Eseeni Nintaphulela awa Ndhina na Yehova wa Yeesu?

1-2. (a) Eseeni Yeesu aapanke iye ohiyu wookhidhera ahinatthi okhwa? (b) Makoho seeni nin’ya nhu waakhula yoosoma ela?

WAARI ohiyu wa neesese wa nihiku na 14 a Nisa wa mwaakha wa 33 Nuumala Kiriistu Ora. Okathi owo, Yeesu anilipelela moohilekela opharihiwa, ophukeliwa, otthukeliwa, ohaasiwa ni moottharelana wiiphiwa. Owo vamodha ni arummwa-ye oororomeleya yaaira emalakaru oca, Eyooca ya Ohiyu ya Apwiya esaala emodha. Nuumala oca, Yeesu aahaavaha arummwa-ye miruku dhookhidhera wiira aalipihe ni aakhalihera wiilokihera. Masi ehinatthi orowa, Yeesu aaheemela okathi vakhaani apaka nivekelo nootepa otthuneya. Nrummwa Yoohaani ohaatikha nivekelo nno, Yoohaani ekapiitulu 17.

² Yoosoma ela, nin’ya woona itthu dhikina ninhudha nhu ni nivekelo na Yeesu. Eseeni Yeesu aatthuna iye okathi ole aavekela iye? Eseeni Yeesu oona iye okhala yootepa otthuneya okathi aariiye valaponi? Nirowe noone waakhuliwa wa makoho ala.

‘MIYO KIHAADHUWELIHA NDHINA NINYU’

3. Eseeni Yeesu aalontte iye voohima dha ndhina na Yehova ni eseeni aatthuna iye olotta ni moolumo awo? (Yohani 17:6, 26)

³ Okathi aavekela iye, Yeesu aalontte wiira: ‘Miyo kihaadhuweliwa ndhina ninyu.’ Moolumo ala annoonihera wiira Yeesu aanoona okhala wootepa otthuneya mwaha owo, okhala wiira aahilotta ivaara piili. (Munsome Yohani 17:6, 26.) Eseeni Yeesu aatthuna iye olotta ni moolumo ala? Niire owo aalenle ahudheri-ye ndhina yahaadhuwela awa? Okhala wiira ahudheri a Yeesu yaari ayuuda, ennooneya wiira awo yaahidhuwela ndhina na Muluku. Ndhina nno ninniphwanyaneya ivaara 7.000 Dhawaatikhiwa dha eHeeberi. Yeesu khaaleela atthu pahi wiira ndhina na Muluku ti Yehova. Masi owo anaadhuweliha ele nintaphulela awa ndhina nno. Yeesu ahaakhalihera ahudheri-ye ondhuwela saana Yehova, ohela mpuwa yoolakela-ye voohima dha elapo ya vathi vamodha ni apinaatamu, ele opanke iye ni on’ya iye opaka nhoolo vamodha ni mikhalelo-dhe. Yeesu aaniwerya waahudhiha saana atthu itthu idho dhootheene okhala wiira onnidhuwela saana Yehova waaxira atthu ootheene.

4-5. (a) Onweryaneya dhai ndhina na ntthu, opacera okhala nootepa otthuneya wa hiyo? Nvahe ntakihero. (b) Eseeni yaakhalihenre ahudheri a Yeesu ondhuwela saana Yehova?

⁴ Mwa ntakihero, nkahaya muupuwele wiira ntokweene mmodha a muloko nnyu oniitthaniwa David onvara nkhama meetiku onooperari. Nyuwo munnidhuwela munna owo mwa iyaakha dhawaatta. Masi nihiku nimodha nuumala wookhumelelani eretta yootutusera aahiidho asitenti munnirowa espitaali onvara iye munna owo, ndho owo onooloolani ni onnookhaliherani mpakha openuwa. Voohaakanyera, ompheta winyu munna owo onaacerereya ni vaavo muniiwa nnyu niromoliwaka ndhina-ne munnuupuwela etthu aapanke iye wiira ookhalihereni. Ndho ohiya pahi munna David okhala ntokweene munindhuwela nnyu mwa iyaakha dhawaatta, owo onnikhala meetiku okhalihenreni openuwa.

