Ntakihe Moopora Yehova ni Yeesu Anuupuwela Awa

1-2. Eseeni enhela mpuwa ompheta Yehova, ni Yeesu oonihenre dhai wiira animpheta Tiithye?

YEESU aahilotta yooruma yuulupale ya nlamulo na Moise, airaka: ‘Mumpheta Yehova Muluku nnyu ni nrima nnyu wootheene, ni ekumi nnyu yootheene, ni ikuru dhinyu dhootheene ni muupuwelo nnyu wootheene.’ (Luka 10:27) Nkhama enlotta awa yawaatikhiwa ela, ompheta wihu Yehova onlipa ni nrima nhu, elo ehela mpuwa dhootthuna dhihu, moonelo ni miyuupuwelo dhihu. Nitho onhela mpuwa wiivahererya wihu wa Yehova ni ekumi nhu yootheene ni ikuru dhihu dhootheene. Ohiya-vo, ompheta wihu Yehova onlipa ni muupuwelo nhu, elo enhela mpuwa moopora ninoonela nhu khuta mwaha. Ekhweeli wiira hiyo khaninwerya odhuwela moomalela moopora Yehova onuupuwela iye. Masi osoma “muupuwelo wa Kristu” onoowerya onikhalihera odhuwela saana moopora Muluku onuupuwela iye. Okhala wiira Yeesu ootakiha moomalela muupuwelo wa Tiithye.—1 aKor. 2:16

² Yeesu animpheta Yehova ni muupuwelo wootheene. Owo aahidhuwela etthu Yehova aatthuna iye wiira apaka ni aahilakela opaka itthu dhootheene wiira anhakalalihe Yehova, hata elo, yaataphulela ohaasiwa. Yeesu aniluttuweliwa opaka yootthuna ya Atiithi-ye. Tivondho owo khahin’ye itthu dhikina dhikhalaka nipuro noopacera ohiya opaka yootthuna ya Yehova.

3. Eparakha seeni nrummwa Pheeduru aariiyena, ni eseeni atumerenrye iye Makiristau opaka? (1 Pedru 4:1)

³ Pheeduru vamodha ni arummwa akina yaahikhalana eparakha yuulupale ya okhala vamodha ni Yeesu ni woona ni moopora uupuwela iye. Okathi Pheeduru aatinkhe iye ewarakha yoopacera, owo ahaatumerera Makiristau wiilokihera ettharaka muupuwelo wa Kiristu.a (Munsome 1 Pedru 4:1.) Pheeduru ahirumeela noolumo naarumeeliwa okhottoni vaavo aatinke iye wiira: ‘Mwiilokihere.’ Ndho, vakhala wiira Makiristau anootakiha Yeesu ettharaka moopora uupuwela iye anoowerya oxira miyuupuwelo dhoohiloka ni olumwinku ola onlamuleliwa ni Satana.—2 aKor. 10:3-5; aEefe. 6:12.

4. Eseeni nin’ya nhu othokorerya yoosoma ela?

⁴ Yoosoma ela, nin’ya woona (1) moopora nikhanle otakiha moopora Yehova onuupuwela iye, (2) okhala awiiyeviha ni (3) okhalana muupuwelo wooloka ninroromelaka Yehova oreela wa opaka mavekelo. Wiira nipaka elo, nin’ya othokorerya moopora Yeesu uupuwela iye ni moopora nikhanle nhu ontakiha.

MUNTAKIHE YEHOVA MUUPUWELAKA NKHAMA ONUUPUWELA IYE

5. Eseeni Pheeduru aapanke iye yoonihera wiira kharina muupuwelo wa Yehova?

⁵ Vano, nirowe nithokorerye okathi omodha Pheeduru oonihenre iye wiira khuupuwenle nkhama Yehova onuupuwela iye voohima dha mwaha mmodha. Yeesu aahaaleela arummwa wiira noomala anrowa oYerusaleemu, anvahereriwa mmatatani wa ahooleli a itiini, ohaasiwa ni wookhidherani wiiphiwa. (Math. 16:21) Pheeduru aanidhuwela wiira Yeesu aari Mesiya aalaiheriwe yoowo aaya owoopola atthu a Muluku. Masi owo waaninliperya okhupali wiira Yehova amwaakhulela ohiya Mwane oonihiwaka ekoyi mpakha okhwa. (Math. 16:16) Tivondho, Pheeduru aahimwitthana Yeesu wiiphini akanleela wiira: ‘Pwiya, mwiireerele nrima. Itthu idho khadhinrowa wookhumelelani nnakhala vakhaani.’ (Math. 16:22) Masi Yeesu khaakhulenle moonelo wa Pheeduru okhala wiira khiyaavarihana ni muupuwelo wa Yehova.

