‘Nkhalihe Wiiwanana Omodharu Onkhumiheriwa ni Munepa Wawaarya’
NRUMMWA Paaulu aahaatumererya makiristau a wEefesu ohihiya ‘ovilelana nkina ni nkhwe, ephetanaka ni wiilipihera okhaliha wiiwanana omodharu onkhumiheriwa ni munepa wawaarya, ni nrettele onkhalihera wiiraana.’—aEefe. 4:2, 3.
“Wiiwanana” aahiidho wiiraana nirinhuna onkhumiheriwa ni ‘munepa wawaarya.’ Elo entaphulela wiira enweryaneya nikhaliheriwaka ni ikuru dha Muluku. Masi nkhama Paaulu olontte iye, wiiraana wihu onnitthuneya okhapeleliwa. Naani? Wiira elo eweryaneye, khuta nkiristau ohaana opaka mphantta-ye wiira ‘akhalihe wiiwanana omodharu onkumiheriwa ni munepa wawaarya.’
Wiira nilikanyihe, nkahaya muupuwele wiira moovahiwa ekaaro epheya. Nyuwo nnoona wiira taani orina nritti wookhapelela ekaaro elo? Voohaakanyera ti nyuwo. Ndho niire mwammuvaha nthowa ntthu oovanheni ekaaro elo akhala wiira enoohononeya mwaha wa nyuwo ohiya okhapelela saana? Naari.
Mwa enamuna emodharu, nnaamwi wiiraana wihu ori yoovaha enkhuma wa Yehova, ootheene nhu nookhalana nritti wookhapelela wiira ohihononeye. Akhala wiira khanniiwana ni munna mmodha aahiidho nrokora, nihaana wiikoha wiira: ‘Niire kinniilipihera okhaliha wiiwanana omodharu onkhumiheriwa ni munepa wawaarya kiphukaka mwaha owo?’
‘MWIILIPIHERE’ WIIRA NKHALIHE WIIWANANA
Nkhama Paaulu aatinkhe iye, hiyo pooti oniliperya okhaliha nrettele saasaasa vaavo ninnyoonyihiwa nhu ni munna aahiidho nrokora. Wiira nkhalihe wiiwanana aahiidho nrettele, niire nhaana okathi wootheene olotta ni ntthu oonyoonyinheni moopora nnoonela nnyu mwaha owo? Naari. Mwiikohe wiira: ‘Niire kapaka elo, enoophuka nxankiho owo aahiidho en’ya otepiha? Ivaara dhikina etthu yooreerela opaka ori onlevelela ntthu owo ni oliyala moomalela mwaha owo.—Mir. 19:11; Mar. 11:25.
Mwiikohe wiira: ‘Niire kapaka elo, enoophuka nxankiho owo aahiidho en’ya otepiha?’
Nkhama nrummwa Paaulu aatinkhe iye, nihihiye ‘ovilelana nkina ni nkhwe ni ophetana.’ (aEefe. 4:2) Ereferensiya emodha enlotta wiira moolumo ala pooti otaphuleliwa wiira: “Owaakhela nkhama ari awa.” Elo entaphulela odhuwela wiira anna toohimalela nkhama dhiidhaale ni hiyo-tho niri nhu oohimalela. Mweekhweeli odhuwela elo, enoonihera wiira ninniilipihera owara ‘ontthu wa naanaano.’ (aEefe. 4:23, 24) Masi khaavo mmodha a hiyo onwerya opaka elo moomalela. (aRoma 3:23) Vaavo ninkhupali nhu ekhweeli elo, onoonikhweela ovilelana nkina ni nkhwe, olevelelana ni ‘okhaliha wiiwanana omodharu onkhumiheriwa ni munepa wawaarya.’
Ninoowerya okhaliha ‘nrettele onkhumihera wiiraana’ mmulokoni akhala wiira ninawaalevelela atthu ale anninyoonyiha ni oliyala moomalela etthu anipakenle awa. Nuulumo nitaphuleliwe va aEefeso 4:3 na wiira ‘nrettele onkhumihera wiiraaana,’ va aKolosi 2:19 nitaphuleliwe nkhama ‘dhinkumaniha.’ Itthu dhinkumaniha dhinkhala dhoovatta ni dhinniwerya okumaniha makhuva maili. Mwa enamuna emodharu, nrettele ni opheta wa anna ni arokora, onninikhalihera ohihiya waataana naawo hata ivaara dhikina eninyoonyihaka.
Tivondho vaavo munna aahiidho nrokora onoonyoonyihaiyeni aahiidho wooriipihani nrima, mweehererye onthokorerya mooreera nrima ohiya moowali. (aKol. 3:12) Okhala wiira apinaatamu ootheene toohimalela, woonawene nookhala nihiku nimodha ntanke nnyu onnyoonyiha ntthu. Wuupuwelela elo, onoonikhalihera opaka itthu dhootheene ninwerya nhu, wiira ‘nikhalihe wiiwanana omodharu onkhumiheriwa ni munepa wawaarya.’