⁵ Emodha-modharu, ahudheri a Yeesu yaanidhuwela ndhina na Yehova. Masi oreela wa nteko woolaleerya wa Yeesu, waahakhalihera awo odhuwela ele yaataphulela awa ndhina nno. Mwaha wa seeni? Okhala wiira Yeesu aanitakiha mikhalelo dha Yehova oreela wa moolumo ni moopora aapaka iye itthu. Ndho, ahudheri yaahiwerya ‘ondhuwela’ saana Yehova vaavo yaawiriyana awa itthu Yeesu aahudhiha iye ni yaamoona awa moopora aathokorerya iye atthu.—Yohani 14:9; 17:3.

‘NDHINA NINYU, NENNO NKIVANHE NNYU’

6. Eseeni Yeesu aatthuna iye olotta vaavo airale iye aahivahiwa ndhina na Yehova? (Yohani 17:11, 12)

⁶ Okathi Yeesu aavekela iye, aahaavekelela ahudheri-ye airaka: ‘Safatali mwaakhapelele mwaha wa ndhina ninyu, ndhina nenno nkivanhe nnyu.’ (Munsome Yohani 17:11, 12.) Niire elo yaataphulela wiira Yeesu aarowa wiitthaniwa Yehova? Naari. Yeesu aahoonihera wiira aahima ndhina na Yehova vaavo aalontte iye wiira ‘ndhina ninyu.’ Ndho elo ennoonihera wiira Yeesu khaarowa wiitthaniwa Yehova. Masi eseeni Yeesu aatthuna iye olotta vaavo airale iye aahivahiwa ndhina na Muluku? Yoopacera, Yeesu anthoonyera ni ari Nanhupi a Yehova. Owo aahuura valaponi ni aahipaka itthu dhootikiniha arumeelaka ndhina na Tiithi-ye. (Yohani 5:43; 10:25) Ohiya-vo, ndhina na Yeesu nintaphulela wiira “Yehova Moopoli.” Tivondho, ndhina na Yehova ninnivarihana ni ndhina na Yeesu.

7. Nvahe ntakihero nnoonihera wiira Yeesu aalotta mwa ndhina na Yehova.

⁷ Wiira mwiiwasase saana mwaha ola, mupuwele ntakihero nna: Khuta namalamulela onikhalana ntthu oninthoonyera oniitthaniwa nahupi yoowo oninruma iye wiira alotte ni atthu mwa ndhina-ne. Ndho moolumo a nahupi owo, annikhalana owerya nkhama moolumo onlotta namalamulela. Mwa enamuna emodharu, Yeesu anthoonyera Yehova ni aalotta mwa ndhina na Yehova.—Math. 21:9; Luka 13:35.

8. Ndhina na Yehova naari dhai ni Yeesu ahinatthi owo ora valaponi? (Okhuma 23:20, 21)

⁸ Biibiliya onnimwiitthana Yeesu okhala ‘ndhu’ okhala wiira Yehova aahinrumeela Yeesu wiira alaleye mihupi ni avahe malakihero malaikha ni apinaatamu. (Yohani 1:1-3) Woonawene Yeesu aari nlaikha nenno Yehova aarumenle iye wiira naakhalihere ni naakhapelele aisarayeeli okathi yaari awa moothakoni. Nuumala Yehova waaleela aisarayeeli wiira yiiwelele nlaikha nne, owo aahilotta nthowa-na airaka: ‘Okhala wiira ndhina naka nri ni yoowo.’a (Munsome Okhuma 23:20, 21, Traduçao do Novo Mundo da Bíblia Sagrada) Ndho ndhina na Yehova naari ‘ni’ Yeesu etaphulelaka wiira onnithoonyera Yehova ni ntthu muulupale onaakihera ni otteeliha ndhina na Tiithi-ye.