6. Yeesu oonihenre dhai wiira aatakiha muupuwelo wa Yehova?

⁶ Yeesu aanidhuwela moomalela muupuwelo wa Yehova ni anintakiha Tiithye. Tivondho aahinleela Pheeduru wiira: ‘Nkhume ohoolo waka, Satana! Nyuwo mwa nluku ninkikakattula, okhala wiira nrina miyuupuwelo dha apinaatamu, ohiya dha Muluku.’ (Math. 16:23) Woonawene Pheeduru aahikhalana mathowa awaatta ooreera yaamwiirinhe olotta moolumo ale, masi Yeesu aahikhootta miruku dha Pheeduru. Yeesu aanidhuwela wiira opaka yootthuna ya Yehova waavekela ohaawa ni okhwa. Okathi ole, Pheeduru aahihudha wiira etthu yootthuneya wuupuwela nkhama Yehova onuupuwela iye. Ndho elo etthu yuulupale enihudhiha awa yawiiraneya ela.

7. Noovira okathi, Pheeduru oonihenre dhai wiira aanitthuna okhala muupuwelo onvarihana ni muupuwelo wa Yehova? (Moone efootu ya ekaapa.)

⁷ Noovira okathi, Pheeduru aahoonihera wiira aatthuna okhala moovarihana ni muupuwelo wa Yehova. Owo aahoonihera elo noomala ophiya okathi wa amalapo aahiidho okathi atthu yahaakhanle ayuuda yaapacere wiirela mphantta nloko na arumeyi a Muluku. Yehova aahinruma Pheeduru wiira anlaleerye Korneeliyu, yoowo aari mmalapo oopacenre okhala nkiristau. Okathi ole, ayuuda khiyaakhala opuro omodha nnakhala owaattamela amalapo. Ndho wiira Pheeduru awerye waalaleerya aanitthuneya opaka marukunuso. Tivondho noomala Pheeduru odhuwela moopora Yehova awoonela iye amalapo, owo ahipaka marukunuso. Ndho, okathi Korneeliyu anvekenle iye Pheeduru wiira ansekurye owannye, owo aahirowa ‘ahaakanyeraka etthu.’ (Mit. 10:28, 29) Noomala Pheeduru ophiya, aahinlaleerya Korneeliyu vamodha ni atthu a ettheko-ye, moottharelana epatisiwa.—Mit. 10:21-23, 34, 35, 44-48.

8. Nin’ya woonihera dhai wiira moopora ninuupuwela nhu onnivarihana ni muupuwelo wa Yehova? (1 Pedru 3:8)

⁸ Iyaakha vakhaani dhaattharelana, Pheeduru ahaatumererya Makiristau okhala ‘awiiraana mmuupuweloni’ aahiidho okhalana muupuwelo mmodharu. (Munsome 1 Pedru 3:8.) Nkhama arumeyi a Yehova, ninoowerya opaka elo nihudhaka mbiibiliyani ni otakiha moopora Yehova onuupuwela iye. Mwa ntakihero, okathi Yeesu aariiye valaponi ahaatumerera atthareli-ye opweha nipuro noopacera Omwene mweekumini-mwa. (Math. 6:33) Nkahaya muupuwele ela: Munna mmodha aahiidho nrokora a muloko nnyu oothanla okhala piyoneeru aahiidho ovara nteko wa okathi wootheene. Vaavo eniiraneya awa elo, nihaana oxaka olotta moolumo ankhale onkhulumula aahiidho ontumererya opaka yoothanla ekina wiira akhalena ekumi yooreera. Ohiya-vo, nilotte yoolukama-ye ya omunepani mwa enamuna yookhalela ni wiivahererya wiira ninkhalihere.

NKHALE AWIIYEVIHA

9-10. Yeesu ovanhe dhai ntakihero nuulupale na awiiyeviha?

⁹ Ohiyu wookhidhera Yeesu ahinatthi okhwa, ahinhudhiha Pheeduru vamodha ni arummwa akina etthu yootepa ootthuneya voohima dha wiiyeviha. Noovira okathi vakhaani, Yeesu ahinruma Pheeduru ni Yoohaani wiira erowa yakocihere eyooca yookhidhera aaya iye oca vamodha ni arummwa ahinatthi okhwa. Woonawene, elo yaahela mpuwa okocihera epasiya ni ituwalya wiira arummwa-ye ootheene ewerye orapihiwa manawu ehinatthi opacere oca. Masi taani aaya woonihera wiiyeviha aakhulelaka ovara nteko owo?

