YOOSOMA YA MWAHA 47
NCIPO 38 Yehova Onimoovahani Ikuru
‘Nyuwo Mookhalana Efaita Yuulupale’!
‘Nyuwo mookhalana efaita yuulupale.’—DAN. 9:23; Tradução do Novo Mundo da Bíblia
ETTHU NIN’YA NHU OHUDHA
Nin’ya woona etthu ekhanle waakhalihera ale ahiniidhoonela vatthu odhuwela wiira tthiri aakhalana efaita vamaithoni va Yehova.
1-2. Eseeni en’ya onikhalihera odhuwela wiira nookhalana efaita vamaithoni va Yehova?
YEHOVA onnaavaha efaita yuulupale arumeyi-ye. Masi hata eri dhiidho, arumeyi-ye akina annaakhanyera vakhala wiira tthiri owo onnaavaha efaita. Woonawene awo pooti okhalana moonelo owo mwaha wa khalai othokoreriwa mwa enamuna yaawiirinhe woona wiira khaana efaita. Niire nyuwo nniidhoona dhiidho? Akhala wiira ti dhiidho, eseeni en’ya wookhaliherani okhupali wiira mookhalana efaita yuulupale vamaithoni va Yehova?
2 Etthu en’ya wookhaliherani ori wuupuwelela dhawiiraneya iri mbiibiliyani inoonihera enamuna Yehova ontthuna iye wiira atthu ekathokoreriwa. Yeesu aanaathokorerya atthu mooreera nrima ni mwa nttittimiho. Ndho mwaha wa opaka elo, Yeesu ohoonihera wiira owo vamodha ni a Tiithye annaavaha efaita yuulupale atthu awiiyeviha yaawo aanuupuwela wiira khaana efaita. (Yohani 5:19; aHeb. 1:3) Yoosoma ela, nin’ya othokorerya: (1) moopora Yeesu aakhalihenre iye atthu odhuwela wiira aakhalana efaita ni (2) etthu ekhanle onikhalihera okhupali meekhihu wiira nookhalana efaita yuulupale vamaithoni va Yehova.—Hag. 2:7.
YEESU AAKHALIHENRE DHAI ATTHU ODHUWELA WIIRA AAKHALANA EFAITA?
3. Yeesu aathokorenrye dhai atthu yaatthuna okhaliheriwa yaawo yaamwaattamenle okathi aari iye oKalileya?
3 Okathi Yeesu aalaleerya iye oKalileya, atthu awaatta yaahimwaattamela wiira ewiriyane itthu aahudhiha iye ni wiira epenusiwe nuuwo. Yeesu aaniwoona atthu awo okhala wiira yaari nkhama ‘ipwittipwitthi dhaavulalihiwe, dhaanyanyaliwe ni dhahaarina makampusi.’ (Math. 9:36.) Ahooleli a itiini khiyaathokorerya atthu awo nkhama atthu yaarina efaita ni yaalotta wiira awo yaari ‘atthu ootakhaliwa.’ (Yohani 7:47-49) Masi Yeesu aahoonihera waattittimiha ni waareerela nrima atthu awo, aivahaka okathi wiira aahudhihe ni apenuse iretta-dha. (Math. 9:35) Ohiya-vo, wiira Yeesu aakhalihere atthu awaatta, aahahudhiha arummwa-ye moopora woolaleerya ni aahaavaha owerya wa openusa iretta dhoovirikana.—Math. 10:5-8.
4. Eseeni ninhudhera nhu ni moopora Yeesu aathokorerya iye atthu yahooneliwa vatthu?
4 Mwaha wa Yeesu waathokorerya mooreera nrima atthu yaanwiriyana, aahoonihera wiira owo vamodha ni Tiithye annaavaha efaita atthu ale ivaara dhawaatta ahinooneliwa vatthu mmuttettheni. Akhala wiira munninrumeela Yehova masi munnaakanyera akhala wiira mookhalana efaita, muupuwelele moopora Yeesu aathokorerya iye atthu yaahadhuliwa ni yahooneliwa vatthu, yaawo yaatthuna ohudha nuuwo. Mwapaka elo enawookhaliherani woona wiira mookhalana efaita yuulupale vamaithoni va Yehova.
