YOOSOMA 34
Nin’ya Woonihera Dhai Wiira Ninnimpheta Yehova?
Niire nnoona wiira mootepa omwaattamela Muluku oxira khalai mpacerakaru onsoma Biibiliya? Niire munnitthuna otepa olipiha waataana winyu ni Yehova? Akhala wiira ti dhiidho, nhiliyale wiira vaavo Yehova on’ya iye woona ompheta winyu wunnuwaka, owo akantepa woophetani ni wookhapelelani. Masi mun’ya woonihera dhai wiira munnimpheta Yehova?
1. Nin’ya woonihera dhai wiira ninnimpheta Yehova?
Ninnoonihera wiira ninimpheta Yehova vaavo nimmwiiwelela nhu. (Munsome 1 Yohani 5:3.) Owo khaninkhanyerera ntthu opaka elo. Masi onninvaha khuta ntthu eparakha yoothanla omwiiwelela aahiidho naari. Mwaha wa seeni? Okhala wiira Yehova ontthuna wiira ‘nimwiiwelele ni nrima wootheene.’ (aRoma 6:17) Ndho ni moolumo makina, Yehova ontthuna wiira nimwiiwelele ohiya mwaha wookhanyereriwa, masi ontthuna wiira nimwiiwelele ni nrima nhu wootheene. Epaarti 3 ni 4 ya eliivuru ela enawookhaliherani woona moopora nkhanle nnyu woonihera wiira munnimpheta Yehova mpakaka itthu dhinindhivela ni nxakaka opaka itthu dhininnanara.
2. Seeni oraawa vooxankiha woonihera wiira ninnimpheta Yehova?
“Naxariya onnèhereriwa n’uxanka wunjene.” (Esalimo 34:20) Ootheene nhu ninniwanana dhoovonya dhihu. Woonawene dhinniniphwanya mixankiho dha othowa nsurukhu, ohixariya ni mixankiho dhikina. Ndho vaavo dhinniphwanya awa mixankiho idho, pooti onixankiha opaka ele Yehova onnivekela iye. Elo pooti wiireya okhala wiira pooti woona onikhweela opaka etthu yoonanara. Masi vaavo munkhala nnyu oororomeleya ni mummwiiwelela nnyu Yehova, munnoonihera wiira munnimpheta Yehova oxira itthu dhikina. Ndho vaavo mumpaka nnyu elo munnoonihera wiira mwa ntthu oororomeleya. Tivondho, Yehova onookhala ni nyuwo. Nitho khankhala-khala onyanyalakani.—Nsome Esalimo 4:4.
NHUDHE ITTHU DHIKINA
Moone nthowa nimmwiiriha Yehova ovaha efaita wiiwelela winyu ni etthu en’ya wookhaliherani okhala oororomeleya.
3. Mwaha onoohelani mpuwa
Nkhama enlotta awa eliivuru ya mBiibiliyani ya Yoobi, Satana aahimoothera Yoobi waahela mpuwa atthu ootheene antthuna onrumeela Yehova. Munsome Yoobi 1:1, 6–2:10, nuuvinya mwaakhule makoho anttharelana:
Nkhama aalontte iye Satana, eseeni yamwiiriha Yoobi omwiiwelela Yehova?—Mmoone Yoobi 1:9-11.
Etthu seeni Satana olontte iye awootheraka apinaatamu ootheene, woohelani mpuwa nyuwo?—Mmoone Yoobi 2:4.
Munsome Yoobi 27:5b, nuuvinya mwaakhule nikoho ninttharelana:
Yoobi oonihenre dhai wiira tthiri animpheta Yehova?
Yoobi aahoonihera wiira animpheta Yehova vaavo aaroromelen’ye iye
Hiyo ninnoonihera wiira ninnimpheta Yehova vaavo ninkhala nhu oororomeleya
4. Nhakalalihe nrima wa Yehova
Munsome Miruku 27:11, nuuvinya mwaakhule nikoho ninttharelana:
Yehova onoonela dhai vaavo mumpaka nnyu etthu yooreera ni mummwiiwelela nnyu? Mwaha wa seeni?
5. Nyuwo nnoowerya okhala oororomeleya wa Yehova
Ompheta wihu Yehova onniniiriha waaleela atthu akina voohima dha yeene. Nitho otthuna wihu okhala oororomeleya wa Yehova onniniiriha omwiiwelela hata opaka elo ohikhweyaka. Moone EVIIDIYU, nuuvinya mwaakhule makoho anttharelana.
Nnoona wiira ti woolipa olotta ni atthu akina voohima dha Yehova?
Nkhama moonne nnyu eviidiyu, eseeni yankhalihenre Jorge oxintta woova?
Tivootepa okhweya okhala oororomeleya wa Yehova vaavo nimpheta nhu ele ompheta iye ni vaavo ninnyokha nhu ele onnyokha iye. Nsome Esalimo 97:10, nuuvinya mwaakhule makoho anttharelana:
Vaavo nnuupuwela nnyu itthu nhundhe nnyu, itthu seeni Yehova ompheta iye? Itthu seeni Yehova onnyokha iye?
Mun’ya owerya dhai ohudha opheta etthu yooreera ni onyokha etthu yoonanara?
6. Omwiiwelela Yehova etthu yootepa oreera
Omwiiwelela Yehova etthu yootepa yooreera ninreerela nhu opaka. Munsome Yesaya 48:17, 18, nuuvinya mwaakhule makoho anttharelana:
Nnoona wiira onnireerela onroromela Yehova wiira onnidhuwela saana etthu yooreera wa hiyo? Mwaha wa seeni?
Itthu nhundhe nnyu mBiibiliyani voohima dha Yehova, dhookhalihenreni dhai mpakha olelo?
ATTHU AKINAKU ANLOTTA WIIRA: “Muluku khanloha itthu kimpakaka akhala wiira ti dhooreera aahiidho dhoonanara.”
Yawaatikhiwa seeni ya mBiibiliyani mwaaya nnyu orumeela wiira moonihere wiira itthu nimpaka nhu pooti onhakalaliha aahiidho onriipiha nrima Yehova?
WUULUULA
Nyuwo munnoonihera wiira munnimpheta Yehova vaavo nhihiya nnyu omwiiwelela ni onroromela hata dhoophwanyakani mixankiho.
Ipontu dhuulupale
Eseeni nhundhe nnyu ni ntakihero na Yoobi?
Mun’ya woonihera dhai wiira munnimpheta Yehova?
Eseeni en’ya wookhaliherani okhala oororomeleya wa Yehova?
NTHOKODHE ITTHU DHIKINA
Moone moopora mun’ya nnyu okhala oororomeleya wa Yehova ni mmulokoni.
Moone itthu dhikina Satana owoothenre iye apinaatamu.
‘Yoobi Khahin’ye Okhala Oororomeleya’ (A Bíblia —Qual É a Sua Mensagem? secção 6)
Moone moopora anaahima an’ya awa woonihera wiira animpheta Yehova.
Mmiravo onkhanyereriwa ni amiravo akina opaka etthu yootakhala, on’ya owerya dhai okhala oororomeleya wa Yehova?