¹⁰ Wiira Yeesu aahudhihe arummwa etthu yootepa ootthuneya, aahaavaha ntakihero nuulupale na wiiyeviha. Arummwa yaahixanka noomala omoona Yeesu voohuuleliwe muru ni mwawiiyeviha avaraka nteko waavariwa ni epottha. Yeesu aahirula nlaya-ne na ota, akusa etuwalya athukelela n’yuununi, noomala ahihela maadhi mpasiyani apacera orapiha manawu aarummwa-ye. (Yohani 13:4, 5) Woonawene Yeesu ahiviriha okathi wawaatta arapihaka manawu aarummwa ootheene 12, onhela mpuwa Yuuda, yoowo aaya omphariha. Yeesu aahivara nteko owo mwawiiyeviha mpakha oomaliha. Noomala-vo owo aahaaleela moopisa nrima airaka: ‘Nyuwo moodhuwela etthu kiwiirelakani? Nyuwo munnikiitthana okhala ‘Nhudhihi’ ni ‘Pwiya,’ ndho munlotta nnyu ekhweeli. Tthiri miyo ka yoowo. Tivondho, akhala wiira miyo, kiri Pwiya ni Nhudhihi, koorapiha manawu nnyu, ni nyuwo-tho nhaana orapihana manawu.’—Yohani 13:12-14.

11. Pheeduru oonihenre dhai wiira aahihudha okhala awiiyeviha? (1 Pedru 5:5) (Moone-tho efootu.)

¹¹ Pheeduru aahihudha etthu ni wiiyeviha wa Yeesu. Noomala Yeesu otthikela wiirimu, Pheeduru aahipaka mwiirirya mmodha ampenusa nlopwana aayariwe oorakala ene. (Mit. 1:8, 9; 3:2, 6-8) Voohaakanyera mwiiriirya ole, waahaatikiniha atthu awaatta yoonne. (Mit. 3:11) Niire mwaha wa Pheeduru ohuiwa elapo atthu yaavaha awa efaita wooniwa okhala ootthuneya, waahimwiiriha okathi ole wiittottopa? Naari. Ohiya-vo, mwawiiyeviha ahaaleela atthu ale onvuwiha Yehova ni Yeesu, airaka: ‘Mwa ndhina [na Yeesu], ni mwaha wa waamini wihu ndhina-ne, metto dha nlopwana ola mummoona nnyu ni munindhuwela nnyu, dhoolipihiwa.’ (Mit. 3:12-16) Moolumo aarumeenle iye ewarakha emodha awaatikenle iye Makiristau, Pheeduru aahaatumererya woonihera wiiyeviha aahiidho nkhama enlotta awa enoota owara wiiyeviha. Moolumo ala anninuupusera okathi Yeesu aathukulenle iye etuwalya n’yuununi apacera orapiha manawu arummwa.—Munsome 1 Pedru 5:5.

12. Nkhama Pheeduru eseeni en’ya onikhalihera ohihiya okhala awiiyeviha?

¹² Ninoowerya otthara ntakihero na Pheeduru nihihiyaka okhala atthu awiiyeviha. Nhiliyale wiira wiiyeviha weekhweeli khomphiyera pahi wooniheriwa ni moolumo. Pheeduru ahirumeele nuulumo nawi “wiiyeviha” nenno ninoonihera wiira wiiyeviha weekhweeli onhela mpuwa miyuupuwelo dhihu dhinkhuma vanrima. Hiyo ninnaapakela atthu akina itthu dhooreera, okhala wiira ninnimpheta Yehova ohiya mwaha wootthuna ottottopeliwa. Ndho hiyo ninnoonihera wiira na atthu awiiyeviha, vaavo niniilipihera nhu opaka itthu dhootheene ninwerya nhu wiira ninrumeele Yehova vamodha ni annihu voohakalala, hata atthu akina ehoonaka itthu nimpaka nhu.—Math. 6:1-4.