‘TIITHI, NVUWIHE NDHINA NINYU’

9. Yeesu oonihenre dhai wiira anivaha efaita yuulupale ndhina na Yehova? Ntthokihere.

⁹ Nkhama noonne nhu, ndhina na Yehova naari nootepa otthuneya wa Yeesu, hata ahinatthi ora valaponi. Voohaakanyera okathi Yeesu aari iye valaponi, itthu dhootheene apaka iye dhaanoonihera wiira Yeesu anivaha efaita yuulupale ndhina na Yehova! Ndho wookhidherani wa nteko woolaleerya wa Yeesu valaponi, owo aahinvekela Yehova airaka: ‘Tiithi, nvuwihe ndhina ninyu.’ Okathi owo, Atiithi-ye yahimwaakhula ni ndhu nuulupale, nenno naalikana ni etari yiiraka: ‘Miyo koovuwiha ni kinoovuwiha-tho.’—Yohani 12:28.

10-11. (a) Yeesu ovuwinhe dhai ndhina na Yehova? (Moone-tho efootu.) (b) Seeni ndhina na Yehova nintthuneya awa otteelihiwa ni waakiheriwa?

¹⁰ Nitho Yeesu aahivuwiha ndhina na Tiithi-ye. Mooporani? Owo aahipaka elo alottaka mikhalelo dhoophara nrima dha Yehova ni itthu dhootikiniha ompaka iye. Ohiya-vo, owo aahipaka etthu ekina wiira avuwihe dhina nno. Yeesu aanidhuwela wiira vaari vootthuneya otteelihiwa ndhina na Yehova ni waakiheriwa ontthu-ye.b Yeesu aahoonihera elo, vaavo aaleenle iye atthareli-ye nivekelo na ntakihero, airaka: ‘Tiithi nhu nri wiirimu, ndhina ninyu nitteelihiwe.’—Math. 6:9.

¹¹ Seeni ndhina na Yehova nintthuneya awa otteelihiwa ni waakiheriwa? Okhala wiira Oxardim wa Weedeni Satana khoonihere onttittimiha Yehova Muluku ni aahilotta itthu dhawoothiwa voohima dha owo. Owo aalontte wiira Yehova nawoothe ni aninwateeriha itthu dhooreera Adamu ni Eeva. (Maph. 3:1-5) Nitho Satana ohaakhupaliha atthu awaatta wuupuwelela wiira Yehova khampaka itthu mwa enamuna yooreera. Ndho mwaha wa Satana olotta itthu dhawoothiwa, woonawene elo pooti owiiriha atthu wuupuwela wiira Yehova ntthu ootakhala. Nuuvira okathi, mahiku a Yoobi, Satana aahiwoothera arumeyi a Yehova alottaka wiira anninrumeela etthunaka ophwanya etthu. Nitho aahiwootherya apinaatamu alottaka wiira khanimpheta Yehova ni nrima wootheene ni khanwerya ovikaniha onrumeela Yehova okathi wooxankiha. (Yobi 1:9-11; 2:4) Ndho waanitthuneya ovira okathi wiira adhuweliwe taani aari nawoothe, akhala wiira ti Yehova aahiidho Satana.

