahlukahlukeneyo. Amanye ayenobude obuziisentimitha ezingama-91.
Isixhobo esivuthelwayo esasithandwa gqitha ngamaSirayeli yayiyimbande. Isandi sayo esimnandi sasibenza bonwabe abantu abeze kwiimbutho zeentsapho, ezidlweni nasemitshatweni. (1 Kumkani 1:40; Isaya 30:29) Imbande yayidlalwa naxa kukho umngcwabo, xa iimvumi zidlala iingoma ezilusizi zokuzila (funda iphepha 14).—Mateyu 9:23.
Izixhobo Ezibethwayo Xa amaSirayeli ebhiyoza, ayesebenzisa iintlobo ezahlukahlukeneyo zezixhobo ezibethwayo. Isingqi sazo sasivuselela iimvakalelo ezinamandla. Intambula, yayiligubu elenziwe ngesikhumba sesilwanyana, xa imvumi ilibetha ngesandla livelisa isandi esihambisana nemvumi leyo okanye lowo ungqungqayo. Xa imvumi ilishukumisa iintsinjana ezingaphandle zazisitsho ngentsholo emnandi.
Esinye isixhobo esibethwayo sasenziwe ngentsimbi egotywe yamila okwesaphetha nefakelwe iingcingo ezixananazileyo kwaza kwezo ngcingo kwagqojozelwa amacangci amancinane. Xa sishukunyiswa sitsho ngentsholo emnandi.
Amacangci obhedu akhenkcezayo wona ayesenza intsholo engakumbi. Yayingamacangci amabini asisazinge. Ayebethaniswa ngamandla xa edlalwa. Ayekhona namancinane awayefakwa phakathi kweminwe. Zombini ezi zixhobo zazibethaniswa ukuze zenze intsholo kodwa engafaniyo.—INdumiso 150:5.
Indlela Efanayo
Namhlanje, amaNgqina kaYehova aqala aze aqukumbele iintlanganiso zawo ngomculo. Kwiindibano zawo ezinkulu, umculo weokhestra orekhodiweyo uquka izixhobo zale mihla ezineentambo, ezivuthelwayo, nezo zibethaniswayo.
Kule mihla amaNgqina kaYehova asebenzisa izixhobo zomculo xa ecula kunqulo lawo, ngaloo ndlela axelisa umzekelo wamaSirayeli amandulo nowamaKristu enkulungwane yokuqala. (Efese 5:19) Njengabakhonzi bakaThixo bamaxesha okubhalwa kweBhayibhile, amaNgqina kaYehova namhlanje ayakuthanda ukucula ukuze adumise uYehova.
[Imifanekiso ekwiphepha 23]
(Aziphelelanga apha ezi zixhobo)
(Yiya kwimpapasho)