NKHALENA “MUUPUWELO WOOLOKA”

13. Eseeni enhela mpuwa okhalana “muupuwelo wooloka? Ntthokihere.

¹³ Eseeni ehela mpuwa okhalana “muupuwelo wooloka? (1 Ped. 4:7) Nkiristau orina muupuwelo wooloka onnilipihera opaka dhoothanla dhinvarihana ni muupuwelo wa Yehova. Owo onnikhupali wiira khiyaavo etthu yootepa otthuneya mweekumini oxira okhalana waataana ni Yehova. Ohiya-vo, ookhalana moonelo wooloka voohima dha yeene ni onnidhuwela wiira dhookhala itthu ohindhuwela iye. Nitho onnoonihera onroromela Yehova anvekelaka okathi wootheene malakihero.b

14. Okathi seeni Pheeduru oonihenre iye ohinroromela Yehova?

¹⁴ Ohiyu ole wookhidhera Yeesu ahinatthi okhwa, ahaaleela arummwa-ye wiira: ‘Ohiyu ola ootheene nnyu munookikhootta.’ Pheeduru aahaakhula wiira: “Hata otheene yoohiyakani, miyo nkinoohiyani!” Noomala Yeesu aahaavaha miruku arummwa akina airaka: ‘Nthipelele wiikocela, nvekeleke voohihiyerera.’ (Math. 26:31, 33, 41) Masi okathi ole Pheeduru khaatthare miruku idhe. Vaakhale wiira aahipaka elo, woonawene amoonihera olipa nrima alottaka wiira aari nhudheri a Yeesu. Masi mooriipiha nrima, Pheeduru aahinkhootta Yeesu ivaara tthaaru, ndho mwaha woopaka elo aahiriipiha nrima ni ahimwiira keerihiweni.—Math. 26:69-75.

15. Eseeni yaankhalihenre Yeesu okhalana muupuwelo wooloka ohiyu wookhidhera ahinatthi okhwa?

¹⁵ Yeesu aninromela Yehova ni nrima wootheene. Nnaamwi aari oomalela, ohiyu aaya iye okhwa aahivekela ivaara dhawaatta. Ndho opaka elo yaahinvaha olipa nrima wiira awerye ovilela itthu dhootheene dhaaya onkhumelela wiira aakhwanihere yootthuna ya Yehova. (Math. 26:39, 42, 44; Yohani 18:4, 5) Voohaakanyera, Pheeduru khaakhala-khala aliyalaka wiira Yeesu aahinvekela ivaara dhawaatta ohiyu aaya iye okhwa.

16. Pheeduru oonihenre dhai wiira aahikhalana muupuwelo wooloka? (1 Pedru 4:7)

¹⁶ Noovira okathi, Pheeduru aahihudha onroromela Yehova apakaka mavekelo. Noomala Yeesu ohihimusiwa aahinlaihera Pheeduru vamodha ni arummwa akina wiira yaamwaakhela munepa wawaarya wiira ewerye olaleya ihapari dhooreera. Tivondho, ahaavekela okhala oYerusaleemu elipelelaka elo wiiraneya. (Luka 24:49; Mit. 1:4, 5) Ndho, eseeni Pheeduru aapaka iye alipelelaka ophiya okathi owo? Owo vamodha ni Makiristau makina “yaanikhalela nthiti ovekela.” (Mit. 1:13, 14) Noovira okathi, Pheeduru ahaatikha ewarakha yoopacera, aahaatumererya Makiristau okhalana muupuwelo wooloka ni onroromela Yehova evekelaka okathi wootheene. (Munsome 1 Pedru 4:7.) Mwaha wa opaka elo, Pheeduru aahihudha onroromela Yehova ni okhalihera vawaatta mmulokoni.—aGal. 2:9.

17. Voohixikha itthu dhinikhumelenle khalai aahiidho nindhuwela nhu, etthu eseeni nihinreela nhu ohiya opaka? (Moone-tho efootu.)

¹⁷ Wiira nikhalena muupuwelo wooloka nihaana okhalela nthiti onvekela Yehova. Ndho voohixikha itthu dhinikhumelenle khalai aahiidho nindhuwela nhu okathi wootheene tivootthuneya onvekela Yehova wiira anikhalihere. Tivondho nihinatthi opaka yoothanla yootthuneya, nihaana onvekela Yehova malakihero nikhupaliki wiira owo onnidhuwela ele eri yooreera wa hiyo.

18. Nin’ya owerya dhai otakiha moopora Yehova onuupuwela iye?

¹⁸ Ninninxukhurela vawaatta Yehova mwaha wa onipattusa mwa enamuna eniweryaneya otakiha mikhalelo-dhe. (Maph. 1:26) Ekhweeli wiira khaninwerya ontakiha Yehova moomalela. (Yes. 55:9) Masi nkhama Pheeduru ninoowerya opaka marukunuso wiira nikhalena muupuwelo wa Yehova. Tivondho nihihiye ontakiha Yehova moopora onuupuwela iye nipakaka dhootheene ninwerya wiira nikhale atthu awiiyeviha ni nikhalena muupuwelo wooloka.