‘KOOLEVA EKUMI AKA’

12. Eseeni Yeesu aalakenle iye opaka mwaha wa opheta ndhina na Yehova?

¹² Mwaha wa ompheta Yehova, Yeesu aahilakela opaka itthu dhootheene aawerya iye wiira atteelihe ni aakihere ndhina na Yehova. Owo aahaakhulela okhwa wiira oonihere wiira Yehova tawaarya ni onnipaka itthu mwa enamuna yooloka.c Ndho ti yeelo yaamwiirinhe Yeesu olotta wiira: ‘Kooleva ekumi aka.’ (Yohani 10:17, 18) Apinaatamu oopacera yaawo yaari oomalela, Adamu ni Eeva, yaahintthara Satana ethanla onrukunuwela Yehova. Moovirikana naawo, Yeesu aahaakhulela ora valaponi wiira oonihere wiira onnimpheta vawaatta Yehova. Owo aahipaka elo amwiiwelelaka Yehova ekumi-ye yootheene. (aHeb. 4:15; 5:7-10) Yeesu khaahin’ye okhala oororomeleya ekumi-ye yootheene, mpakha okhwa vanttaikhoni va nihaasero. (aHeb. 12:2) Ndho mwaha wa opaka elo, ohoonihera wiira onnimpheta Yehova vamodha ni ndhina-ne.

13. Seeni Yeesu aari iye ntthu ophwanelela woonihera wiira Satana nawoothe? (Moone-tho efootu.)

¹³ Itthu dhootheene Yeesu opanke iye dhihoonihera tthiri wiira Satana nawoothe, ohiya Yehova! (Yohani 8:44) Yeesu onnindhuwela saana Yehova waaxira apinaatamu ootheene. Ndho, vaakhanle wiira itthu Satana omoothenre iye Yehova ti dheekhweeli, Yeesu anwerya odhuwela elo. Tivondho Yeesu khaahin’ye okhala oororomeleya ni waakihera ndhina na Yehova. Hata okathi yoole vaakhala awa nkhama Yehova aahinnyanyala, Yeesu aahithanla okhwa ohiya onrukunuwela Tiithi-ye oopheta.—Math. 27:46.d

‘KOOMALIHA NTEKO MWAAKIRUMME NNYU OVARA’

14. Yehova antthuvenle dhai Yeesu mwaha wookhala oororomeleya mpakha wookhidherani?

¹⁴ Nivekelo Yeesu aapanke iye ohiyu wookhidhera ahinatthi okhwa, owo alontte wiira: ‘Koomaliha nteko mwaakirumme nnyu ovara.’ Yeesu aanikhupali wiira aahihiye okhala ororomeleya antthuveliwa ni Yehova. (Yohani 17:4, 5) Yeesu aahipaka etthu yooreera athanlaka onroromela Yehova. Ndho Yehova khaakhulenle owo oviriha mahiku awaatta ari mmahiye. (Mit. 2:23, 24) Yehova aahinhimusa Yeesu ni onvaha opuro wavameekhaaya wiirimu. (aFil. 2:8, 9) Nuuvira okathi, Yeesu ookhalihiwa Mwene a Omwene wa Muluku. Eseeni Omwene owo on’ya awa opaka nhoolo? Yeesu onnaakhula nikoho nna mphantta wa naili wa nivekelo na ntakihero aapanke iye, airaka: ‘Omwene nnyu ore. Yootthuna nnyu [Yehova] yiireye valaponi nkhama wiirimu.’—Math. 6:10.

15. Eseeni Yeesu on’ya iye opaka moohilekela?

¹⁵ Moohilekela, Yeesu onawaapwetesa awanani ootheene a Muluku okathi wa ekhotto ya Armaxedooni. (Wiis. 16:14, 16; 19:11-16) Moottharelana, Yeesu ononrahelela Satana ‘nlitti nawiisa’ opuro yoowo on’ya iye ohiya opaka itthu dhootheene dhootakhala apaka iye. (Wiis. 20:1-3) Ndho nuumala Yeesu opacera olamulela Eyaakha Ekonto Emodha, onootthikihera nrettele valaponi, onawaahihimusa atthu akhwiye ni onawaakhalihera apinaatamu okhala oomalela. Nitho onawiiriha elapo yootheene okhala Eparayiisu. Ndho okathi owo, yoolakela ya Yehova enawaakhwanela!—Wiis. 21:1-4.

