YOOSOMA 51
Mun’ya Owerya Dhai Onhakalaliha Yehova ni Moolumo Nnyu?
Yehova oonivaha yoovaha yoohakalaliha: olotta. Niire tivootthuneya wa yeene enamuna ninrumeela nhu yoovaha ela? Voohakanyera tivootthuneya! (Munsome Yakobo 1:26.) Ndho, nin’ya owerya dhai orumeela saana yoovaha ela ya olotta wiira ninhakalalihe Yehova?
1. Nirumeele dhai moolumo nhu?
Biibiliya onlotta wiira ‘Nilipihane ni nikhaliherane nkina ni nkwe.’ (1 aTesaloonika 5:11) Niire munnimuupuwela ntthu ontthuna olipihiwa? Eseeni mun’ya nnyu opaka wiira mmulipihe ntthu owo? Mmuleele ntthu owo wiira munnincali. Woonawene munttottopeleka mwaha wa mikhalelo-dhe dhooreera. Nnoonela dhai orumeela yawaatikhiwa emodha ya mBiibiliyani wiira mmulipihe? MBiibiliyani dhookhalamo dhawaatikhiwa dhawaatta nkhale nnyu othanla wiira nrumeele. Nhiliyale wiira moolumo munlotta nnyu pooti waakhumihera mixankiho aahiidho waakhalihera atthu. Tivondho mwiilipihere olotta moomaaleleya ni mooreera nrima.—Miruku 15:1.
2. Moolumo seeni ninreerela nhu oxaka?
Biibiliya onlotta wiira: ‘Mwaano mwinyu, ehikhume moolumo ootakhala.’ (Munsome aEfeso 4:29.) Elo entaphulela wiira nihaana oxaka olotta moolumo ooruwana, ootakhala ni oowali wiira niwoonihe onanara atthu akina. Ohiya-vo, nihaana oxaka ohankawaani aahiidho olampu ni waapa.—Munsome Miruku 16:28.
3. Eseeni en’ya onikhalihera orumeela saana yoovaha ya olotta?
Okhalawene moolumo, ninlotta nhu annoonihera etthu ninuupuwela nhu ni eri vanrimani vihu. (Luka 6:45) Tivondho, nihaana wiilipihera wuupuwelela itthu dhooreera, dha xariya, dhooloka, dhoopheteya, dhoottittimiheya, dhookhalela ni dhoottottopeleya. (aFilipi 4:8) Wiira niwerye opaka elo tivootthuneya othanla saana maraarelo ni axirikha nhu. (Miruku 13:20) Nitho etthu yooreera wuupuwelela saana moolumo nhu nihinatthi olotta. Ohiya-vo, muupuwele moopora atthu akina an’ya awa woonela moolumo nnyu. Biibiliya onlotta wiira: “Okakaruwa mwano tukuthi [ekatana] onvulaliha, nlumi na musuweli ninnivoliha makhwatta.”—Miruku 12:18.
NHUDHE ITTHU DHIKINA
Moone moopora nkhanle nnyu olotta moolumo aninhakalaliha Yehova. Nitho moone moopora nkhanle nnyu waalipiha atthu akina ni moolumo nnyu.
4. Nkhalena ephoole ni itthu munlotta nnyu
Ivaara dhikina ninnilotta etthu noomala nikathanana. (Yakobo 3:2) Munsome aGalasia 5:22, 23, nuuvinya mwaakhule makoho anttharelana:
Yawaatikhiwa ela ennilotta mikhalelo dhawaatta dhinkhalihera okhalana ephoole ni moopora woolotta. Mikhalelo seeni muntthuna nnyu onvekela Yehova? Mikhalelo idha dhin’ya wookhaliherani dhai?
Munsome 1 aKorinto 15:33, nuuvinya mwaakhule nikoho ninttharelana:
Axirikha nhu ni maraarelo ninthanla nhu an’ya ohapuwela dhai moopora ninlotta nhu?
Itthu nimpaka nhu dhikhanle dhai ohapuwela moopora ninlotta nhu?
Munsome Musuweli 3:1, 7, nuuvinya mwakhule nikoho ninttharelana.
Okathi seeni munreerela nnyu omaala nlipelelaka okathi wooreerela olotta?
5. Mwaalotte saana atthu akina
Nin’ya owerya dhai oxaka owooniha onanara atthu akina ni itthu ninlotta nhu? Moone EVIIDIYU, nuuvinya mwaakhule makoho anttharelana.
Nkhama moonne nnyu eviidiyu, munna ole aahoona wiira ahikhalana yoolema ya waalotta atthu akina moohikhalela. Eseeni yaamwiirinhe opaka marukunuso?
Eseeni apanke iye wiira attharuwe waalotta atthu akina moohikhalela?
Munsome Musuweli 7:16, nuuvinya mwaakhule nikoho ninttharelana:
Akhala wiira nookhalana yoolema ya waalotta atthu akina moohikhalela eseeni ninreerela nhu wuupuwelela?
Munsome Musuweli 7:21, 22, nuuvinya mwaakhule nikoho ninttharelana:
Yawaatikhiwa ela en’ya wookhaliherani dhai ohikhala oonyonyiheya vaavo atthu akina anoolottawani moohikhalela?
6. Moonihere waareerela nrima vaavo munlotta nnyu ni amudhi nnyu
Yehova ontthuna wiira nirumeele moolumo anoonihera opheta ni oreera nrima vaavo ninlotta nhu ni amudhi nhu. Moone EVIIDIYU, nuuvinya mwaakhule nikoho ninttharelana.
Eseeni en’ya onikhalihera olotta mooreera nrima ni amudhi nhu?
Munsome aEefeso 4:31, 32, nuuvinya mwaakhule nikoho ninttharelana:
Hiyo nintthuna olotta moolumo anoonihera wiira ninnaapheta amudhi nhu. Nin’ya owerya dhai opaka elo?
Yehova aalontte wiira animpheta Mwane Yesu. Munsome Matheyo 17:5, nuuvinya mwaakhule nikoho ninttharelana:
Mun’ya owerya dhai ontakiha Yehova vaavo munlotta nnyu ni amudhi nnyu?
Moone moopora wa wattottopela atthu akina
ATTHU AKINAKU ANLOTTA WIIRA: “Miyo kinlotta ele kinuupuwelaka. Ndho atthu akinaku yaahaadhivele nkinloha.”
Niire nyuwo nnuupuwela dhiidho? Mwaha wa seeni?
WUULUULA
Moolumo akhalana owerya. Tivondho, nihaana okhalana ephoole itthu ninlotta nhu ni moopora ninlotta nhu.
Ipontu dhuulupale
Mwa enamuna seeni mun’ya nnyu orumeela moolumo wiira mwaalipihe atthu akina?
Moolumo seeni munreerela nnyu oxaka olotta?
Eseeni en’ya onikhalihera okhala ooreera nrima ni waalipiha atthu akina ni moolumo nhu?
NTHOKODHE ITTHU DHIKINA
Eseeni en’ya onikhalihera olotta moolumo oolipiha?
Moone etthu en’ya wookhaliherani ottharuwa olotta moolumo ooveiha.
“Niire Etthu Yootakhala Olotta Moolumo Ooveiha?” (Mwaha ori nsaaitini jw.org)
Moone etthu ekina en’ya wookhaliherani ottharuwa owaapa atthu akina.
Ndhuwele moopora Yehova ankhalihenre iye nlopwana mmodha ottharuwa olotta moolumo ooveiha.
“Miyo Kahipacera Wuupuwelela Saana Moopora Ekumi aka Yaaya awa Okhala” (A Sentinela, 1 de Agosto de 2013)