5. Eseeni nindhuwela nhu voohima dha nthiyana Yeesu aandhuwenle iye oKalileya?
5 Ohiya pahi Yeesu waahudhiha atthu awaatta, owo aaninkhalihera khuta ntthu. Mwa ntakihero, okathi Yeesu aalaleerya iye oKalileya, aahindhuwela nthiyana mmodha yaaittheya ephome-ye mwa iyaakha 12. (Mar. 5:25) Moovarihana ni Nlamulo na Moise nthiyana ole aari a mwiikho, ni khuta ntthu aaya omphara aankhala a mwiikho. Ndho elo yaanimooceeliha nthiyana ole okhala vamodha ni atthu ni woonawene aniviriha okathi wawaatta ari meekhe. Ohiya-vo, owo khaakhulelihiwa otakaihana ni atthu akina okathi wa onkokhorela Yehova nsinakooka aahiidho okathi wa ifeesta. (Onam. 15:19, 25) Moohaakanyera, ohiya pahi oxanka ni eretta yaanwereya, woonawene owo aaniidhoona ohikhalana efaita.—Mar. 5:26.
6. Eseeni aapanke iye nthiyana aaittheya ephome wiira apenuwe?
6 Nthiyana ole aahiriipiwa nrima ni aanitthuna vawaatta openusiwa ni Yeesu. Masi owo khaaronwe onvekela Yeesu wiira ampenuse. Mwaha wa seeni? Woonawene owo aanuuliwa muru ni khaaidhoonela vatthu mwaha wa eretta aariiyena. Aahiidho aanoova uupuwelaka wiira Yeesu aammukhoottela ni ammwiikara opuro ole mwaha wa otakaihana ni atthu adhuwelaka wiira aari a mwiikho. Tivondho owo aaphanre pahi nlaya na Yeesu, akhupaliki wiira apaka elo aampenuwa. (Mar. 5:27, 28) Ndho mwaha wa nthiyana ole okhalana waamini woolipa, aahipenuwa eretta-ye. Nuumala Yeesu okoha wiira taani yaankwannyale, owo aahaakhula wiira aari veene ni aahilotta etthu yaamwiirinhe opaka elo. Ndho Yeesu aanthokorenrye dhai nthiyana ole?
7. Yeesu aanthokorenrye dhai nthiyana mmodha aaviriha nxankiho muulupale? (Marko 5:34)
7 Yeesu aahinthokorerya nthiyana ole mooreera nrima ni mwa nttittimiho. Owo aahoona wiira nthiyana ole ‘aanithukumela ni aanoova.’ (Mar. 5:33) Nuumala odhuwela moonelo-ye, Yeesu aahilotta mwa enamuna yaankhalihenre okhala oomaaleleya, amwiitthanaka wiira “mwanaka” nuulumo nenno nihinoonihera pahi wiira aari oosuluheya, masi-tho ninoonihera wiira aari ooreera nrima ni oothunku. (Munsome Marko 5:34.) Ela evaara emodha mbiibiliyani Yeesu aamwiitthanne iye nthiyana amwiirelaka “mwanaka”. Woonawene aahirumeela nuulumo nna ninoonihera oreera nrima mwaha wa odhuwela wiira nthiyana ole aanoova vawaatta. Nyuwo nnoona wiira nthiyana ole oonenle dhai nuumala Yeesu onkhalihera okhala oomaaleleya? Woonawene owo aahihakalala vawaatta mwaha wa Yeesu onthokorerya moopheta ni mooreera nrima. Ohiya-vo, Yeesu aahinkhalihera nthiyana ole woona wiira aari mwaana ootepa otthuneya wa Tiithye oopheta a wiirimu.
8. Mixankiho seeni ovirinhe iye nrokora mmodha a oBrasil?
8 Nitho olelo-va, arumeyi akina a Yehova anniviriha mixankiho dha mweekumini dhinwiiriha wiidhoona ohikhalana efaita. Mariaa, yoowo ori piyoneera okilaatheya onkhala oBrasil, oyariwe oorakala ene ahaana metto ni ntata neethiyana. Owo onlotta wiira: “Makoleeka aka a oskola, yaanikilottela moolumo oohiloka mwaha wa orakala. Owo yaanikivaha madhina oohiloka. Nitho ivaara dhikina amudhi aka yaanikithokorerya mwa nthalu.”