16. Eseeni ninlipelela nhu wiireya wookhidherani wa Olamulelo wa Eyaakha Ekonto Emodha?

¹⁶ Eseeni ninlipelela nhu wiireya wookhidherani wa Olamulelo wa Eyaakha Ekonto Emodha? Etampi ni ohimalela wa apinaatamu onoomala. Okathi owo, apinaatamu khanrowa otthuneya ovekela oleveleliwa itampi oreela wa yawoopola. Ohiya-vo, anookhalana eparakha yookhalana waataana wooloka ni Yehova ehitthuneyaka okhaliheriwa ni anankuttho aahiidho Nankuttho Muulupale. Nitho ‘okhwa [niravihiwe nhu ni Adamu] nwanani ookhidhera onrowa omalihiwa.’ Atthu akhwiye anoohihimusiwa mmahiye wiira etthikele okhala akumi. Nitho apinaatamu ootheene valaponi anootthikela okhala oomalela.—1 aKor. 15:25, 26.

17-18. (a) Etthu seeni ekina yootepa otthuneya ni yavameekhaaya en’ya wiiraneya wookhidherani wa Olamulela wa Eyaakha Ekonto Emodha? (b) Eseeni Yeesu on’ya iye opaka wookhidherani wa olamulelo-we? (1 aKorinto 15:24, 28) (Moone-tho efootu.)

¹⁷ Etthu seeni ekina yootepa otthuneya ni yavameekhaaya en’ya wiiraneya wookhidherani wa Olamulela wa Eyaakha Ekonto Emodha? Okathi owo, atthu ootheene anoodhuwela ni okhupali wiira Yehova Muluku awaarya ni axariya. Mooporani? Wiira muupuwele vakhaani, Oxardim wa Weedeni, Satana ahimoothera Yehova wiira nawoothe ni khanaapheta apinaatamu. Okhuma okathi ole, mpakha olelo-va ale anthanla onrumeela Yehova annoonihera ivaara dhawaatta wiira annitteeliwa ni onttittimiha ndhina-ne. Nitho wookhidherani wa Olamulela wa Eyaakha Ekonto Emodha onawaakiheriwa moomalela ontthu wa Yehova. Okathi owo, Yehova onawoonihera wiira Tiithi oopheta.

¹⁸ Wookhidherani, atthu ootheene anoodhuwela wiira itthu Satana olontte iye voohima dha Yehova ti dhawoothiwa. Ndho, eseeni Yeesu on’ya iye opaka nuumala ophiya wookhidherani wa olamulelo-we? Niire on’ya otthara ntakihero na Satana athanlaka onrukunuwela Yehova? Naari, owo khaankhala-khala apakaka elo! (Munsome 1 aKorinto 15:24, 28.) Yeesu onawaatthikihera Omwene Atiithi-ye ni onawiiwelela okhulupale-ya. Voohaakanyera, Yeesu onoopaka itthu dhootheene okhala wiira onnimpheta Yehova.

19. Ndhina na Yehova nintaphulelani wa Yeesu?

¹⁹ Voohaakanyera Yehova ookhalana mathowa awaatta amwiirinhe onvaha ndhina-ne Yeesu! Okhala wiira Yeesu ohoonihera moomalela mikhalelo dha Tiithi-ye. Ndho, ndhina na Yehova nintaphulelani wa Yeesu? Yeesu onnoona ndhina nno okhala nootepa otthuneya oxira itthu dhootheene. Tivondho owo aahileva ekumi-ye mwaha wa ndhina na Yehova. Ndho wookhidherani wa Olamulelo wa Eyaakha Ekonto Emodha, Yeesu onawaatthikihera itthu dhootheene Atiithi-ye. Nin’ya owerya dhai otthara ntakihero na Yeesu? Yoosoma enttharelana, ninawoona waakhuliwa wa nikoho nna.