9. Eseeni enkhalihenre Maria woona wiira ookhalana efaita yuulupale wa Yehova?
9 Eseeni enkhalihenre Maria? Nuumala owo okhala Namoona a Yehova, anna ni arokora yaanimmaaliha ni onkhalihera wiidhoona nkhama Yehova ommoonela iye. Owo onlotta wiira: “Miyo nkinwerya waaromola anna ni arokora ootheene akikhalihenre! Miyo kinninxukhurela vawaatta Yehova mwaha wa okivaha emudhi yoopheta ya omunepani.” Anna ni arokora yaahinkhalihera Maria woona wiira owo ookhalana efaita yuulupale vamaithoni va Yehova.
10. Nxankiho seeni Mariya Madaleena aaviriha iye? (Moone-tho ifootu.)
10 Moone moopora Yeesu aankhalihenre iye Mariya Madaleena, yoowo aavoloiwe minepa 7 dhootakhala. (Luka 8:2) Woonawene minepa idho dhaanimwiiriha opaka itthu dhoohikhalela dhaawiiriha atthu oxaka omwaattamela. Woonawene okathi owo wooxakiha, aaniidhoona othanyiwa, ohiphareleleya ni ohikhalana nlipelelo. Woonawene Yeesu aahiikara minepa idho dhootakhala dhaahaasa, akhala nthareli-ye oororomeleya. Enamuna seeni ekina Yeesu aankhalihenre iye Mariya Madaleena woona wiira aahikhalana efaita wa Muluku?
Yeesu aankhalihenre dhai Mariya Madaleena woona wiira owo aahikhalana efaita yuulupale vamaithoni va Yehova? (Moone ettima 10-11)
11. Yeesu aankhalihenre dhai Mariya Madaleena woona wiira aahikhalana efaita yuulupale wa Yehova? (Moone-tho ifootu.)
11 Yeesu aahinlaleya Mariya Madaleena wiira akanhoola owo vamodha ni ahudheri-ye, vaavo yeetta awa mikwaha elaleeryaka.b Ndho elo yaaninvaha eparakha ya onwiriyana Yeesu aahudhihaka atthu akina. Nitho nuumala Yeesu ohihimusiwa aahinkhumelela Mariya Madaleena. Owo aari nhudheri oopacera olotta ni omoona Yeesu nihiku nenne ohihimusiwe iye. Ni Yeesu aahinvaha yoothanleliwa ya orowa waaleela arummwa wiira owo aahihimusiwa. Voohaakanyera, Yeesu aahinkhalihera Mariya Madaleena woona wiira mweekhweeli aahikhalana efaita yuulupale wa Yehova!—Yohani 20:11-18.
12. Itthu seeni dhinkhumelenle Lídia dhaamwiiriha wuupuwelela wiira khaaphwanelela ophetiwa?
12 Nkhama Mariya Madaleena, atthu awaatta olelo-va anniviriha nxankiho wa othanyiwa. Lídia, nrokora yoowo onkhala wEspanha, onlotta wiira okathi amaamaye yaanrupanle awa yaatthuna okhumihamo erukulu. Lídia onnuupuwela wiira okathi aari iye mwaana, amaamaye yaaninkhootta onkhapelela ni yaanilottela moolumo oveiha. Owo onlotta wiira: “Etthu yuulupale kaatthuna aka mweekumini mwaka waari woona wiira kaanithokoreriwa ni opheta ni atthu akina. Miyo kaanoova kuupuwelaka wiira nkaakhala-khala kiphetiwaka ni atthu akina okhala wiira amma yaahikiiriha okhupali wiira kaari ntthu ootakhala.”
13. Eseeni enkhalihere Lídia woona wiira ookhalana efaita vamaithoni va Yehova?
13 Nuumala Lídia opacera onsoma Biibiliya itthu dhaahirukunuwa. Onvekela Yehova ni onsoma Biibiliya vamodha ni moolumo ni miteko dhooreera dha anna ni arokora, dhaahinkhalihera Lídia woona wiira ookhalana efaita vamaithoni va Yehova. Owo onlotta wiira: “Amamunaka ivaara dhawaatta annikileela wiira annikipheta ni annikuupusera mikhalelo dhooreera kiraakana. Nitho axirikha aka annipaka etthu emodharu.” Niire muloko nnyu ookhala ntthu ontthuna okhaliheriwa wiira oone wiira ookhalana efaita vamaithoni va Yehova? Nyuwo nnoowerya onkhalihera owo oreela wa moolumo nnyu ni miteko dhinyu dhooreera.
ESEENI EN’YA ONIKHALIHERA WIIDHOONA NKHAMA YEHOVA ONNOONELA IYE?
14. Yawaatikhiwa ya 1 Samuweli 16:7 ennikhalihera dhai woona moopora Yehova onwoonela iye atthu? (Moone-tho ekwaaturu eni: “Seeni Yehova Onaavaha iye Efaita Arumeyi-ye?”)
14 Nhiliyale wiira Yehova khanwoonani nkhama anwoonawani atthu a olumwinku ola. (Munsome 1 Samuweli 16:7.) Atthu a olumwinku ola anuupuwela wiira ntthu ootthuneya tuule oophwaneliwa, oothaciri aahiidho osomme vawaatta. Masi moopora Yehova owoonaiyene khanlipa ni itthu idho. (Yes. 55:8, 9) Tivondho, ohiya wiidhoona nkhama atthu akina anwoonelaawani, mwiilipihere wiidhoona nkhama Yehova onwoonelaiyeni. Nyuwo pooti osoma dhawiiraneya dha mbiibiliyani inoonihera wiira Yehova aanaavaha efaita atthu ivaara dhikina yahaaidhoonela vatthu nkhama Eliya, Noweemi ni Aana. Nitho nyuwo pooti waatikha dhawiiraneya dha mweekumini mwinyu dheidho dhinwiirihani okhupali wiira Yehova onnoophetani ni woovahani efaita. Ohiya-vo, nyuwo pooti osoma miyaha dhinvarihana ni wiivaha efaita dhimphwanyaneya iliivuru dhihu.c
15. Seeni Yehova aanthokorerya iye Daniyeeli nkhama ntthu aarina ‘efaita yuulupale’? (Daniyeli 9:23)
15 Nhiliyale wiira mookhalana efaita yuulupale vamaithoni va Yehova mwaha wa ohihiya winyu okhala oororomeleya. Okathi omodha, woonawene Daniyeeli arina iyaakha 90, owo aahikhulumuwa ni oriipiwa nrima. (Dan. 9:20, 21) Yehova aanlipinhe dhai? Muluku aahiruma nlaikha Kabriyeeli wiira namuupusere Daniyeeli wiira aahikhalana ‘efaita yuulupale’ ni wiira Yehova aahiiwa mavekelo-ye. (Munsome Daniyeli 9:23; Tradução do Novo Mundo.) Eseeni yaamwiiriha Daniyeeli okhalana efaita yuulupale vamaithoni va Muluku? Okhala wiira aanipheta exariya ni aari oororomeleya. (Ezek. 14:14) Yehova ohiiriha waatikhiwa yawiiraneya ela mbiibiliyani wiira enilipihe. (aRoma 15:4) Nitho Yehova onniwiriyana mavekelo nnyu ni onnoovahani efaita mwaha wa opheta winyu exariya ni ohihiya winyu okhala oororomeleya.—Mik. 6:8; aHeb. 6:10.
16. Eseeni en’ya wookhaliherani omoona Yehova nkhama Tiithi oopheta?
16 Mmoone Yehova nkhama Tiithi onoophetani. Ohiya ovaha ephoole dhoovonya dhinyu, owo ontthuna wookhaliherani. (Esal. 130:3; Math. 7:11; Luka 12:6, 7) Wuupuwelela elo ennaakhalihera atthu awaatta ahiniidhoonela vatthu. Mwa ntakihero, moone yawiiraneya ya nrokora Michelle onkhala wEspanha yoowo aaidhoona wiira khaaphetiwa ni khaarina efaita okhala wiira amamune yaaninlottela moolumo ooveiha mwa iyaakha dhawaatta. Owo onlotta wiira: “Okathi wootheene kihiniidhoonela aka vatthu, kinnuupuwelela Yehova akikunse mmatatani-mwe akikhapelelaka ni akooniheraka opheta.” (Esal. 28:9) Nrokora Lauren yoowo onkhala wÁfrica do Sul, uupuwelelaka voohima dha ekumi-ye onlotta wiira: “Okhala wiira mooreera nrima Yehova ookithanla mwaha wa okipheta, onnikikhalihera mpakha nenna-va ni ookirumeela wiira kaakhalihere atthu akina ohudhera ekhweeli, ndho moohakanyera elo enoonihera wiira kookhalana efaita yuulupale vamaithoni-ve.”—Hos. 11:4.
17. Eseeni en’ya wookhaliherani okhupali wiira Yehova oniwaakhulelani? (Esalimo 5:12 (Moone-tho efootu.)
17 Nkhupali wiira munnaakhuleliwa ni Yehova. (Nsome Esalimo 5:12; Tradução do Novo Mundo) Davidi aahilikanyiha waakhuleliwa ni Yehova nkhama ‘nikula nuulupale’ nnaakhapelela anaxariya. Odhuwela wiira Yehova oniwaakhulelani ni onnookhaliherani, pooti wookhapelelani vaavo mumpacera nnyu wuupuwela wiira khimwaana efaita. Eseeni en’ya wookhaliherani odhuwela wiira munnaakhuleliwa ni Yehova? Nkhama noonne nhu, Yehova onninrumeela Biibiliya wiira ookhalihereni odhuwela moopora owo onwoonelaiyeni. Ohiya-vo, owo onnaarumeela asitokweene, axirikha nnyu uulupale ni atthu akina wiira yookhalihereni wuupuwelela wiira mookhalana efaita yuulupale vamaithoni-ve. Ndho nyuwo moonele dhai nikhalihero nno ninkhuma wa Yehova?
Odhuwela wiira Yehova onninaakhulela onninikhalihera oxaka woona wiira khinaana efaita (Moone ettima 17)
18. Seeni muntthuneya nnyu waakhulela vaavo munttottopeliwa nnyu?
18 Mwaakhulele vaavo atthu anoophetani ni anoodhuwelani saana anoottottopelawani. Nhiliyale wiira Yehova pooti waarumeela atthu awo wiira yookhalihereni odhuwela wiira onniwaakhulelani. Michelle, yoowo ninlontte nhu ottuli, onlotta wiira: “Vakhaani-vakhaani koopacera waakhulela ni nrima wootheene moolumo ooreera ni oottottopela atthu akina. Kahi etthu yookhweya opaka elo, masi kinnidhuwela wiira ti yeelo Yehova ontthuna iye wiira kipake.” Nitho asitokweene anninkhalihera Michelle woona wiira Yehova onninvaha efaita. Nenna-va, nrokora Michelle onrumeela nkhama piyoneera ni onnikhalihera oBeteeli ari owannye.
19. Seeni muntthuneya nnyu okhupali wiira mookhalana efaita yuulupale vamaithoni va Muluku?
19 Mooreera nrima Yeesu onninuupusera wiira nookhalana efaita yuulupale vamaithoni va Tiithi nhu a wiirimu. (Luka 12:24) Nikhupali ni nrima wootheene wiira Yehova onninivaha efaita yuulupale. Ndho nihikhala-khale niliyalaka elo! Tivondho nipake itthu dhootheene ninwerya nhu wiira naakhalihere atthu akina woona wiira aakhalana efaita yuulupale vamaithoni va Muluku!
NCIPO 139 Muupuweleke Muryeene oParayiisu
a Madhina makina aamutariwa.
b Itthu dhootheene dhinnoonihera wiira Maria Madaleena aari mmodha a athiyana yaantthara Yeesu. Athiyana awo yaanirumeela mireerelo-dha wiira enkhalihere Yeesu vamodha ni arummwa-ye.—Math. 27:55, 56; Luka 8:1-3.
c Mwa ntakihero, moone eliivuru Achegue-se a Jeová ekapiitulu 24 nitho nsome dhawatikhiwa ni dhawiiraneya dha mbiibiliyani iri eliivuru Iversiikulu Sinaakhaliherya Makristau muru oni “Ohoverya.”